एजेन्सी – युवा ब्याट्सम्यान कुशल मेन्डिस र अविष्का फर्नान्डोको उत्कृष्ट शतकमा वेस्ट इन्डिजसँगको दोस्रो एकदिवसिय खेलमा घरेलु टोली श्रीलंका १ सय ६१ रनको विशाल अन्तरले विजयी भएको छ ।
बुधबार राती ३ सय ४६ रनको विशाल लक्ष्य पक्ष्याएको वेस्ट इन्डिज ३९.१ ओभरमा १ सय ८४ रनमा अल आउट हुँदै फराकिलो हार बेहोरेको हो । वेस्ट इन्डिजका ओपनर शाई होपले ६५ बलमा ५ चौका सहित सर्वाधिक ५१ रनको योगदान दिए । सुनिल एम्ब्रिस १७, डरेन ब्राभो १६, निकोलस पुरन ३१, रोस्टन चेश २० र किमो पल २१ रनमा आउट भए । श्रीलंका वानिन्दु हसरंगा र लक्सान सन्दकनले समान ३ विकेट लिए । नुवान प्रदीप २ र एज्जिलो म्याथुजको नाममा १ विकेट रह्यो ।
त्यसअघि टस हारेर ब्याटिङको निम्तो पाएको श्रीलंकाले निर्धारित ५० ओभरमा ८ विकेट गुमाउँदै ३ सय ४५ रन बनाएको थियो । ओपनर अविष्का फर्नान्डोले १ सय २३ बलमा १० चौका सहित १ सय २७ रनको शतकीय इनिङ खेले । त्यस्तै कुशल मेन्डिसले १ सय १९ बलमा १२ चौका सहित १ सय १९ रनमा क्याच आउट भए । खराब सुरुवात गरेको श्रीलंकालाई कुशल र अविष्काले तेस्रो विकेटका लागि २ सय ३९ रनको साझेदारी गर्दै विशाल योगफलमा पुर्याए । थिसारा परेरा ३६ रनमा आउट भए ।
वेस्ट इन्डिजका शेल्डन कटरेलले १० ओभरमा ६७ रन खर्चेर ४ विकेट लिए । त्यस्तै अल्जारी जोशेफको नाममा ३ विकेट रह्यो । योसँगै तीन ओडीआई सिरिज घरेलु टोली श्रीलंकाले एक खेल अगावै २-० ले सिरिज जितेको छ । तेस्रो तथा अन्तिम ओडीआई खेल आइतबार हुने छ । श्रीलंका र वेस्ट इन्डिजबीच दुई टि ट्वान्टी खेल पनि हुने छ ।
