काठमाडौं (हाम्रो खेलकुद) – नेपालले आईसीसी विश्वकप लिग-२ त्रिकोणात्मक सिरिज अन्तर्गत शनिवार अमेरिकासँग खेल्दै छ । बिहान ९ः३० बाट टीयू क्रिकेट मैदानमा सुरु हुने खेलमा नेपाल र अमेरिकाबीच कडा प्रतिस्पर्धा हुने अनुमान गरिएको छ ।

नेपाल पहिलो खेलमा ओमानसँग १८ रनले पराजित भएको थियो । अमेरिकाले पनि बिहीवार ओमानसँग ६ विकेटको हार बेहोर्न पुग्यो । टीयूको पिचलाई हेर्दा टसले ठूलो प्रभाव पार्ने देखिन्छ । टस जित्ने कप्तानको पहिलो रोजाई बलिङ नै हुने छ ।

ओपनिङ ज्ञानेन्द्र मल्ल र सुवास खकुरेलले गर्ने उच्च सम्भावना छ । ओमानविरुद्ध ५५ रनको अर्ध शतकीय इनिङ खेलेका अनुभवी ब्याट्सम्यान शरद भेषावकर बायाँ हिपको मांशपेशीको दुखाईको कारण बाँकी खेल गुमाउने भएका छन् । शरदको स्थानमा सुवासलाई टोलीमा बोलाईएको हो । नेपालले ओपनिङ बलियो बनाउन पहिलो खेलमा ओमानसँग पारस र ज्ञानेन्द्रलाई मैदान उतारेको थियो । दुभाग्र्य नेपालको खातामा चार रन हुँदा दुबै ओपनर पेभिलिएन फर्के । पारस ३ र ज्ञानेन्द्र १ रनमा आउट हुँदा नेपालले १ सय ९८ रनको लक्ष्य पनि पछ्याउन असफल भयो ।

सुवास र ज्ञानेन्द्रले ओपनिङ गर्दा पारसले तेस्रो नम्बरमा ब्याटिङ गर्ने छन् । जसले नेपालको ब्याटिङ थप मजबुत हुने छ । चोटबाट क्रिकेटमा फर्किएका सुवास पछिल्लो समय लयमा छन् । सुवासले अमेरिकासँग अभ्यास खेलमा ५२ रनको अविजित अर्ध शतकीय इनिङ खेलेका थिए । ओमानसँग ३६ रनमा आउट भएका दीपेन्द्रले चार नम्बरमा ब्याटिङ गर्ने छन् ।

पछिल्लो समय घरेलु क्रिकेटमा निरन्तर राम्रो प्रर्दशन गरि रहेका आरिफ शेख पाँचौ र रोहित कुमार पौडेललाई छैटौं नम्बरमा उतार्ने सम्भावना छ । यी तीनैले आजको खेलमा ठूलो इनिङ खेल्नै पर्ने हुन्छ । मध्यक्रमका यी तीन ब्याट्सम्यानले राम्रो प्रर्दशन गर्न सके नेपालले बलियो योगफल बनाउन र पक्ष्याउन सक्ने छ ।

आरिफ ओमानसँग ६ र रोहित शून्यमा आउट भएका थिए । पहिलो खेलमा शुन्यमा आउट भएपनि टोलीले रोहितलाई निरन्तरता दिन चाहान्छ । एक खेलको प्रर्दशनलाई आधार मानेर निकाल्दा खेलाडीको मनोबलमा ठूलो असर पर्छ । एक खेलमा खराब प्रर्दशन गदैमा बाहिर राख्दा खेलाडीले आफ्नो स्थान टोलीमा सुरक्षित ठान्दैनन् । खेलाडीमा आत्माविश्वास आउदैन । खराब खेले भने अर्को खेलमा पर्दैन की भन्ने मानसिक थपिन्छ । जसले खेलाडीले टोलीको लागि भन्दा पनि आफ्नो लागि खेल्न खोज्छन् ।

लगातार खेलाडी परिवर्तन गर्दा टोली एकतामा कमी आउनुको साथै ब्याटिङ लाइनअप अस्थिर हुन पुग्छ । जसको कारण टोलीको प्रर्दशन कमजोर हुन्छ । त्यसैले आजको खेलमा रोहितलेनै निरन्तरता पाउने सम्भावना छ । रोहितले निरन्तरता पाउदा बायाँ हाते अलराउन्डर कुशल मल्ल आज पनि बेन्चमै बस्ने देखिन्छ । रोहितले आजको खेलमा पनि खराब प्रर्दशन गरे कुशलको लागि बाटो खुल्ने छ ।

ओमानसँग २६ रन जोडेका विकेटकिपर विनोद भण्डारीले पनि निरन्तरता पाउने छन् । विनोदले फिनिसरको भुमिका पाउनेछन् । आठौं नम्बरमा तीब्र गतिका बलिङ अलराउन्डर करण केसीको पक्का छ । ओमानविरुद्ध २७ बलमा ३ चौका र १ छक्का सहित २८ रन जोडेका सन्दीप नवौं नम्बरमा ब्याटिङ गर्ने छन् । १० र ११ नम्बरमा अभिनाश र सुशन भारी रहने छन् ।

तीब्र गतिका बलर करणको स्थान टोलीमा पक्का छ । करणले ओमानसँग ४ विकेट लिएका थिए । उनलाई अभिनाश बोहराले साथ दिने छन् । अभिनाशले ओमानसँग अन्त्यतिर केहि रन खर्चेपनि सुरुमा उत्कृष्ट बलिङ गर्दै लगातार दबाबमा राखेका थिए । अभिनाशले ९ ओभरमा २ मेडन राखेर ३८ रन खर्चेका थिए । त्यसैले तीब्र गतिको बलिङमा करण र अभिनाशको जोडीले निरन्तरता पाउने छ । टीयूको पिच स्पिनर उपयोगी हुँदा तीन तीब्र गतिको बलरको सम्भावना छैन । त्यसैले कमल सिंह ऐरी आजको खेलमा बेन्चमानै बस्ने छन् ।

स्पिनरमा सन्दीप लामिछानेले र सुशन भारीलेनै निरन्तरता पाउने छन् । सुशनले डेब्यू खेलमा ओमानविरुद्ध १० ओभरमा १ मेडन राख्दै १४ रन खर्चेर ३ विकेट लिएका थिए । सन्दीपले १० ओभरमा ४५ रन खर्चेदा विकेट लिएका थिएनन् । पीचको अवस्थालाई हेर्दा २ सय ५० रन भन्दा माथिको योगफल शुरक्षित देखिन्छ ।

सम्भावित प्लेइङ ११ :

ज्ञानेन्द्र मल्ल (कप्तान), आरिफ शेख, दीपेन्द्र सिंह ऐरी, अभिनाश बोहरा, विनोद भण्डारी (विकेटकिपर), करण केसी, पारस खड्का, रोहित कुमार पौडेल, सुशन भारी, सुवास खकुरेल र सन्दीप लामिछाने

सम्भावित बेन्च :

कुशल मल्ल, ललित नारायण राजवंशी र कमल सिंह ऐरी