एजेन्सी – महमूदुल हसन जोयको शतकसँगै बंगलादेश पहिलो पटक यू१९ विश्वकप फाइनलमा प्रवेश गरेको छ । दक्षिण अफ्रिकामा जारी यू१९ विश्वकपमा बंगलादेशले विहीबार दोस्रो सेमिफाइनलमा न्युजिल्यान्डलाई ६ विकेटले पराजित गर्दै फाइनलमा प्रवेश गरेको हो ।

जितका लागि २ सय १२ रनको विजयी लक्ष्य बंगलादेशले ४४.१ ओभरमा ४ विकेट गुमाउँदै पुरा गर्यो । बंगलादेशको जितमा हसन जोयले १ सय २७ बलमा १३ चौका प्रहार गर्दै एक सय रनको शतकीय इनिङ खेले । शहादत हुसेन ५१ बलमा ४ चौका प्रहार गर्दै ४० रनमा अविजित रहे । तौहीद हिरदोय ४० रनमा आउट भए ।

त्यसअघि टस हारेर ब्याटिङ थालेको न्युजिल्यान्डले निर्धारित ५० ओभरमा ८ विकेट गुमाउँदै २ सय ११ रन बनाएको थियो । न्युजिल्यान्डका बेकहम व्हीलर ग्रीनाल ८३ बलमा ५ चौका र २ छक्का सहित ७५ रनमा अविजित रहे । निकोलस लिडस्टोन ४४, फर्गस लेल्म्यान २४ र ओल्ली वाइट १८ रनमा आउट भए । बंगलादेशको शोरफुल इस्लाम ३, शमीम हुसैन र हसन मुरदले २-२ विकेट लिए ।

यू१९ विश्वकपमा बंगलादेशको यो १२ औं सहभागिता हो । यस अघि बंगलादेश सन् २०१६ मा घरेलु मैदानमा भएको यू१९ विश्वकपमा तेस्रो स्थानमा रहेको थियो । जुन बंगलादेशको यू१९ विश्वकपमा सर्वाधिक ठूलो सफलता रहँदै आएको थियो । भारतले पहिलो सेमिफाइनलमा पाकिस्तानलाई १० विकेट पराजित गर्दै फाइनलमा प्रवेश गरि सकेको छ । अव बंगलादेश र भारत उपाधिको लागि आइतबार प्रतिस्पर्धा गर्ने छन् ।