काठमाडौं (हाम्रो खेलकुद) –  थाइल्यान्डमा शनिबार सुरु हुने एसीसी इस्टर्न रिजन टि ट्वान्टी क्रिकेट प्रतियोगितामा नेपाललाई उपाधिको प्रमुख दाबेदार टोलीको रुपमा लिइएको छ ।

प्रतियोगितामा नेपाल सहित आयोजक थाईल्यान्ड, हङकङ, मलेसिया र सिंगापुर छन् । लिग चरणपछि शीर्ष दुई टोली आगमी अगष्टमा मलेसियामा हुने एसीसी टि ट्वान्टी कप छनोटमा पुग्ने छन् । नेपाली राष्ट्रिय क्रिकेट टोली पनि उपाधि जित्ने लक्ष्य सहित थाईल्यान्ड पुगेको छ । नेपालले इस्टर्न रिजनको उपाधि जित्न सक्ने प्रमुख तीन आधार यस प्रकार छन् ।

३. तुलानात्मक रुपमा कमजोर विपक्ष

तुलानात्मक रुपमा नेपाल भन्दा सिंगापुर, हङकङ, मलेसिया र थाइल्यान्ड कमजोर टोली हुन् । सिंगापुरसँग नेपालले गत जुलाईमा एसिया विश्वकप टि ट्वान्टी छनोटमा अप्रत्याशित ८२ रनको हार बेहोर्दै बाहिरिएको थियो । तर सेप्टेम्बरमा त्रिकोणात्मक सिरिजमा नेपालले सिंगापुरलाई ९ विकेटले पराजित गरेको थियो । जसक्रममा पारस खड्काले १ सय ६ रनको शतकीय अविजित इनिङ खेलेका थिए ।

पछिल्लो समय प्रमुख दुई ब्याट्सम्यान बाबर हायत र अंशुमन रथ टोलीमा नहुँदा हङकङको  प्रर्दशन कमज़ोर रहँदै आएको छ । मलेसियाले पाँच टि ट्वान्टी सिरिजमा हङकङमाथि क्लिनस्विप गरेको थियो । मलेसियामाथि भने नेपाल निरन्तर हाबी हुँदै आएको छ । आयोजक थाइल्यान्ड  कमजोर रहेको हुँदा जितसँगै कीर्तिमानको अवसर रहने छ । जसले गर्दा नेपालको मनोबल पनि उच्च छ ।

२. सन्तुलित ब्याटिङका साथै गहिराई

नेपालको ब्याटिङ लाइनअप सन्तुलित हुनुको साथै गहिराई पनि छ । ओपनिङमा पारसलाई कुशल मल्ल र ज्ञानेन्द्र मध्य एकले साथ दिने छन् । मध्यक्रममा दीपेन्द्र सिंह ऐरी, आरिफ शेख, विनोद भण्डारी, सन्दीप जोरा र पवन सरार्फ छन् । तल्लोक्रममा करण केसी, भुवन कार्की र किशोर महतोले पनि राम्रो ब्याटिङ गर्ने गर्दछन् ।

अर्कोतर्फ कुशल, सन्दीप जोरा, विनोद भण्डारी र करणले आक्रामक इनिङ गर्दै एकै ओभरमा खेललाई मोड्न सक्छन् । एक जना आउट हुँदा अर्कोले विजयी इनिङ खेल्न सक्ने क्षमता देखिन्छ । जसले नेपालले उपाधि जित्ने सक्ने बलियो सम्भावना छ ।

१.बलियो स्पिन अट्याक

नेपालको स्पिन बलिङ सधैं प्रमुख हतियारको रुपमा रहने गर्दछ । यस पटक पनि स्पिन बलिङ अट्याक हुनुको साथै विकल्प धेरै छ । सन्दीप लामिछाने, सुशन भारी र भुवन कार्की प्रमुख स्पिनर हुन् । कुशल , पवन , दीपेन्द्र र पारस  पार्ट टाइम स्पिनरका रुपमा रहने छन् ।

अन्तर्राष्ट्रिय फ्रेन्चाइज लिगमा निरन्तर खेल्दै राम्रो प्रर्दशन गरि रहेका स्पिनर सन्दीप प्रमुख हतियार हुन् । आईसीसी विश्वकप लिग २ मा अमेरिकालाई ३५ रनमा अल आउट गर्न सन्दीपले ६ ओभरमा १ मेडन सहित १६ रन खर्चेर ६ विकेट लिएका थिए ।

सन्दीपले पहिलो पावर प्लेमै नयाँ बलले बलिङ गर्ने सम्भावना छ । अर्कोतर्फ बायाँ हाते स्पिनर सुशन भारी पनि उत्कृष्ट लयमा छन् । सुशनले विश्वकप लिग २ मा ओडीआई डेब्यू गर्दै ४ खेलमा ११ विकेट लिएका थिए ।

सुशनको उत्कृष्ट लयले नेपालको उपाधि यात्रा अझ सहज बनाउन सक्छ । यता तीन वर्षपछि सिनियर टोलीमा पुनरागमन गरेका अर्का बायाँ हाते स्पिनर भुवन कार्कीले पनि फ्रेन्चाइज लिगमा उत्कृष्ट प्रर्दशन गर्दै आएका छन् ।

भुवन इस्टर्न रिजनमा उत्कृष्ट प्रर्दशन गर्दै टोलीमा नियमीत स्थान बनाउन चाहान्छन् । यी तीनलाई छाड्दा कुशलले पुरै ओभर बलिङ गर्ने सम्भावना छ । स्पिन अट्याक बलियो हुँदा नेपाललाई उपाधि जित्न सहज हुन सक्ने अनुमान गरिएको छ ।