काठमाडौं (हाम्रो खेलकुद) – नेपाल, ओमान र अमेरिकाबीच बुधबारदेखि कीर्तिपुर क्रिकेट मैदानमा त्रिकोणात्मक ओडीआई सिरिज हुँदैछ ।

यस सिरिजमा नेपालले इतिहास रच्ने छ । नेपालले हाल सम्म खेलेका ६ ओडीआई विदेशी भुमिमा थिए । नेपालले पछिल्लो पटक गत माघमा यूएइसँग उसकै भुमिमा तीन ओडीआई सिरिज खेलेको थियो । जुन सिरिज नेपालले २-१ ले जितेको थियो । त्यसअघि नेपालले अगष्टमा नेदरल्यान्डसँग दुई खेल खेल्दै वान डे मा डेब्यू गरेको थियो । जुन सिरिज १-१ को बराबरीमा सकिएको थियो । नेपालले दुई ओडीआई सिरिज खेलेको छ । दुवै सिरिज गुमाएको भने छैन । एकवर्ष पछि नेपालले ओडीआई खेल्न लागेको हो ।

ओडीआई मान्यता पाएको झण्डै दुई वर्षपछि नेपालले घरेलु मदानमा पहिलो सिरिज खेल्न लागेको छ । आईसीसी विश्वकप लिग-२ मा नेपालको लक्ष्य पनि शीर्ष दुईमा अन्त्य गर्ने कप्तान ज्ञानेन्द्र मल्ल बताउछन् । नेपालले ओमान र अमेरिकासँग ओडीआईमा पहिलो पटक प्रतिस्पर्धा गर्न लागेको हो ।

त्रिकोणात्मक सिरिजको घोषित टोलीमा अनुभवी खेलाडीमा पारस खड्का, ज्ञानेन्द्र मल्ल, शरद भेषवाकर र विनोद भण्डारी रहेका छन् । यी चार बाहेक अन्य युवा हुन् । पारस र ज्ञानेन्द्रले ओपनिङ गर्दै छन् । तेस्रो नम्बरमा अनुभवी ब्याट्सम्यान शरदको संभावना छ । शीर्षक्रममा अनुभवी खेलाडी रहेपनि मध्यक्रम र तल्लोक्रममा नेपालको ब्याटिङ युवा खेलाडीको प्रर्दशनमा निर्णायक रहने छ ।

दीपेन्द्र सिंह ऐरी, आरिफ शेख, रोहित कुमार पौडेल, कुशल मल्ल र विनोद भण्डारी मध्यक्रम र तल्लोक्रमका ब्याट्सम्यान हुन् । प्रमुख तथा अनुभवी ब्याट्सम्यान शीर्षक्रममा रहँदा मध्यक्रम कमजोर हुने हो की भन्ने चिन्ता पनि त्यतिनै छ ।

तल्लोक्रममा करण केसीबाट आक्रामक ब्याटिङ गर्दै ठूलो इनिङ खेल्न सक्छन् । नेपाली क्रिकेट इतिहासमा बलिङ प्रमुख हतियार मानिन्छ । यस पटक टोलीमा अनुभवी बलर छैनन् । सोमपाल कामी चोट र वसन्त रेग्मी पारिवारीक कारण टोलीमा नहुँदा बलिङ युनिटमा अनुभवी खेलाडीको अभाव देखिएको हो । दबाबमा अनुभवी खेलाडीले आफ्नो अनुभवको फाइदा उठाउन सक्छन् ।

बलिङमा तीब्र गतिका करण केसीसँगै, अभिनाश बोहरा र कमल सिंह ऐरी छन् । स्पिनरमा लेग स्पिनर सन्दीप लामिछाने, ललित नारायण राजवंशी र सुशन भारी छन् । करण पछिल्लो दुई वर्षमा नेपालको नियमित तीब्र गतिको बलरमा सोमपालको जोडी रहँदै आएका छन् । लेग स्पिनर सन्दीप लामिछाने प्रमुख हतियार हुन् । उनको प्रर्दशन अझ महत्वपूर्ण हुने छ । कमल पहिलो पटक सिनियर टोलीमा डेब्यूको आशामा छन् भने अभिनाशसँग एक दिवसिय अन्तर्राष्टिय खेलको खासै अनुभव छैन ।

६ ओडीआई प्रर्दशन हेर्न हो भने युवा खेलाडीको प्रर्दशन सन्तोषजनक छ । ६ ओडीआई खेलमा पारस खड्काले १ शतक र १ अर्ध शतक सहित कुल २ सय ३५ रन बनाएका छन् । सोमपाल कामीले १ सय ४६, ज्ञाानेन्द्र मल्ल १ सय ४३ र दीपेन्द्र सिंह ऐरीले कुल १ सय ८ रन बनाएका छन् । अन्य खेलाडीले कुल रन सय भन्दा कम रहेको छ । युवा ब्याट्सम्यान आरिफ शेख ९४, रोहित कुमार पौडेल ८६ र विनोद भण्डारीको ३५ रनको छ । बलिङतर्फ सन्दीप लामिछानेले १५, सोमपाल कामी १३, पारस खड्का ९, करण केसीले ५ खेलमा ५ विकेट मात्रै लिएका छन् । ललित नारायण राजवंशीले ३ खेलमा विकेट लिन सकेका छैनन् ।

घरेलु मैदान र समर्थकको साथ

घरेलु समर्थकलाई १२ औं खेलाडी भन्ने गरिन्छ । नेपाली क्रिकेटले स्वेदश होस् वा विदेशमा समर्थकबाट राम्रो साथ पाउँदै आएको छ । टीयूमा २० हजार भन्दा बढि दर्शकको आशा गरिएको छ । अर्कोतर्फ सबै खेलाडीलाई टीयूको बारे राम्रोसँग थाहा छ । घरेलु मैदानको फाइदा उठाउँदै नेपाली खेलाडी हाबी हुन सक्छन् ।

स्पिनर प्रमुख हतियार

विश्वकप लिग २ मा नेपालको जित वा हार बढी स्पिनरको प्रर्दशनले भर पर्ने छ । जुन कप्तान ज्ञानेन्द्र पनि स्वीकार गर्दछन् । टियुको पिच स्पिनर उपयोगी मानिन्छ । स्लो पिचको फाइदा उठान सके नेपाललाई धेरै सहज हुने छ । स्पिनर सन्दीप लामिछानेको प्रर्दशन पनि महत्वपूर्ण हुने छ । त्रिकोणात्मक सिरिजमा युवा खेलाडीको उच्च प्रर्दशन विना जित कठिन देखिन्छ ।

नेपालको टोली:

ज्ञानेन्द्र मल्ल (कप्तान), आरिफ शेख, दीपेन्द्र सिंह ऐरी, अभिनास बोहरा, विनोद भण्डारी, करण केसी, ललित नारायण राजवंशी, पारस खड्का, कुशल मल्ल, कमलसिंह ऐरी, रोहित कुमार पौडेल, सुशन भारी, शरद भेषावकर र सन्दीप लामिछाने