भूपेन्द्र जिसी, पोखरा

नेपालमा हुने फ्रेन्चाइज टि२० लिगमा ब्याटिङतर्फ विदेशी खेलाडीकै वर्चस्व रहँदै आएको छ । नेपाली ब्याट्सम्यान रन जोड्न संघर्ष गरिरहँदा सर्वाधिक रन जोड्ने खेलाडीको सुचिमा विदेशी खेलाडीकै बोलबाला हुन्छ । अधिकांश टोलीको ब्याटिङ प्राय विदेशी खेलाडीमै निर्भर रहन्छन् ।

यसपटक पोखरा प्रिमियर लिगमा आरिफ शेखले नेपाली ब्याट्सम्यानले आक्रामक रुपमा रन जोड्न सक्छन् भनेर प्रमाणित गरेका छन् । आरिफले ५ मध्य ३ खेलमा उत्कृष्ट फिनिसिङ गरेका छन् । चितवन राइनोज अपराजित रहँदै फाइनलमा पुग्दा आरिफको प्रर्दशन पनि गज्जबको छ । खेल्ने शैली पनि लोभलाग्दो छ । उनको ब्याटबाट निरन्तर रन निस्केको छ ।

अझ आरिफ यस्तो टोलीमा खेलिरहेका छन् जहाँ नेपाली फ्रेन्चाइज लिगमा प्रभाव जमाएका तीन विदेशी खेलाडी र राष्ट्रिय टोलीका पूर्वकप्तान पारस खड्का समेत छन् । हङकङका पूर्वकप्तान बाबर हायात, यूएईका पूर्वकप्तान रोहन मुस्तफा र भारतीय अलराउन्डर सन्नी पटेल हुँदाहुँदै पनि आरिफले टोलीको मध्यक्रममा बलियो प्रदर्शन गरेका छन् ।

सिनियर टोलीबाट औसतमा रन जोडी रहेका आरिफले पीपीएलमा उत्कृष्ट प्रर्दशन गरिरहेका छन् । जसले अब नेपाली ब्याटिङ पारस खड्कामा मात्रै निर्भर छैन भन्ने संकेत पनि दिन्छ । जारी पीपीएलमा पहिलो खेलमा पोखरा पल्टनसँग १ रनमा आउट भएका आरिफले दोस्रो खेलमा बुटवल ब्लास्टर्सविरुद्ध १९ बलमा ३ चौका र ३ छक्का सहित आक्रामक ४० रन जोडेपछि चितवनले २ सय ३ रन बनाएको थियो ।

एक्स्पर्ट धनगढी ब्लुजविरुद्ध आरिफले तल्लोक्रममा २० बलमा २ चौका र ४ छक्का सहित ४७ रनमा अविजित रहे । उत्कृष्ट प्रर्दशन गरेका आरिफ म्यान अफ द म्याच चुनिए । उत्कृष्ट लयलाई निरन्तरता दिएका आरिफले विराटनगर टाइन्टसविरुद्ध पनि आक्रामक रन जोड्दै २२ बलमा ३ चौका र ३ छक्का सहित ३७ रनमा अविजित रहँदै टोलीलाई मध्यम योगफलमा पुर्याएका थिए ।

आरिफ मैदान प्रवेश गर्दा उक्त खेलमा चितवनले १४ ओभरमा ७० रन जोड्न ३ विकेट गुमाएको थियो । काठमाडौंविरुद्ध उनी ९ बलमा १५ रनमा आउट हुन पुगे । आरिफले ५ खेलमा १ सय ८६ को स्ट्राइक रेटमा १ सय ४२ रन जोडि सकेका छन् । स्ट्राइक रेट भारतीय खेलाडी सन्नी पटेलपछि दोस्रो स्थानमा छन् ।

सन् २०१४ मा हङकङविरुद्ध डेब्यू गरेका आरिफको सिनियर टोलीमा प्रर्दशन राम्रो नगरेका होइनन् । निरन्तर औसत प्रर्दशन गर्दै आएका छन् । आरिफले लिष्ट ए मा डिभिजन २ को खेलमा नामिबियाविरुद्ध सन् २०१५ मा डेब्यू गरेका थिए । सन् २०१६ पछि आरिफ नेपाली टोलीमा रहँदै आएका छन् । पछिल्लो दुई वर्षमा आरिफ पहिलो रोजाईमा पर्न थालेका छन् । धेरैले आरिफलाई शरद भेषावकरको उत्तरधिकारीको समेत भन्छन् ।

गत जुलाईमा सिंगापुरमा भएको आईसीसी टि ट्वान्टी एसिया विश्वकप छनोटमा भने आरिफ नेपाली टोलीमा थिएनन् । नेपाललाई एकदिवसिय विश्वकप छनोट हुँदै ऐतिहासिक वान डे मान्यता दिलाउन आरिफको प्रर्दशन महत्वपूर्ण थियो । आरिफले डिभिजन २ मा उत्कृष्ट प्रर्दशन गरेका थिए । महत्त्वपूर्ण खेलमा केन्याले प्रस्तुत गरेको १ सय ७८ रनको विजयी लक्ष्य पछ्याएको नेपाललाई ८२–५ को कमजोर अवस्थाबाट रोहित कुमार पौडेलसँग छैटौं विकेटका लागि आरिफले ८७ रनको महत्वपूर्ण साझेदारी गर्दै जित पक्का गरेका थिए । आरिफले उक्त खेलमा ४२ रनको योगदान दिएका थिए ।

सन् २०१७ मा धनगढी टिम चौराहालाई उपाधि दिलाउन आरिफले फाइनलमा विराटनगर किंग्सविरुद्ध तल्लोक्रममा ३० बलमा ४ चौका र ४ छक्का सहित ५४ रन जोड्दै म्यान अफ द म्याच चुनिएका थिए । सन् २०१८ मा आईसीसी एक दिवसिय विश्वकप छनोटमा जिम्बावेले प्रस्तुत गरेको ३ सय ८१ रनको लक्ष्य पछ्याउने क्रममा आरिफले ५९ बलमा ५ चौका सहित ५० रन जाडेका थिए । टेष्ट टोली जिम्वाबेविरुद्ध अर्धशतक पुरा गर्नु नेपाली ब्याट्सम्यानको लागि चानचुने कुरा पक्कै होइन ।

आरिफले राम्रो सुरुवात गरेपनि ठूलो इनिङमा बदल्न सकिरहेका छैनन् । जुन कुरा आरिफ स्वीकार्छन् । प्रमुख ब्याट्सम्यानको रुपमा टोलीमा हुँदा आरिफबाट पक्कै बढि आशा हुन्छ । आशा बढि राख्दा आरिफले फिनिसिङ राम्रोसँग गर्न नसक्दा प्रर्दशन केहि कमजोर मात्रै देखिन पुगेको हो । औसतमा हेर्दा उनको प्रर्दशन अन्य खेलाडीको तुलनामा राम्रो देखिन्छ ।

गत वर्ष आरिफको फ्रेन्चाइज लिगमा प्रर्दशन राम्रो हुन सकेन । एभरेष्ट प्रिमियर लिगमा भैरहवा ग्याडियटर्सबाट ७ इनिङमा ६९ रन र पोखरा प्रिमियर लिगमा चितवनबाट ६ इनिङमा ६९ रन बनाएका थिए । धनगढी प्रिमियर लिगमा आरिफले महेन्द्रनगर युनाइटेबाट ५ इनिङमा ६० रन मात्रै जोडे । यसबारे आरिफले खेल कहिले राम्रो र नराम्रो हुने बताए । राम्रो सुरुवात गरेपनि त्यसलाई ठूलो इनिङमा बदल्न नसक्दा तथ्यांक हेर्दा कमजोर देखिएको उनले प्रष्ट्याए । आरिफले पीपीएलमा आफ्नो जिम्मेवारी र टोलीले दिएको भुमिकालाई सदुपयोग गर्न सकेको अभिव्यक्ति दिए ।

पछिल्लो समय टि२० विश्व क्रिकेटमै विकास हुँदै गएको र आफूलाई केहि परिवर्तन गरेर आक्रामक शैलीलाई अपनाएका छन् । आरिफले पीपीएलमा ब्याटिङ पिच हुँदा रन बनाउन मदत पुगेको बताए । उनले पीपीएलमा प्रहार गरेका कुल ८ चौका र ११ छक्कामा सायदै कुनैमा आत्माविश्वासको कमी देखिन्थ्यो । सामान्यतया क्रिजमा आएपछि सेट हुन केहि समय बिताउने आरिफ यसपटक भने फरक रुपमा प्रस्तुत भइरहेका छन् । टोलीले उनलाई दिएको भूमिकामा आरिफ खरो उत्रिएका छन् । उनले आफ्नो खेल्ने शैलीलाई केहि परिमार्जन गर्दै फड्को नै मारेका छन् ।

‘खेल कहिले राम्रो हुन्छ । कहिले राम्रो हुँदैन । यो पटक फिनिसिङ गर्न सकिरहेको छु र राम्रो भएको छ । यसअघिका प्रतियोगितामा औसतमा रन बनेपनि ठूलो इनिङ खेल्न सकिन, फिनिसिङमा चुकिरहें,’ उनले भने । पीपीएलको प्रर्दशनले सिनियर टोलीमा पनि धेरै फाइदा पुग्ने आरिफले विश्वास राखेका छन् । पीपीएल र अन्तर्राष्ट्रिय खेलमा दबाब नै फरक हुने उनी बताउछन् ।

पछिल्लो समय आरिफले सिनियर टोलीबाट टि२० क्रिकेटमा तेस्रो नम्बरमा ब्याटिङ गर्न थालेका छन् । पीपीएलको प्रर्दशनले उनले आफ्नो आत्माविश्वास बढेको बताउछन् । सिनियर टोलीबाट टि ट्वान्टी आई, ओडीआई र लिष्ट ए मा रन जोडेपनि फिनिसिङ गर्न नसकेकोमा आरिफ खुसी छैनन् । अब सिनियर टोलीमा पनि आफूले यस प्रदर्शनलाई निरन्तरता दिन आत्माविश्वास बढेको बताउँछन् ।