पोखरा (हाम्रो खेलकुद) – विराटनगर टाइटन्स दोस्रो संस्करणको पोखरा प्रिमियर लिग(पीपीएल) को प्लेअफमा पुगेको छ । बुधबार बुटवल ब्लास्टर्सले प्रस्तुत गरेको १ सय ३४ रनको लक्ष्य मात्र ११.४ ओभरमा पूरा गर्दै विराटनगरले प्लेअफमा स्थान पक्का गरेको हो । विराटनगरले काठमाडौं गोल्डेन्स वारियर्सलाई नेट रनरेटले पछि पार्दै प्ले अफमा पुगेको हो ।

जितका लागि १ सय ३४ रनको विजयी लक्ष्य विराटनगरले मात्र ११.४ ओभरमा ६ विकेट गुमाउँदै पुरा गर्दै प्ले अफमा स्थान पक्का गरेको हो । प्ले अफमा पुग्न विराटनगरले १२.२ ओभरमा लक्ष्य पुरा गर्नु पर्ने समिकरण बनेको थियो । विराटनगरको जितमा पाकिस्तानका नोमन खानले २२ बलमा ५ चौका सहित ३५ रनको योगदान दिए ।

११ औं ओभरको चौथो बलमा नितेश थापाले नोमन खानलाई एलबी डब्लू आउट गरेका थिए । पुष्प थापा १८ र मिनास थापा १ रनमा अविजित रहे । पुष्पले ८ बलमा ३ चौका प्रहार गरे । विराटनगरले सुरुवात देखीनै आक्रामक ब्याटिङ गर्दै बुटवललाई दबाबमा राखेको थियो । बुटवलले पहिलो ओभरमा १४ र दोस्रो ओभरमा १७ रन बटुल्दै उत्कृष्ट सुरुवात गर्यो । दोस्रो ओभरको चौथो बलमा हर्ष टोन्कले ओपनर लोकेश बमलाई १३ रनमा बोल्ड आउट गरे । लोकेशले ५ बलमा २ छक्का प्रहार गरे ।

नितेश थापाले कप्तान प्रदीप ऐरीलाई तेस्रो ओभरको पहिलो बलमै रविन्द्र जंग शाहीबाट ५ रनमा क्याच आउट गराए । पाँचौ ओभरको दोस्रो बलमा अभिनास बोहराले मोहम्मद जैद आलमलाई २४ रनमा सिद्धान्त लोहनीबाट क्याच आउट गराए । ठूलो सट खेल्ने धुनमा क्याच आउट हुनु अघि जैदले १० बलमा ४ चौका र १ छक्का प्रहार गरे ।

सातौं ओभरको पहिलो बलमा पुनित मेहरा ३२ रनमा क्याच आउट हुन पुगे । कमल खत्रीले रविन्द्र जंग शाहीबाट क्याच गराउनु अघि १७ बलमा ३ चौका र १ छक्का प्रहार गरे । पुनितले ब्यक्तिगत १० रनमा जिवनदान पाएका थिए । सुनिल धमला २ रनमा रन आउट भए । बुटवलका नितेश थापाले २, कमल खत्री, हर्ष टोन्क र अभिनास बोहराले १–१ विकेट लिए ।

त्यसअघि पोखरा रंगशालामा टस हारेर ब्याटिङ थालेको बुटवल ब्लास्टर्सले २० ओभरमा ८ विकेट गुमाउँदै १ सय ३३ रन बनाएको थियो । बुटवलका लागि भारतीय ब्याट्सम्यान हर्ष टोन्कले सर्वाधिक ६७ रनको योगदान दिए । पहिलो ओभरको दोस्रो बलमै मैदान छिरेका टोन्कले ४४ बलमा ६ चौका र ५ छक्का प्रहार गर्दै इनिङ उकासेका थिए । दिपेश श्रेष्ठको १३ औं ओभरको तेस्रो बलमा ठूलो सट खेल्ने क्रममा टोन्क विकेटकीपर प्रदीप ऐरीबाट उत्कृष्ट क्याच आउट हुन पुगेका थिए ।

बुटवलका प्रमुख ब्याट्सम्यान ओपनर अफ्ताब उद्दीन अहमद पहिलो बलमै गोल्डेन डग आउट भए । किशोर महतोले विकेटकीपर प्रदीप ऐरीबाट क्याच गराएपछि शून्यमा पेभिलिएन फर्केका थिए । दोस्रो विकेटका लागि शंकर राना र हर्ष टोन्कले ३२ रनको साझेदारी गर्दै इनिङ उकासे । मोहम्मद जैद आलमको छैटौं ओभरको चौथो बलमा शंकरलाई दिपेश श्रेष्ठबाट २ रनमा क्याच आउट गराए । खराब सट खेल्दै पेभिलिएन फर्किनु अघि शंकरले १४ बलको सामना गरेका थिए । नवौं ओभरको पहिलो बलमा भिम सार्कीलाई साहब आलमले ५ रनमा बोल्ड आउट गरे ।

१२ औं ओभरको दोस्रो बलमा पुनित मेहरालाई छक्का प्रहार गर्दै हर्षले ३७ बलमा अर्ध शतक पुरा गरेका थिए । १२ औं ओभरका टोन्कले पुनितलाई ३ छक्का र १ चौका सहित कुल २४ रन बटुलेका थिए । कप्तान सिद्धान्त लोहनी ११ रनमा बोल्ड आउट भए । १८ औं ओभरको पाँचौ बलमा मोहम्मद जैद आलमले बोल्ड आउट गर्नुअघि सिद्धान्तले २१ बलमा १ छक्का प्रहार गरे । ११ रन जोड्न सिद्धान्तले दुई जीवनदान पाएका थिए ।

दिपेश श्रेष्ठको १५ औं ओभरको अन्तिम बललमा लङ अनमा लोकेश बलमले क्याच छाड्दा लोहनी १ रनमा खेलि रहेका थिए । सिद्धान्तले ब्यक्तिगत ९ रनमा पनि जिवनदान पाए। १७ औं ओभरको पाँचौ बलमा किशोर महतोलाई दिल स्कुप सट खेल्ने धुनमा पुष थापाले क्याच छाडेका थिए । १९ औं ओभरको दोस्रो बलमा रविन्द्र जंग शाहीलाई किशोरले शून्यमा बोल्ड आउट गरे । अन्तिम ओभरको दोस्रो बलमा जैदले शिबम सिंहलाई नोमन खानबाट ३७ रनमा क्याच आउट गराए । शिबमले २६ बलमा ३ चौका र १ छक्का प्रहार गरे । साम्सद शेख ७ रनमा क्याच आउट भए ।

विराटनगरका लागि पाकिस्तानका मोहम्मद जैद आलमले ४ ओभरमा २० रन खर्चिदै ४ विकेट लिए । किशोर महतोले ४ ओभरमा २२ रन खर्चेर २ विकेट लिए । दीपेश श्रेष्ठले ४ ओभरमा ३० रन खर्चेर १ विकेट लिए । साहब आलमले ४ ओभरमा २४ रन खर्चेर १ विकेट लिए ।

पहिलो खेलमा बुटवलले काठमाडौं गोल्डेन्स वारियर्सलाई सुपर ओभरमा हराएको थियो । चितवन राइनोजसँग बुटवल १ सय १९ रनको फराकिलो अन्तरले पराजित हुँदा पोखरा पल्टलनलाई ८ विकेटले हराएको थियो । चौथो खेलमा बुटवलले धनगढी एक्स्पर्टलाई ७ विकेटले पराजित गरेको थियो ।

यता विराटनगर पहिलो खेलमा धनगढीसँग ५ रनले पराजित भएको थियो । विराटनगरले दोस्रो खेलमा पोखरालाई ४५ रनले पराजित गरेको थियो । तेस्रो खेलमा भने विराटनगर काठमाडौंसँग ३६ रनले पराजित भएको थियो । विराटनगर चौथो खेलमा चितवनसँग १८ रनले पराजित भएको थियो ।

विराटनगरको अप्रत्याशित जितसँगै ज्ञानेन्द्र मल्ल कप्तान रहेको काठमाडौं लिग चरणबाटै बाहिरिएको छ । फाइनल प्रवेशको लागि विराटनगर र बुटवलबीच विहीबार क्वालिफायर खेल हुने छ । फाइनल पुष १२ मा हुने छ । चितवन अपराजित रहँदै शीर्ष स्थानमा रहेर फाइनलमा पुगिसकेको छ ।