पोखरा (हाम्रो खेलकुद) – विराटनगर टाइटन्स दोस्रो संस्करणको पोखरा प्रिमियर लिग (पीपीएल) को फाइनलमा प्रवेश गरेको छ । बिहीबार बुटवल ब्लास्टर्सलाई २१ रनले हराउँदै फाइनलमा पुगेको हो ।

पोखरा रंगशालामा जितका लागि १ सय ६६ रनको लक्ष्य पछ्याएको बुटवलले निर्धारित २० ओभरमा अलआउट हुँदै १ सय ४४ रन बनायो । ओपनर अफ्ताबुद्दीन अहमदले आक्रामक ब्याटिङ गर्दै राम्रो सुरुवात दिलाएका थिए । स्पिनर साहब आलमको पाँचौ ओभरको पाँचौ बलमा ठूला सट खेल्ने क्रममा बिट हुन पुग्दा अहमद ४३ रनमा बोल्ड आउट हुन पुगे । उनले २२ बलमा ६ चौका र २ छक्का प्रहार गरे । पहिलो विकेटका लागि अहमद र शंकर रानाले ५३ रनको साझेदारी गरेका थिए ।

अफ्ताबुद्दीनले ब्यक्तिगत २८ रनमा जीवनदान पाएका थिए । किशोर महतोको तेस्रो ओभरको चौथो बलमा ठूलो सट खेलेका अफ्ताबुद्दीनलाई लङ स्टपमा नोमन खानले क्याच छाड्न पुगेका थिए । शंकरलाई छैटौं ओभरको पहिलो बलमा जितेन्द्र मुखियाले ४ रनमा साहब आलमबाट क्याच आउट गराए । सातौं ओभरको चौथो बलमा साहबले जितेन्द्रबाट हर्ष टोन्कलाई २ रनमा क्याच गराए ।

साहबले ११ औं ओभरको चौथो बलमा शिवम सिंहलाई वैकल्पिक फिल्डिर दीपेश श्रेष्ठबाट १४ रनमा क्याच लिएका थिए । १६ औं ओभरको दोस्रो बलमा पुरन बिक १५ रनमा रन आउट हुन पुगे । १७ औं ओभरको अन्तिम बलमा किशोर महतोले सट थर्ड म्यानमा पुनितबाट भिम सार्कीलाई ४४ रनमा क्याच आउट गराएपछि खेल रोमान्चक बनेको थियो । भिमले ३४ बलमा ३ चौका र २ छक्का प्रहार गरे ।

१८ औैं ओभरको पहिलो बलमा मोहम्मद जैद आलमले साम्सद शेखलाई शून्यमा बोल्ड आउट गरेपछि बुटवलको जित कठिन बनेको थियो । जितेन्द्र मुखियाले १९ औं ओभर मेडन फ्याँकेपछि खेल विराटनगरको पकडमा गएको थियो । अन्तिम ओभरको पहिलो बलमा कप्तान सोमपाल कामी ५ रनमा क्याचआउट भए । स्पिनर साहब आलमले ४ ओभरमा २६ रन खर्चेर ३ विकेट लिए । पुनित मेहेराले पनि ३ तथा किशोर महतो, जैद आलम र जितेन्द्र मुखियाले १-१ विकेट लिए ।

त्यसअघि पोखरा रंगशालामा टस हारेर ब्याटिङ थालेको विराटनगरले निर्धारित २० ओभरमा ५ विकेटको क्षतिमा १ सय ६५ रन बनाएको थियो । कप्तान प्रदीप ऐरीले तल्लोक्रममा आक्रामक ब्याटिङ गर्दै १३ बलमा १ चौका र ४ छक्का सहित ३३ रनमा अविजित रहे । अन्तिम ओभरमा प्रदीपले अभिनास बोहरालाई २ छक्का र १ चौका सहित कुल १९ रन बटुलेका थिए ।

ओपनर सुनिल धमलाले सर्वाधिक ६१ रनको योगदान दिए । १७ औं ओभरको तेस्रो बलमा धमलालाई हर्ष टोन्कले भिम सार्कीबाट क्याच गराए । धमलाले ५४ बलमा ६ चौका र २ छक्का प्रहार गरे । धमलाले ४८ बलमा अर्ध शतक पुरा गरेका थिए ।

ओपनर मोहम्मद जैद आलम र सुनिल धमलाले ३९ रनको साझेदारी गर्दै मध्यम सुरुवात दिलाएका थिए । छैटौं ओभरको तेस्रो बलमा एक रन लिने क्रममा भिम सार्कीले सिधैं स्टम्प ताकेपछि आलम २० रनमा पेभिलिएन फर्किनु परेको थियो । आलमले १३ बलमा ३ चौका प्रहार गरे । हर्ष टोन्कको ११ औं ओभरको पहिलो बलमा ठूलो सट खेल्नेक्रममा लोकेश बम स्टेटमा सोमपाल कामीबाट १९ रनमा क्याच आउट भए । लोकेशले १६ बलमा २ छक्का प्रहार गरे ।

धमला र पुनित मेहराले तेस्रो विकेटका लागि ५७ रनको साझेदारी गर्दै इनिङ उकासेका थिए । पुनितलाई १८ औं ओभरको अन्तिम बलमा अभिनास बोहराले १९ रनमा बोल्ड आउट गरे । १९ औं ओभरको चौथो बलमा ललित सिंह भण्डारीले नोमन खानलाई शून्यमा क्याच आउट गराए । पुनितले २१ बलमा २ चौका प्रहार गरे । बुटवलका हर्ष टोन्कले ४ ओभरमा २१ रन खर्चेर २ विकेट लिए । अभिनास बोहरा र ललित सिंह भण्डारीले १(१ विकेट लिए ।

फाइनल शनिवार हुने छ । लिग चरणका पाँचै खेलमा जित सहित पारस खड्का कप्तान रहेको चितवन राइनोज अपराजित रहँदै स्वतः फाइनलमा पुगेको थियो ।