सनसुरी (हाम्रो खेलकुद) – बायाँ हाते स्पिनर विनोद लामाले उत्कृष्ट बलिङ गर्दै एक्लै ७ विकेट लिएपछि सुनसरीको इनरुवामा जारी मनमोहन मेमोरियल राष्ट्रिय एक दिवसिय क्रिकेट प्रतियोगिता अन्तर्गत आईतबार समुह डी को दोस्रो खेलमा गण्डकी प्रदेशले सुदूरपश्चिम प्रदेशलाई ६५ रनको सामान्य लक्ष्य दिएको छ ।

आइतबार इनरुवा क्रिकेट मैदानमा टस जितेर पहिला ब्याटिङ थालेको गण्डकी प्रदेश २३.३ ओभरमा अल आउट हुँदै ६४ रनमा समेटियो । गण्डकीका १० खेलाडीले दोहोरो अंकमा रन छुन सकेनन् । तेस्रो ओभरको दोस्रो बलमा बायाँ हाते तीब्र गतिका बलर बिक्रम ठगुन्नाले ओपनर दिपेश खत्रीलाई १ रनमा एलबी डब्लू आउट गरे ।

आठौं ओभरको पहिलो बलमा स्पिनर विनोद लामाले विकेटकिपर बिधान श्रेष्ठलाई सन्तोष भट्टबाट ६ रनमा क्याच आउट भए । दशौं ओभरको दोस्रो बलमा ठूलो सट खेलेका किशोर महतो डिप मिड विकेटमा खडक बोहराबाट १७ रनमा क्याच हुन पुगे । किशोरले १९ बलमा ४ चौका प्रहार गरे । किशोरलाई आउट गरेको १ बपछि विनोदले आकश थापालाई बिक्रमबाट शून्यमा क्याच भए ।

१३ औं ओभरको दोस्रो बलमा मुस्कान थापालाई शेर मल्लले शून्यमा बोल्ड आउट गरे । विनोदलेनै १६ औं ओभरको दोस्रो बलमा कप्तान गोविन्द प्रधानलाई ५ रनमा खडकबाट क्याच गराएपछि गण्डकी ४२-६ को कमजोर अवस्थामा पुगेको थियो । २० औं ओभरको अन्तिम बलम विनोदलेनै सुवास पौडेललाई ३ रनमा क्याच आउट गराएपछि गण्डकी सस्तैमा समेटिएको हो ।

२३ औं ओभरको चौथो बलमा शेर मल्लले दीपेश श्रेष्ठलाई ५ रनमा एलबी डब्लू आउट गरे । विनोदलेनै सुवास भण्डारीलाई ७ रनमा क्याच आउट गराए । सुदूरपश्चिमका बायाँहाते स्पिनर विनोद लामाले ९.३ ओभरमा २उ मेडन सहित १४ रन खर्चेर ७ विकेट लिए । अर्का स्पिनर शेर मल्लले ८ ओभरमा १ मेडन सहित २५ रन खर्चेर २ विकेट लिए । बिक्रम ठगुन्नाको नाममा १ विकेट लिए ।