सुनसरी (हाम्रो खेलकुद) – स्पिनर सागर ढकालले उत्कृष्ट बलिङ गरेपछि नेपाल पुलिस क्लब सुनसरीको इनरुवामा जारी मनमोहन मेमोरियल राष्ट्रिय एकदिवसिय क्रिकेट प्रतियोगिताको फाइनलमा पुगेको छ ।

बिहीबार सुदूरपश्चिम प्रदेशलाई ९९ रनले हराउँदै पुलिस फाइनलमा पुगेको हो । पुलिसले उपाधिको लागि शनिबार त्रिभुवन आर्मी क्लबसँग खेल्ने छ । आर्मीले पहिलो सेमिफाइनल खेलमा प्रदेश नम्बर ३ लाई ६४ रनले हराउँदै फाइनलमा पुगेको थियो । २ सय ३० रनको लक्ष्य पक्ष्याएको सुदूरपश्चिम ३३.४ ओभरमा १ सय ३० रनमा अल आउट भयो ।

पाँचौ ओभरको अन्तिम बलमा ललित सिंह भन्डारीले गजेन्द्र बोहरालाई कप्तान मन्जित श्रेष्ठबाट १२ क्याच गराए । अरुण ऐरिलाई ललित नारायण राजवंशीले ६ रनमा क्याच गराउदै सुरुवाती समय दवावमा राखे । १४ औं ओभरको चौथो बलमा सागर ढकालले ओपनर खडक बोहरालाइ १४ रनमा विकेटकिपर अनिल कुमार शाहबाट स्टम्पिङ आउट गराए । खडक अघि बड्दै सट खेल्ने क्रममा बिट हुन पुगे । खडकले ४० बलमा १ चौका प्रहार गरे ।

१५ औं ओभरको पाचौं बलमा ललित नारायाण राजवंशीले लोकेश बमलाई ८ रनमा स्टम्पिङ आउट गराएपछि सुदुरपश्चिमलाई जित टाढिएको थियो । शेर मल्ललाई सागरले शुन्यमा एलबीडब्लू आउट गरेपछि सुप पुर्णरुपमा दवावमा परेको थियो । सागर ढकालले दीपक बोहरा र कप्तान सन्तोष भट्टलाई १ रनमा आउट गरेपछि सुदूरपश्चिम १९.५ ओभरमा ७३-७ को कमजोर अवस्थामा पुगेको थियो ।

आक्रमक ब्याटिङ गरेका किरण ठगुन्नालाई २७ औं ओभरको पहिलो बलमा ललित नारायण राजवंशीले फस्ट सिलिपमा रहेका कुशल भुर्तेलबाट ३९ रनमा क्याच गराएपछि सुदूरपश्चिमको जितको सम्भावना सकिएको थियो । किरणले ४६ बलमा २ चौका र ३ छक्का प्रहार गरे । आकश चन्द २६ बलमा १ चौका र १ छक्का सहित १८ रनमा अविजित रहे ।

पुलिसका स्पिनर सागर ढकालले ६.४ ओभरमा १ मेडन सहित ९ रन खर्चेर ५ विकेट लिए । अर्का स्पिनर ललित नारायण राजवंशीले ७ ओभरमा २३ रन खर्चेर ३, योगेन्द्र सिंह कार्की र ललित सिंह भण्डारीले १-१ विकेट लिए ।

त्यसअघि बिहीबार इनरुवा क्रिकेट मैदानमा टस जितेर ब्याटिङ थालेको पुलिस ४९ ओभरमा २ सय २९ रनमा अल आउट भएको थियो । तेस्रो ओभरको दोस्रो बलमा स्पिनर शेर मल्लले ओपनर सुनिल धमलालाई १ रनमा दीपक बोहराबाट क्याच गराउँदै पेभेलिएन फर्काए । १२ औं ओभरको चौथो बलमा दीपेन्द्र सिंह ऐरीले ३२ रनमा जीवनदान पाए । ठुलो सट खेलेका दीपेन्द्रलाई लङ अनमा शेर मल्लले क्याच छोडेका थिए ।

त्यसअघि तेस्रो बलमा किरन ठगुन्नाले डाइरेक्ट थ्रो हान्दै स्टम्प ताकेपनी दीपेन्द्र रन आउट हुनबाट बचेका थिए । १४ औं ओभरको चौथो बलमा स्पिनर विनोद लामाले लङ अनमा खडक बोहराबाट ओपनर अमित श्रेष्ठलाई ८ क्याच गराए । दोस्रो विकेटका लागि अमित र दीपेन्द्रले ५४ रनको साझेदारी गर्दै इनिङ उकासे । दीपेन्द्रले ब्यक्तिगत ६० रनमा पनि जीवनदान पाए । विनोदकै २३ औं ओभरको तेस्रो बलमा गजेन्द्र बोहराले दीपेन्द्रको क्याच छोडे ।

विनोदको २५ ओभरको अन्तिम बलमा ठुलो सट खेलेका अनिल कुमार शाह ३१ रनमा आकश चन्दबाट क्याच हुँदै पेभिलिएन फर्के । अनिलले ३९ बलमा ४ चौका प्रहार गरे । अनन्तः दीपेन्द्र विनोद लामाकै शिकार बन्न पुगे । २७ औं ओभरको पहिलो बलमा एलबीडब्लू आउट हुनु अघि दीपेन्द्रले ७६ बलमा ६ चौका र १ छक्का सहित ६८ रनमा आउट भए । २८ औं ओभरको दोस्रो बलमा आकशले पवन सरार्फलाई १ रनमा एलबीडब्लू आउट गर्दै सुदुरपश्चमलाई खेलमा फर्काए ।

३५ औं ओभरको चौथो बलमा शेरले कुशल भुर्तेललाइ विकेटकिपर लोकेश बमबाट १७ रनमा स्टम्पिङ आउट गराए । कप्तान सन्तोष भट्टले ३६ औं ओभरको चौथो बलमा योगेन्द्र सिंह कार्कीलाई २९ रनमा बिक्रम ठगुन्नाबाट क्याच गराएपछि पुलिस ठूलो योगफल बनाउन चुकेको हो । योगेन्द्रले ३३ बलमा ३ चौका र १ छक्का प्रहार गरे । तल्लोक्रममा तीब्र गतिका बलर ललित सिंह भण्डारीले ४० बलमा २ चौका र ४ छक्का सहित ४० रन जोड्दै पुलिसलाई बलियो प्रतिस्पर्धात्मक योगफलमा पुर्याए । कप्तान मञ्जित श्रेष्ठ र सागर ढकालले ९-९ रन जोडे ।

स्पिनर विनोद लामाले १० ओभरमा ५७ रन खर्चेर ३ विकेट लिए । शेर मल्लले १० ओभरमा १ मेडन सहित ४५ रन खर्चेर ३ विकेट लिए । आकश चन्दले ९ ओभरमा ४७ रन खर्चेर ३ विकेट लिए । सन्तोष भट्टको नाममा १ विकेट रह्यो ।