सुनसरी (हाम्रो खेलकुद) – बायाँ हाते स्पिनर विनोद लामाले उत्कृष्ट बलिङ गरेसँगै सुदूरपश्चिम प्रदेश सुनसरीको इनरुवामा जारी मनमोहन मेमोरियल राष्ट्रिय एक दिवसिय क्रिकेट प्रतियोगिताको सेमिफाइनलमा प्रवेश गरेको छ । आइतबार समुह ‘डी’ को दोस्रो खेलमा गण्डकी प्रदेशलाई ९ विकेटले हराउँदै सेमिफाइनलमा स्थान पक्का गरेको हो ।

यो सँगै समुह ‘डी’ बाट एक- एक खेल खेलका मलेसिया-११ र गण्डकी प्रदेश बाहिरिएका छन् । गण्डकीले प्रस्तुत गरेको ६५ रनको सामान्य लक्ष्य सुदूरपश्चिम प्रदेशले १०.२ ओभरमा १ विकेट गुमाउदै पुरा गरेको हो । ओपनर गजेन्द्र बोहरा २७ बलमा ७ चौका सहित ३४ रनमा क्याच आउट भए । त्यस्तै खडक बोहरा १६  र अरुण ऐरी १० रनमा अविजित रहे । दीपेश खत्रीले १ विकेट लिए ।

त्यसअघि आइतबार इनरुवा क्रिकेट मैदानमा टस जितेर पहिला ब्याटिङ थालेको गण्डकी प्रदेश २३.३ ओभरमा ६४ रनमा अल आउट भएको थियो । गण्डकीका १० खेलाडीले दोहोरो अंकमा रन छुन सकेनन् । तेस्रो ओभरको दोस्रो बलमा बायाँ हाते तीब्र गतिका बलर बिक्रम ठगुन्नाले ओपनर दिपेश खत्रीलाई १ रनमा एलबी डब्लू आउट गरे ।

आठौं ओभरको पहिलो बलमा स्पिनर विनोद लामाले विकेटकिपर बिधान श्रेष्ठलाई सन्तोष भट्टबाट ६ रनमा क्याच आउट भए । दशौं ओभरको दोस्रो बलमा ठूलो सट खेलेका किशोर महतो डिप मिड विकेटमा खडक बोहराबाट १७ रनमा क्याच हुन पुगे । किशोरले १९ बलमा ४ चौका प्रहार गरे । किशोरलाई आउट गरेको १ बपछि विनोदले आकश थापालाई बिक्रमबाट शून्यमा क्याच भए ।

१३ औं ओभरको दोस्रो बलमा मुस्कान थापालाई शेर मल्लले शून्यमा बोल्ड आउट गरे । विनोदलेनै १६ औं ओभरको दोस्रो बलमा कप्तान गोविन्द प्रधानलाई ५ रनमा खडकबाट क्याच गराएपछि गण्डकी ४२-६ को कमजोर अवस्थामा पुगेको थियो । २० औं ओभरको अन्तिम बलम विनोदलेनै सुवास पौडेललाई ३ रनमा क्याच आउट गराएपछि गण्डकी सस्तैमा समेटिएको हो ।

२३ औं ओभरको चौथो बलमा शेर मल्लले दीपेश श्रेष्ठलाई ५ रनमा एलबी डब्लू आउट गरे । विनोदलेनै सुवास भण्डारीलाई ७ रनमा क्याच आउट गराए । सुदूरपश्चिमका बायाँहाते स्पिनर विनोद लामाले ९.३ ओभरमा २ मेडन सहित १४ रन खर्चेर ७ विकेट लिर्दै सेमिफाइनल यात्रा पक्का गरे। अर्का स्पिनर शेर मल्लले ८ ओभरमा १ मेडन सहित २५ रन खर्चेर २ विकेट लिए । बिक्रम ठगुन्नाले १ विकेट लिए ।

योसँगै एमएम कपमा सेमिफाइनल समिकरण पुरा भएको छ । पहिलो सेमिफाइनलमा माघ १ मा समुह ‘ए’ को विजेता त्रिभुवन आर्मी र समुह ‘सी’ को विजेता प्रदेश नम्बर ३ भिड्ने छन् । माघ २ मा सुदूरपश्चिमले समुह ‘बी’ को विजेता नेपाल पुलिस क्लब को सामना गर्ने छ ।