सुनसरी (हाम्रो खेलकुद) – सुनसरीको इनरुवामा जारी मनमोहन मेमोरियल राष्ट्रिय एक दिवसिय क्रिकेट प्रतियोगिताको पहिलो सेमिफाइनल खेलमा त्रिभुवन आर्मी क्लबले प्रदेश नम्बर ३ लाई २ सय १७ रनको लक्ष्य दिएको छ ।

इनरुवा क्रिकेट मैदानमा टस जितेर ब्याटिङ थालेको आर्मी ४६.३ ओभरमा अल आउट हुदै २ सय १६ रन बनायो । आर्मीका ओपनर अनिल कुमार मण्डलले सर्वाधिक ४३ रनको योगदान दिए । लेग स्पिनर तिलकराज भण्डारीले ३० औं ओभरको पहिलो बलमा बोल्ड आउट गर्नुअघि मण्डलले ७३ बलमा ३ चौका प्रहार गरे ।

चौथो ओभरको तेस्रो बलमा युवा तीब्र गतिका बलर गौतम केसिले ओपनर हरिकृष्ण झालाई ६ रनमा विकेटकिपर आदिल खानबाट कट बिहाइन्ड क्याच गराए । गौतमले नै हरि बहादुर चौहानलाइ १ रनमा आदिलबाट क्याच गराए । २० औं ओभरको अन्तिम बलमा नन्दन यादवले रोहित कुमार पौडेललाई २९ रनमा राम नरेश गिरिबाट क्याच आउट गराए । रोहितले ३७ बलमा ४ चौका प्रहार गरे ।

राजेश पुलामी मगर १७, बिनोद भन्डारी ६ र भिम सार्की १५ रनमा आउट भएपछि आर्मी दबाबमा परेको थियो । तल्लोक्रममा कुशल मल्लले २६ बलमा ४ चौका र २ छक्का सहित ३७ रन जोड्दै आर्मीलाई प्रतिस्पर्धात्मक योगफलमा पुर्याए । बिक्रम शोब ३३ बलमा ३ चौका सहित २४, सुशन भारी १३ र साहब आलमले १ रन जोडे ।

युवा तीब्र गतिका बलर गौतम केसीले ७.३ ओभरमा २२ रन खर्चेर ४ विकेट लिए । तिलकराज भन्डारी, नन्दन यादव र ईशान पान्डेले २-२ विकेट लिए ।