काठमाडौं (हाम्रो खेलकुद) – आईसीसी विश्वकप लिग २ त्रिकोणात्मक सिरिज अन्तर्गत तेस्रो खेलमा नेपाल आइतबार ओमानसँग ८ विकेटले पराजित हुन पुग्यो । जारी त्रिकोणात्मक सिरिजको पहिलो खेलमा पनि नेपाल ओमानसँग १८ रनले पराजित भएको थियो ।

नेपालले प्रस्तुत गरेको २ सय ५० रनको लक्ष्य ओमानले ४७.२ ओभरमा २ विकेटको क्षतिमा पुरा गर्यो । जुन नेपालले ओडीआईमा विपक्षीलाई दिएको सर्वाधिक ठूलो लक्ष्य हो । बलियो योगफल बनाएपनि कमजोर बलिङको कारण नेपाल पराजित हुन पुग्यो । जसक्रममा केहि कीर्तिमान बन्न पुगेका छन् । हारसँगै नेपालको नाममा सकारात्मक भन्दा नकारात्मक कीर्तिमान बढी बनेका छन् ।

४. ओडीआईमा नेपालविरुद्ध ठूलो साझेदारी

ओमानलाई सहज जित दिलाउन तेस्रो विकेटका लागि अकीब इलियास र कप्तान जिशान मकसुदले १ सय ६७ रनको अविजित शतकीय साझेदारी गरेका थिए । जुन साझेदारीको कारण ओमानले सहजै लक्ष्य पुरा गर्यो । उक्त साझेदारी नेपालविरुद्ध ओडीआईमा विपक्षी टोलीले बनाएको उच्च हो । त्यस्तै ओमानले ओडीआईमा गरेको कुनै पनि विकेटका लागि उच्च साझेदारी पनि बन्न पुगेको छ ।

३. ओडीआईमा नेपालविरुद्ध शतक प्रहार गर्ने अकीब पहिलो खेलाडी

ओमानको जितमा अकीब इलियास १ सय ८ बलमा १२ चौका र १ छक्का सहित १ सय ९ रनमा अविजित रहँदै जित पक्का गरे । नेपालले ओडीआई मान्यता पाएको २ वर्ष पुग्न लाग्दा ९ खेल खेलेको छ । जसक्रममा नेपालविरुद्ध शतक प्रहार गर्ने अकीब पहिलो ब्याट्सम्यान हुन् । यस अघि गतवर्ष यूएईसँगको तेस्रो खेलमा शैमान अनवारले ७० बलमा ९ चौका र २ छक्का सहित ८७ रनको इनिङ खेलेका थिए । जुन नेपालविरुद्ध ओडीआईमा विपक्षीले प्रहार गरेको उच्च रन थियो ।

२. विकेटका हिसाबमा ठूलो हार

ओमानसँगको ८ विकेटको हार ओडीआईमा विकेटका हिसाबमा नेपालले बेहोरेको सर्वाधिक ठूलो हारमा पर्दछ । नेपालले ओडीआईमा ९ खेल मध्य ५ खेल हारेको छ । जसमा विकेटका हिसाबमा यो ठूलो हार हो । नेपाल नेदरल्यान्डसँग पहिलो खेलमा ५५ रन, यूएईसँग एसिया कपमा ७८ रन, यूएईसँगको तीन सिरिज अन्तर्गत पहिलो खेलमा ३ विकेटले पराजित भएको थियो । त्यस्तै त्रिकोणात्मक सिरिजमा नेपाल बुधबार ओमानसँग १८ रनले पराजित हुन पुगेको थियो ।

१.सर्वाधिक ठूलो लक्ष्य

आइतबार बिहान टीयू मैदानमा टस हारेर ब्याटिङको निम्तो पाएको नेपालले निर्धारित ५० ओभरमा ८ विकेट गुमाउँदै २ सय ४९ रन बनाएको थियो । जुन नेपालले ओडीआईमा विपक्षलाई दिएको सर्वाधिक ठूलो लक्ष्य हो । नेपालले गतवर्ष यूएईलाई दोस्रो खेलमा २ सय ४३ रनको लक्ष्य दिएको थियो । जसक्रममा यूएई लक्ष्य पक्ष्याउने क्रममा ९७ रनमा अल आउट भएपछि नेपाल १ सय ४५ रनको फराकिलो जित हात पारेको थियो ।

सम्रगमा नेपालको यो उच्च दोस्रो ठूलो योगफल हो । यसअघि नेपालले यूएईविरुद्ध तेस्रो खेलमा नेपालले २ सय ५५ रनको लक्ष्य पुरा गर्दै ऐतिहासिक ओडीआई सिरिज जितेको थियो ।

यो पनि पढ्नुहोस : नेपालले ओमानसँग हार्नुका प्रमुख चार कारण