एजेन्सी – मेलबर्न स्टार्सले बिग ब्यास लिगअन्तर्गत डर्बी खेलमा मेलबर्न रेनेगेड्सलाई ८ विकेटले पराजित गर्दै शीर्षस्थानमा बलियो पकड जमाएको छ ।

जितका लागि १ सय ४३ रनको लक्ष्य पछ्याएको स्टार्सले २ विकेटको क्षतिमा १९ औं ओभरमा लक्ष्य पूरा गर्यो । स्टार्सका लागि ओपनर मार्कस स्टोइनिसले सर्वाधिक ५५ बलमा ६८ रनको योगदान दिए । विजयी रन प्रहार गरेका उनले ७ चौका र १ छक्का प्रहार गरे । कप्तान ग्लेन म्याक्सवेल ३२ बलमा ४० रन जोड्दै नटआउट रहे । उनले ३ चौका र १ छक्का प्रहार गरे ।

अर्का ओपनर निक म्याडीसन १७ तथा बेन डंक १५ रनमा आउट भएका थिए । रेनेगेड्सका लागि केन रिचर्डसन र रिचार्ड ग्लिसनले १-१ विकेट लिए ।

त्यसअघि पहिलो इनिङमा रेनेगेड्सले निर्धारित २० ओभरमा ९ विकेट गुमाउँदै १ सय ४२ रन जोडेको थियो । ओपनर स्याम हार्परले १२ रन जोड्दा कप्तान आरोन फिंच २५ रनमा बोल्ड भए । सन मार्सले ३३ बलमा सर्वाधिक ४३ रनको योगदान दिए । ब्यु वेब्स्टर २९ रनमा जाम्पाको बलमा बोल्ड भए । विल सदरल्यान्डले १६ रन जोड्दा अन्य ब्याट्सम्यानले उल्लेख्य अंक छुन सकेनन् ।

पछिल्लो खेल सामान्य चोटका कारण विश्राममा रहेका स्पिनर सन्दीप लामिछानेले उत्कृष्ट प्रदर्शन गरे । उनले पहिलो ब्याटिङ गरेको रेनेगेड्सका दुई प्रमुख ब्याट्सम्यानलाई एकै ओभरमा आउट गरेका थिए । सन्दीपले समग्रमा ४ ओभर बलिङ गर्दै २६ रन खर्चेर ३ विकेट लिए ।

पहिलो ओभरमा ७ रन खर्चेका सन्दीपले दोस्रो ओभरमा १२ रन दिए । तेस्रो ओभरमा २ विकेटसँगै सन्दीपले ४ रन दिएका थिए । तेस्रो ओभरको तेस्रो बलमा उनले सर्वाधिक रन जोडेका सन मार्सलाई क्याचआउट गराए । बाउन्ड्रीमा बेन डंक र नाथन कुल्टर नाइलले उत्कृष्ट क्याच लिएका थिए ।

पाँचौ बलमा आक्रामक अलराउन्डर ड्यान क्रिस्टियनलाई सन्दीपले ह्यान्ड्सकम्बको हातबाट शून्यमा स्टम्पिङ गराएका थिए । चौथो ओभरको पाँचौ बलमा टम कुपरको क्याच कप्तान ग्लेन म्याक्सवेलले ड्रप गरेपनि अन्तिम बलमा उनले कुपरलाई एलबीडब्लू धरापमा पारे ।

स्टार्सका लागि सन्दीपले ३ विकेट लिँदा अर्का स्पिनर एडम जाम्पा र डेल स्टेनले २-२ विकेट हात पारे । कुल्टर नाइलले १ विकेट लिए । यस जितसँगै स्टार्सले ६ खेलमा ५ जित र १ हारसँगै १० अंक जोडेको छ । दोस्रो स्थानमा रहेको सिड्नी सिक्सर्सको ६ खेलमा ८ अंक छ ।