भूपेन्द्र जिसी, काठमाडौं

चौथो संस्करणको एभरेष्ट प्रिमियर लिग (इपिएल) को लागि सबै टोलीले आफ्नो तयारी थालि सकेका छन् । धेरै टोलीले आफ्ना प्रमुख विदेशी खेलाडीको नाम सार्वजनिक गरि सकेका छन् । केहि सार्वजनिक गर्ने तरखरमा छन् ।

चैत १ देखि १५ सम्म टीयू क्रिकेट मैदानमा हुने इपिएल अहिले सम्मकै उत्कृष्ट हुने अनुमान गरिएको छ । क्रिस गेलसँगै, हसिम अमला, पल स्टर्लिङ, ड्वेन स्मिथ, मोहम्मद शाहजाद, केभीन ओ ब्रायन, उपुल थरंगा जस्ता स्टार खेलाडी इपिएल खेल्न आउदै छन् । युवा र नेपाली खेलाडीलाई ती स्टार खेलाडीबाट सिक्ने ठूलो अवसर हुने छ । उत्कृष्ट प्रर्दशन गर्न सके सिनियर टोली सम्म पुग्न सहज हुन्छ ।

केहि युवा खेलाडी आफ्नो क्षमता देखाउन इपिएलको पर्खाइमा छन् । ती खेलाडीको लागि इपिएल अझ महत्वपूर्ण हुने छ । केहि युवा खेलाडीले इपिएलमा डेब्यू गर्दै उत्कृष्ट प्रर्दशन गर्न सक्ने अनुमान गरिएको छ । आगमी इपिएलमा यी पाँच युवा खेलाडीले जसले डेब्यु गर्दै राम्रो प्रर्दशन गर्न सक्छन् ।

अनिल खरेल (स्पिनर)

पारस खड्का कप्तान रहेको विराटनगर वारियर्सले स्पिनर अनिल खरेललाई १ लाख २७ हजार रुपैयाँ खर्चेर अनुबन्ध गरेको छ । खरेल पोखरा प्रिमियर लिगमा एक्स्पर्ट धनगढी ब्लुबाट ४ खेलमा ८ विकेट लिदै उदयमान खेलाडी चुनिएका थिए । खरेलले त्यस अघि धनगढी प्रिमियर लिगमा रुपन्देही च्यालेन्जर्सबाट गत वर्ष खेलि सकेका छन् ।

पछिल्लो समय राम्रो लयमा रहेका खरेलको इपिएलमा डेब्यूको संभावना बलियो देखिन्छ । विराटनगरमा अनिलसँगै बिक्रम भुषाल र वसन्त रेग्मी स्पिनरको रुपमा छन् । टीयूको पिचमा कम्तिमा दुई स्पिनर विराटनगरले मैदान उतार्ने छ । दुई स्पिनरमा वसन्त र अनिलको नाम अघि देखिन्छ । विराटनगरको समग्र टोली हेर्दा अनिलको डेब्यूको सम्भावना बलियो छ । अनिलले डेब्यू गर्दै इपिएलमा राम्रो प्रर्दशन गर्न सक्छन्

शेर मल्ल (अलराउन्डर)

यू१९ का अलराउन्डर शेर मल्ललाई इपिएलमा काठमाडौं किंग्स ११ ले टोलीमा अनुबन्ध गरेको छ । काठमाडौंले शेरलाई ८६ हजार रुपैयाँमा खर्चेर टोलीमा भित्र्याको थियो । शेरको इपिएलमा डेब्यूको सम्भावना छ । शेरले पछिल्लो समय उत्कृष्ट प्रर्दशन गर्दै आएका छन् । टीयुको पिच स्पिनर उपयोगि हुँदा काठमाडौं कम्तिमा प्रमुख २ स्पिनरका साथ मैदान उत्रने छ । तल्लोक्रममा शेरले ब्याटिङ पनि गर्दछन् । काठमाडौंमा स्पिनरको रुपमा शेरसँगै, लेग स्पिनर सन्दीप लामिछाने र दिपेन्द्र रावत छन् । दीपेन्द्रले गत वर्ष डिपिएलमा राम्रो प्रर्दशन गरेका थिए । त्यस यता उनी खासै घरेलु ठूला प्रतियोगिता खेलेका छैनन् । यता शेरले यू१९ र घरेलु लिगमा निरन्तर राम्रो प्रर्दशन गरि रहेका छन् । जसको कारण शेर सम्भावना बलियो छ ।

शेरले अघिल्लो महिना एमएम कपमा मलेसिया-११ लाई ४९ ओभरमा अल आउट गर्न शेरले १० ओभरमा ३ मेडन सहित ११ रन खर्चेर ५ विकेट लिएका थिए । उनले अमेरिकाविरुद्ध अभ्यास खेलमा अघिल्लो हप्ता मुलपानी क्रिकेट मैदानमा नेपाल ‘ए’ बाट ७.२ ओभरमा १ मेडन सहित १३ रन खर्चेर ४ विकेट लिदै जित पक्का गरेका थिए । इस्टर्न रिजनको लागि सिनियर टोलीको बन्द प्रशिक्षणमा परेपनि अन्तिम १४ मा स्थान बनाउन सकेनन् ।

विकास आग्री (बलर)

सुदूरपश्चिम प्रदेशका युवा तीब्र गतिका बलर विकास आग्रीको पनि डेब्यूको संभावना रहन्छ । शरद भेषवाकर कप्तान रहेको भैरहवा ग्याडियटर्सले आग्रीलाई न्यूनतम मूल्य ५१ हजारमा अनुबन्ध गरेको थियो । भैरहवामा तीब्र गतिका बलरको रुपमा अभिनाश बोहरासँगै आग्री र कृष्ण कार्की छन् । आग्रीले पिएम कपमा प्रदेश ३ विरुद्ध दोस्रो संस्करणमा ५.३ ओभरमा २८ रन खर्चेर ३ विकेट लिएका थिए ।

भारतबाट क्रिकेट खेलेर हुर्किएका आग्रीले पछिल्लो समय घरेलु क्रिकेट राम्रो प्रर्दशन गर्दै आएका छन् । पहिलो संस्करणको कर्णाली प्रिमियर लिगमा उत्कृष्ट प्रर्दशन गरेका आग्रीले सुनसरीमा भएको नाइट इनरुवा टि ट्वान्टी कपमा एपिएफबाट उत्कृष्ट प्रर्दशन गरेका थिए ।

खडक बोहरा (ब्याट्सम्यान)

सुदूरपश्चिम प्रदेशका युवा ब्याट्सम्यान खडक बहादुर बोहरा यस पटकको इपिएल चितवन टाइगर्समा अनुबन्ध भएका छन् । खडकले पछिल्लो समय यू१९ र घरेलु प्रतियोगितामा राम्रो प्रर्दशन गर्दै आएका थिए । गत असारमा मलेसियामा भएको एसीसी यू१९ इस्टर्न रिजन क्रिकेट प्रतियोगितामा सिंगापुरविरुद्ध ९० बलमा १२ चौका सहित ९० रनको इनिङ खेलेका थिए ।

त्यस्तै खडक गत पिएमकपमा सुदूरपश्चिम प्रदेशबाट ४ खेलमा १ सय २१ रन जोड्दै उदयमान खेलाडी घोषित भएका थिए । चितवनको ओपनिङमा आयरल्यान्डका पल स्टर्लिङ र अफगानिस्तानका मोहम्मद शहजादले गर्ने छन् । तेस्रो स्थानमा खडकको संभावना छ । उसको मध्यक्रममा भिम सार्की, आदिल खान जस्ता ब्याट्सम्यान छन् । यसै पटक चितवनले मध्यक्रमका भरपर्दा ब्याट्सम्यान दीपेन्द्र सिंह ऐरी र पृथु बास्कोटलाई बेचेको छ । जसको कारण पनि खडकको सम्भावना देखिन्छ ।

रित गौतम (ब्याट्सम्यान)

यू१९ का कप्तान रित गौतमलाई पोखरा राइनोजले टोलीमा भित्र्याउन १ लाख २० हजार रुपैंयामा खर्चेको थियो । ओपनर ब्याट्सम्यान रितको टोलीमा बलियो सम्भावना छ । पोखरामा वेस्ट इन्डिजका विश्फोटक ब्याट्सम्यान क्रिस गेल अनुबन्ध भएका छन् । पोखराबाटै हसिम अमलाले पनि खेल्ने चर्चा छ । तर आधिकारीक निर्णय आएको छैन । तल्लोक्रममा विनोद भण्डारी, लोकेश बहादुर बम तल्लोक्रममा छन् । मध्यक्रममा रित गौतम र पृथु बास्कोटा छन् । पृथुले पछिल्लो समय घरेलु क्रिकेटमा साखै राम्रो प्रर्दशन गर्न सकेका छैनन् । उता रितले निरन्तर रन बनाउदै आएका छन् ।

क्रिस गेलले सुरुवाती दुई खेल मात्र खेल्ने हुँदा रितले त्यसपछि ओपनिङ गर्न सक्छन् । सुनिल धमला पनि रहेको हुँदा यस पटक रित मध्यक्रमबाट खेल्ने सम्भावना देखिन्छ । सुनिलको खराब प्रर्दशन रहँदा ओपनिङमा पोखराको नजर रित माथि रहने छ । सुरुवाती खेलमा उनी बेन्चमानै बसेपनि कुनै ब्याट्सम्यानले खराब प्रर्दशन गरे त्यसको विकल्प रित हुने देखिन्छ । रित उमेर समुहमा दुई शतक प्रहार गर्ने एक्लो नेपाली ब्याट्सम्यानमा पनि हुन् । यू१९ मा रितको लय र पोखराको हालसम्मको टोली हेर्दा डेब्यूको सम्भावना देखिन्छ ।