भूपेन्द्र जिसी, सुनसरी

नेपालले सन् २०१२ को एसीसी यू१६ इलिट कपमा मलेसियासँग १ विकेटको अप्रत्याशित हार बेहोरेको थियो । मलेसियालाई दुर्लभ जित दिलाउँदा मलेसियाका नायक बनेका थिए विरनदीप सिंह । तिनै विरनदीप हाल मलेसियाको सिनियर टोलीका नियमित खेलाडी छन् ।

उक्त खेलमा टस जितेर ब्याटिङ रोजेको नेपाली यू१६ टोली ३३ ओभरमा १ सय १७ रनमा अलआउट भएको थियो । जवाफी ब्याटिङ थालेको मलेसियाले ३९.१ ओभरमा ९ विकेट गुमाउँदै पुरा गर्यो । ओपनर विरनदीपले १ सय १९ बलमा ७ चौका सहित ५४ रनमा अविजित रहँदै मलेसियाको जित पक्का गरे । उनी नै खेलको  ‘म्यान अफ द म्याच चुनिए’।

सन् २०१६ को यू१९ एसिया कप श्रीलंकामा नेपालले मलेसियामाथि १ विकेटको संघर्षपूर्ण जित निकालेको थियो । मलेसिया यू१९ का कप्तान विरनदीपले नेपालविरुद्ध १ सय २० बलमा ७ चौका सहित ७५ रनको योगदान दिए । बलिङमा विरनदीपले १० ओभरमा २९ रन खर्चेर ३ विकेट लिँदै नेपाललाई अप्रत्याशित हार नजिक पुर्याएका थिए ।

त्यसबेला पवन सरार्फले २९ रन जोड्दै जित दिलाएका थिए । त्यसबेला यू-१९ टोलीमा अहिले सिनियर टोलीमा रहेका सन्दीप लामिछाने, दीपेन्द्र सिंह ऐरी, पवन सरार्फ, रोहित कुमार पौडेल लगातका खेलाडी थिए ।

गत जुलाईमा नेपालसँगको दुई टि ट्वान्टी आई सिरिज अन्तर्गत पहिलो खेलमा विरनदीपले ४९ बलमा ७ चौका र १ छक्का सहित ५७ रन जोडेका थिए । २० वर्षिय युवा अलराउन्डर विरनदीप उमेरको हिसाबमा सानै छन् तर उनले छोटो समयमा क्रिकेटमा ठुलो उचाइ लिइसकेका छन् । धेरैले उनलाई भावी एसोसियट स्टारको रुपमा लिएका छन् । विरनदीपले कलिलो उमेरमा जुन प्रर्दशन गरेका छन् पछि परिपक्व हुँदासम्म मलेसियालाई नयाँ उचाईमा पुर्याउने आशा गरिएको छ ।

तीनै विरनदीप यसै साता मलेसिया-११ बाट सुनसरीको इनरुवा जारी मनमोहन मेमोरियल राष्ट्रिय एक दिवसिय क्रिकेट प्रतियोगिता खेल्न नेपाल आएका थिए । पहिलो खेलमा सुदूरपश्चिम प्रदेशसँग मलेसिया ४९ रनमा अल आउट भयो । मलेसिया ४९ रनमा अल आउट भएपनि विरनदीपले ६९ बलमा ३ चौका प्रहार गर्दै २२ रन जोडे । मलेसिया-११ बाट दोहोरो अंक जोड्ने विरनदीप एक्लो खेलाडी थिए । विरनदीपले पिचको अवस्थालाई बुझ्दै लामो समय सम्म क्रिजमा रहे । यसले उनको प्रतिभालाई थप प्रष्ट पार्यो ।

उनले आफु अवस्था र परिस्थिति अनुसार खेल्न सक्ने क्षमता रहेको प्रष्टाए । दोस्रो खेलमा विरनदीपले गण्डकी प्रदेश विरुद्ध आक्रामक ५० रन जोड्दै आफ्नो लयलाई निरन्तरता दिए । विरनदीप नेपाली सिनियर टोलीका सन्दीप लामिछाने, पवन सरार्फ, रोहित कुमार पौडेल, दीपेन्द्र सिंह ऐरी लगातका खेलाडीसँग उमेर समुह खेल्दै हुर्केका अलराउन्डर हुन् । उनले उमेर समूहमा मलेसियाको कप्तानी पनि लामो समय सम्हालेका छन् ।

विरनदीपले आफ्नो पछिल्लो चार वर्षको क्रिकेट यात्रा उत्कृष्ट रहेको बताउँछन् । उमेर समुहमा सन्दीप लामिछाने, रोहित कुमार पौडेल, पवन सरार्फ, दीपेन्द्रसिंह ऐरी जस्ता नेपाली खेलाडीसँग खेल्न पाउनुमा आफु धेरै भाग्यमानी रहेको बताउछन् । ‘नेपालका युवा खेलाडीसँग धेरै अनुभव बटुल्न पाएँ । जुन खेलाडीसँग मैले उमेर समुहमा खेले ती मध्यमा केहि नेपाली सिनियर टोलीमा छन् । सन्दीपले विश्वका ठूला लिग खेलिरहेका छन्, त्यसैले म आफूलाई भाग्यमानी मान्छु,’ उनले भने ।

विरनदीपले मलेसियाको विश्व क्रिकेटमा पहिला टि ट्वान्टी आईमा उत्कृष्ट प्रर्दशन गर्दै वरियतामा सुधार गर्ने लक्ष्य राखेको बताए । ‘अहिलेनै हाम्रो विश्वकपको सपना छैन । पहिला हामी वरियतामा धेरै सुर्धार गर्न चाहान्छौं । अनि हाम्रो लक्ष्य ओडीआई मान्यता प्राप्त गर्नुछ,’ उनले हाम्रो खेलकुदसँग भने ।

विरनदीपले नेपाली क्रिकेट समर्थकको खुलेर प्रंशसा गरे । ‘पक्कै पनि नेपाली समर्थकमा क्रिकेटको धेरै भोक छ, सन्दीपले विश्वभर क्रिकेट खेलि रहेका छन् । समर्थकले पनि उनलाई राम्रो साथ दिन्छन् । साँच्चै नेपाली समर्थकको साथ उत्कृष्ट छ’, उनले भने ।

पछिल्लो समय नेपालमा तीन चर्चित फ्रेन्चाइज लिग हुँदै आएको छ । जसमा विश्वका नाम चलेका ठूला खेलाडी खल्दै आएका छन् । नेपाली युवा खेलाडीसँग हुर्केका विरनदीप सिंहले नेपाली फ्रेन्चाइज लिग खेल्ने चाहना रहेको बताए ।

नेपाली फ्रेन्चाइज लिग खेल्ने चाहना छ कि छैन भन्ने प्रश्नको जवाफमा उनले भने, ‘पक्कै पनि, हामी जस्तो जुनियर क्रिकेटरको लागि नेपाली लिग उत्कृष्ट माध्यम हो । नेपाली फ्रेन्चाइज लिगमा अन्य ठूला विदेशी खेलाडी खेल्दै आएका छन् । यसले अनुभव र व्यक्तिगत विकासमा धेरै सहयोग पुग्नेछ । नेपाली समर्थकको साथ अझ उत्कृष्ट छ । न्युनतम सेवा सुविधा पाएपनि म खेल्न चाहान्छु’, उनले भने ‘।

विरनदीपले नेपाल एसोसिएटमा बलियो टोली रहेको बताउछन् । ‘ मलाई लाग्छ एसोसिएट टोलीले कम आर्थिक सहयोग पाउछन् । क्रिकेट भनेको विकास हो । क्रिकेट विकासको लागि आर्थिक पक्ष सुदृढ हुनु आवश्यक छ । त्यसको लागि पहिला आईसीसीले एसोसिएट टोलीलाई पनि राम्रो आर्थिक सहयोग गर्नुपर्छ । जसले क्रिकेट विकास गर्न धेरै सहयोग पुग्नेछ ,’ उनले भने । उनले आफ्नो व्यक्तिगत लक्ष्य नेपालसहित विश्वका ठूला नाम चलेका आईपिएल, बिग ब्यास लिग लगातका लिग खेल्ने रहेको बताउँछन् ।

विरनदीपले १२ टि ट्वान्टी आईमा ३ सय ११ रन बनाएका छन् । नेपालविरुद्ध प्रहार गरेको ५७ रन उनको टि ट्वान्टी आईको उच्च प्रर्दशन हो । उत्कृष्ट प्रर्दशन गर्दै आएका विरनदीपले गत सेप्टेम्बरमा विश्वकप च्यालेन्च लिग ए मा ५ खेलमा १ सय ८१ रन बनाउँदै मलेसियाबाट सर्वाधिक रन बनाउने खेलाडी बनेका थिए । विरनदीपले उमेर समुह हुँदै सिनियर टोलीमा जुन प्रभाव जमाएका छन्  यसले आगमी दिनमा उनले मलेसिया क्रिकेटलाई उपल्लो स्तरमा पुर्याउने आशा राखिएको छ ।