काठमाडौं (हाम्रो खेलकुद) – थाईल्याण्डमा यसै साता देखी सुरु हुने एसीसी इस्टर्न रिजन टि ट्वान्टी क्रिकेट प्रतियोगितामा सहभागिता जनाउने राष्ट्रिय क्रिकेट टोलीलाई नेपाल क्रिकेट संघ (क्यान) ले बिदाई गरेको छ ।

बुधबार काठमाडौंमा एक कार्यक्रमकाबीच क्यानका सचिव अशोकनाथ प्याकुरेल, कोषाध्यक्ष रोशन सिंह, राष्ट्रिय खेलकुद परिषद् (राखेप) का सदस्य सचिव रमेश कुमार सिलवाल लगायतले खेलाडीलाई बिदाई गरे । इस्टर्न रिजनको घोषणा टोलीमा राम्रो लयमा हुनुको साथै प्रर्दशन गरि रहेका अनुभवी ब्याट्सम्यान शरद भेषवाकर, स्पिनर वसन्त रेग्मी र युवा स्पिनर ललित नारायण राजवंशी टोलीमा छैनन् । यसै विषयलाई लिएर गरिएको प्रश्नमा कप्तान ज्ञानेन्द्र मल्लले भने, ‘उनीहरु टि ट्वान्टी टोलीमा अगाडी देखिनै थिएनन् । हामीले अब नयाँलाई पनि मौका दिनुपर्छ । खास गरेर फिटनेशको कुरा आउने पनि हुँदा अझ युवा खेलाडी उपयुक्त हुन्छ की भनेर अघि बढाएको हो ।’

‘नेपालको एक दिवसिय खेलमा उनीहरु प्रमुख खेलाडी हुन् । टि ट्वान्टीमा हामीले परिवर्तन पनि गर्नुपर्छ’, त्यसैमा उनले थपे, ‘युवा खेलाडीमा नेपाललाई जिताउने क्षमता छ । नयाँलाई पनि मौका दिनुपर्छ । सन् २०२२ सम्म हामी तयार पनि हुनुपर्छ’।

त्यस्तै ज्ञानेन्द्रले तयारी राम्रो भएको र नेपालले उपाधि जित्दै एसिया कप टि ट्वान्टी क्वालिफयारमा स्थान बनाउने बताए । ‘हामीलाई टि ट्वान्टी मोडमा आउनु थियो । सबै खेलाडी फिट र तयार छन् । त्यहाँ गएर राम्रो क्रिकेट खेल्दै उपाधि जित्ने हो । क्वालिफयार हुँदै एसिया कप खेल्ने लक्ष्य छ ।’

‘टि२० मा विपक्षीलाई कहिले पनि कमजोर हाक्नु हुँदैन । हामीले अघिल्लो पटक पनि ठूलो मौका गुमाएका छौं । अहिले वेस्टर्न रिजनमा ओमानको पनि उदाहरण हेरे हुन्छ ।’

बाँया हाते ब्याट्सम्यान कुशल मल्लले पनि ओपनिङ गर्न सक्ने सम्भावना रहेको ज्ञानेन्द्रले बताए, ‘शीर्ष तीनमा पनि पारस, म र कुशल नै हौं । अब कसले कहाँ खेल्ने त्यहाँ पुगेर टुंगो लाग्नेछ ।’

त्यस्तै विश्वभर फैलि रहेको कोरोनो भाईरस बारे नेपाली टोली सतर्क रहेको बताए । ‘हाम्रो फिजियोले पनि हेर्नु भएको छ । कोरोनोको त्यस्तै कुनै गाह्रो छैन । हाम्रो ध्यान खेलमा हुनपर्छ । ग्राउण्ड र होटलमा कोरोनाको जोखिम छैन भन्ने सुनेका छौं’ ,उनले भने ।