पोखरा (हाम्रो खेलकुद) – दोस्रो संस्करणको पोखरा प्रिमियर लिग (पीपीएल) को उपाधिको लागि शनिवार फाइनलमा चितवन राइनोज र विराटनगर टाइटन्सबीच प्रतिस्पर्धा हुँदैछ ।

चितवनको कप्तानी पारस खड्का र विराटनगरको प्रदीप ऐरीले गर्ने छन् । गत वर्ष चितवन फाइनलमा पोखरा पल्टनसँग पराजित हुन पुगेको थियो । चितवन लिग चरणमा पाँचै खेलमा अपराजित रहँदै सोझैं फाइनलमा पुगेको थियो । यता विराटनगर लिग चरणमा ५ खेलमा ३ मा हार र २ मा जित सहित काठमाडौं गोल्डेन्स वारियर्सलाई नेट रनरेटले पछि पार्दै प्ले अफमा पुगेको हो ।

क्वालिफायरमा बुटवल ब्लास्टर्सलाई २१ रनले पराजित गर्दै विराटनगरले फाइनलमा प्रवेश गरेको थियो । लिग चरणको अन्तिम खेलमा १ सय ३४ रनको लक्ष्य विराटनगरले ११.४ ओभरमा पुरा गर्दै प्ले अफ पक्का गरेको थियो ।

फाइनल अघि दुबै टोलीका कप्तानहरु एक अर्का टोलीलाई कमजोर मान्दैनन् । दुबै कप्तान उपाधि जित्न फाइनलमा उत्कृष्ट प्रर्दशन गर्नुपर्ने बताउछन् । चितवन अपराजित यात्रालाई कायमै राख्दै उपाधि जित्न चाहान्छ । अप्रत्याशित विराटनगर फाइनलमा सबैलाई आश्चर्य पार्दै उपाधि जित्ने सोचमा छ ।

फाइनल अघि चितवनका कप्तान पारस खड्काले पुरानो नतिजा के भयो भन्दा पनि भोली के गर्न सक्छौं भन्ने महत्वपूर्ण हुने बताए । लिग चरणका पाँच खेलको प्रर्दशनलाई फाइनलमा निरन्तरता दिने पारस बताउछन् । चितवनको मध्यक्रमको ब्याटिङ खासै प्रयोग भएको छैन । यस विषयलाई लिएर गरेको प्रश्नमा पारसले भने, शीर्षक्रममा हामी हाबी छौं, भोली पनि त्यहि होस् । जुन प्लान र जिम्मेवारी दिएको छ, त्यो अनुसार मध्यक्रमले पनि प्रर्दशन गर्नसक्नुपर्छ ।

‘विराटानगर बलियो टोली रहेको र राम्रो क्रिकेट खेलेर फाइनलमा पुगेको उनको तर्क छ । दुबै टोलीमा म्याच विनर खेलाडी छन् । हामी उत्कृष्ट क्रिकेट खेल्ने छौं’, पारसले भने ।

‘ कागजी रुपमा भन्दा पनि विराटनगरले मैदानमा उत्कृष्ट क्रिकेट खेलेको बताए । पोखरामा क्रिकेट विकास भइरहेका बताए । पारसले आरिफको प्रर्दशनको प्रशंसा गरे । आरिफले मिहेनत गरिरहेको छ । पछिल्लो छ महिनामा शैली पनि परिवर्तन गरेको छ । आशा गरौं फाइनल र आगमी दिनमा निरन्तरता दिनेछ’, उनले भने ।

विराटनगरका कप्तान प्रदीपले प्रतिस्पर्धी टोली बलियो रहेको र फाइनलमा जसले सबैभन्दा कम गल्ती गर्छ उसैले उपाधि जित्ने बताउँछन् । आफुहरुले सकभर राम्रो गर्न प्रयास गर्ने बताए । लोकेशको प्रर्दशन बारे उनले भने, उसमा क्षमता छ, उसले जुन प्रर्दशन गरेको छ त्यसलाई निरन्तरता दिए फाइनलमा उसलाई र टोली दुबैलाई फाइदा पुग्ने छ,’ प्रदीपले भने ।

६ खेलमा २ सय ४ रन बनाउनुको साथै ८ विकेट लिएका भारतीय अलराउन्डर पुनित मेहरा विराटनगरका प्रमुख खेलाडी हुन् । विराटनगरको जितमा पुनितको प्रर्दशन महत्वपूर्ण हुँदै आएको छ । फाइनलमा पनि उनको प्रर्दशन महत्त्वपूर्ण रहने छ । फाइनलमा ३ विकेट लिएका स्पिनर साहब आलम, आक्रामक ब्याटिङ गरि रहेका युवा खेलाडी लोकेश बम, पाकिस्तानका अलराउन्डर मोहमद जैद आलम उसका प्रमुख हतियार हुन् ।

लोकेशले लिग चरणमा विराटनगरविरुद्ध ३६ बलमा ५ चौका र ५ छक्का सहित ६२ रन जोड्दै चितवनलाई दबाबमा राखेका थिए । उनी पुन घातक बन्न सक्छन् । विराटनगर कागजी रुपमा कमजोर टोली भएपनि प्रतियोगितामा सबैलाई आश्चर्य पार्दै फाइनलमा पुगेको छ । विराटनगरलाई गुमाउनु केहि छैन । त्यसैले अप्रत्याशित नतिजा निकाल्ने सोचमा छ । लिग चरणमा विराटनगर चितवनसँग १८ रनले पराजित भएको थियो ।

चितवनको लागि बाबर हायत, रोहन मुस्तफा, आरिफ शेख, करण केसी र भुवन कार्कीले उत्कृष्ट प्रर्दशन गरेका छन् । समान ५ खेलमा करण केसी ११ विकेटका साथ शीर्षस्थानमा छन् । भुवन कार्की १० विकेटका साथ दोस्रो र सन्नी पटेल ९ विकेटका साथ तेस्रो स्थानमा छन् । यी तीन बलर फाइनलमा पनि हाबी हुने अनुमान गरिएको छ ।

बाबर हायतले १ सय ९८ तथा रोहन मुस्तफाले १ सय ५६ रन बनाउनुको साथै ८ विकेट लिएका छन् । अलराउन्डरले भोरिएको चितवन सन्तुलन र निकै बलियो देखिन्छ । अन्य खेलाडीको प्रर्दशन पनि उत्कृष्ट छ । उत्कृष्ट लयमा रहेको चितवन विराटनगरमाथि सहज जित निकाल्दै उपाधि जित्न चाहान्छ ।

पीपीएलको विजेताले २७ लाख र उपविजेताले १० लाख रुपैयाँ प्राप्त गर्ने छन् । प्रतियोगिताका म्यान अफ दि सिरिज, उत्कृष्ट ब्याट्सम्यान र उत्कृष्ट बलरले टिभिएस मोटरसाइकल प्राप्त गर्ने छन् ।