काठमाडौं (हाम्रो खेलकुद) – वेस्ट इन्डिजका विष्फोटक ओपनर ब्याट्सम्यान क्रिस गेलले चाडैं नेपालमा भेट्ने बताएका छन् । क्रिस गेलले आगमी संस्करणको एभरेष्ट प्रिमियर लिग (इपिएल) पोखरा राइनोजबाट खेल्दैछन् ।

नेपाली फ्रेन्चाइज लिगमा गेल हालसम्मकै ठूला नाम गरेका खेलाडी हुन् । विहीबार काठमाडौंमा एक कार्यक्रम गर्दै पोखरा राइनोजले गेल आइकनिक प्लेयर रहेको सार्वजनिक गरेको छ । पोखराले गेलको एक सन्देश भिडियो पनि सार्वजनिक गरेको छ । उक्त सन्देश भिडियोमा गेलले आफ्नो टोली पोखरा राइनोजलाई समर्थन गर्न र चाडैं नेपालमा भेट्ने बताएका छन् ।

गेल फागुन २९ मा नेपाल आउने आयोजकले जनाएको छ । गेलले ईपिएल कति खेल खेल्ने भन्ने इन्डियन प्रिमियर लिग (आईपिएल) खेल तालिकाले निर्धारण गर्ने छ । १३ औं संस्करणको आईपिएल चैत्र १६ देखि जेठ ११ सम्म भारतका विभिन्न शहरमा हुने छ । क्रिस गेलले किंग्स इलाभेन पञ्जावबाट खेल्ने छन् । पोखराले गेलसँगको पारिश्रमिक गोप्य राखेको छ ।

‘क्रिस गेल, युनिभर्स बोस, किङ अफ ट्वान्टी ट्वान्टी, एभरेष्ट प्रिमियर लिगको लागि म नेपाल आउँदैछु । मेरो टोली पोखरा राइनोजलाई समर्थन गर्नुहोस । गेलको आँधी हेर्नको लागि नेपालमा तयार रहनुहोस, चाडै नेपालमा भेटौंला’, गेलले भिडियो सन्देशमा भनेका छन् ।

गेल आईसीसीको तीनै शैली (टेष्ट, एक दिवसिय र टि ट्वान्टी) मा शतक प्रहार गर्ने पहिलो खेलाडी हुन् । विश्फोटक ब्याटिङको लागि विश्व क्रिकेट जगतमा परिचित गेलको नाममा विश्व क्रिकेटमा थुप्रै कीर्तिमान रहेको छ । गेलले एकै ओभरमा खेललाई नयाँ मोड दिन सक्छन् । गेलले ओडीआईमा सन् १९९९ मा भारतविरुद्ध, टेष्टमा २००० मा जिम्बावे र टि ट्वान्टीमा न्युजिल्यान्डविरुद्ध २००६ मा डेब्यू गरेका थिए ।

गेलले १ सय ३ टेस्ट, ३ सय १ वान डे र ५८ टि ट्वान्टी आइ खेलेका छन् । सन् २०१६ मा वेस्ट इन्डिजलाइ टि ट्वान्टी विश्वकपको उपाधि जित्दा गेल टोलीका प्रमुख सदस्य थिए । गेलले ५८ टवान्टी आइमा १३ अर्ध शतक २ शतक सहित कुल १६ सय २७ रन बनाएका छन् । टि ट्वान्टी आइमा उनको उच्च प्रदर्सन १ सय १७ छ । गेलले २००७ मा दक्षिण अफ्रिकाविरुद्ध १ सय १७ र सन् २०१६ मा इंग्ल्यान्डविरुद्ध टि ट्वान्टी आइमा शतक प्रहार गरेका थिए ।

गेलले २०१३ मा रोयल च्यालेन्चर बेङ्ग्लोरवाट पुने वारियर्स विरुद्ध ६६ बलमा १३ चौका १७ छक्का सहित १ सय ७५ रनमा अविजित रहेका थिए । जुन टि ट्वान्टीमा उच्च ब्यक्तिगत स्कोर हो । जव गेल चल्छन् भने उनले मैदानमा चौका र छक्काको वर्षा गराउने गर्दछन् । उनलाई रोक्न मुश्किल पर्ने गर्दछ । गेलले ३ सय १ एक दिवसियमा २५ शतक र ५४ अर्ध शतकमा कुल १० हजार ४ सय ८० रन बनाएका छन् । गेलले २०१५ को आईसिसि एक दिवसिय विश्वकपमा जिम्बावेविरुद्ध २ सय १५ रनको दोहोरो शतकीय इनिङ खेलेका थिए ।

पोखराले अन्य दुई विदेशी खेलाडीको नाम घोषणा गर्न चाहेन । पोखराले चाडैनै अन्य दुई विदेशी खेलाडीको नाम पनि सार्वजनिक गर्ने जनाएको छ । पोखराबाट दक्षिण अफ्रिकाका पुर्व कप्तान हसिम अमला र जिम्बाबेका अलराउन्डर सिकन्दर राजाले खेल्ने चर्चा छ । पोखरा विकेटकिपर विनोद भण्डारी, सुनिल धमला, रित गौतम, किशोर महतो, बिक्रम शोब, बिपिन खत्री, लोकेश बम लगाएतका खेलाडी छन् । गत वर्ष पोखरा ५ खेलमा ५ मानै पराजित हुँदै पुछारमा रहेर बाहिरिएको थियो ।