भुपेन्द्र जिसी, काठमाडौं

आईसीसी विश्वकप लिग २ त्रिकोणात्मक सिरिज अन्तर्गत तेस्रो खेलमा नेपाल आइतबार ओमानसँग ८ विकेटले पराजित हुन पुगेको छ ।

नेपालले प्रस्तुत गरेको २ सय ५० रनको लक्ष्य ओमानले ४७.२ ओभरमा २ विकेट गुमाउँदै पुरा गर्यो । जुन नेपालले ओडीआईमा विपक्षीलाई दिएको सर्वाधिक ठूलो लक्ष्य थियो । टस जितेर पहिला फिल्डिङ गर्ने ओमानका कप्तान जिशान मकसुदको निर्णयलाई नेपाली ब्याट्सम्यानले एक समय गलत सावित गर्दै बलियो योगफलमा पुर्याएका थिए । तर ओमानले उक्त लक्ष्य सहजै पुरा गर्यो । नेपालले ओमानसँग हार्नुको प्रमुख चार कारण यस प्रकार छन् ।

४. सुस्त सुरुवात

ठूलो लक्ष्यका लागि राम्रो सुरुवातको आवश्यक पर्छ । टस हारेर ब्याटिङ थालेको नेपालले ओमानलाई बलियो लक्ष्य प्रस्तुत गरेपनि सुरुवात निकै सुस्त थियो । सुरुवात अझ राम्रो गरेको भए विशाल लक्ष्य दिन सक्थ्यो । ब्याटिङलाई सहयोग पुग्ने पिचमा नेपालले सुरुवाती २० ओभरमा १ विकेट गुमाउँदै मात्रै ८१ रन बनाएको थियो । सुरुवाती १ सय २० बल मध्य नेपालले ७६ बल डटको सामना गरेको थियो ।

७६ डट बल मध्य नेपालले मात्रै ३० बलमा सिंगल रन जोडेको भए सुरुवाती २० ओभरमा १ सय १० रन भन्दा माथि रन बनाउँदै ओमानका खेलाडीलाई दबाबमा राख्दै विशाल योगफल बनाउन सक्थ्यो । नेपालले अन्तिम ३० ओभरमा १ सय ६८ रन जोडेको थियो । ब्याटिङलाई सहयोग पुग्ने पिचमा सुरुवाती समय अझ धेरै रन जोड्न सकेको भए ठूलो योगफल बनाउदै विपक्ष्यलाई दबाबमा राख्न सक्थ्यो र नतिजा नेपालको पक्षमा आउन सक्थ्यो ।

३. अकीब र जिशानको शतकीय साझेदारी

ओमानलाई सहज जित दिलाउन तेस्रो विकेटका लागि अकीब इलियास र जिशान मकसुदले १ सय ६७ रनको अविजित शतकीय साझेदारी गरे । जुन साझेदारीको कारण ओमानले सहजै लक्ष्य पुरा गर्यो । उक्त साझेदारी नेपालले एक सय रन भन्दा अघिनै तोड्न सेकेको भए नयाँ ब्याट्सम्यानलाई खेल्न दबाब हुने थियो । दबाबमा आउँदै खराब सट खेल्दा लगातार विकेट पतन हुने सम्भावना रहन्थ्यो । जसले नतिजा नेपालको पक्ष्यमा आउन सक्थ्यो । तर नेपाली बलर यी दुई ब्याट्सम्यान सामु निरिह बने । जसको कारण नेपाल पराजित हुन पुग्यो ।

२. अकीबको क्याच छुट्नु

हारको अर्को कारण आरिफ शेखले शतकीय इनिङ खेलेका अकीबलाई जीवनदान दिएका थिए । ओमानको जितमा अकीब इलियास १ सय ८ बलमा १२ चौका र १ छक्का सहित १ सय ९ रनमा अविजित रहँदै जित पक्का गरे । शतक प्रहार गर्नुअघि उनले ठूलो जीवनदान पाएका थिए । करण केसीको २५ औं ओभरको पाँचौ बलमा सट खेल्नेक्रममा प्वाइन्टमा रहेका आरिफ शेखले अकीबको सहज क्याच छोडेका थिए । जुन समय उनी व्यक्तिगत ३७ रनमा थिए । उक्त क्याच लिन सकेको भए नतिजा नेपालको पक्षमा आउन सक्थ्यो ।

१. खराब बलिङ

ओमानसँग हारको मुख्य कारणनै बलरको खराब प्रर्दशन हो । नेपालको जितको मुख्य आधार बलिङनै हो । बलिङनै खराब गरेपछि रनको पहाडनै बनाएपनि जित निकाल्न कठिन पर्छ । नेपालले आज ७ बलर प्रयोग गरेको थियो । जसमा कुशल मल्ल र सुशन भारीले मात्र १-१ विकेट लिए । प्रमुख स्पिनर सन्दीप लामिछानेले १० ओभरमा ६५ रन खर्चेपनि विकेट लिन सकेनन् ।

करणले ९ ओभरमा ४४ रन खर्चिए । डेब्यू गरेका बलर कमल सिंह ऐरीले ४ ओभरमा २९ रन खर्चिए । सुशनले ७.२ ओभरमा ४१ रन खर्चेका थिए । कुनै पनि बलरले राम्रो प्रर्दशन गर्न सकेनन् । जसको कारण नेपाल पराजित हुन पुग्यो ।