काठमाडौं (हाम्रो खेलकुद) – नेपालले एसीसी इस्टर्न रिजन टि ट्वान्टी क्रिकेट प्रतियोगितामा लगातार दोस्रो हार बेहोरेको छ । पहिलो खेलमा शनिबार मलेसियासँग २२ रनले पराजित भएको नेपाल दोस्रो खेलमा आईतबार हङकङसँग ४३ रनले पराजित हुँदै एसिया कप छनोटको पहिलो चरणबाटै बाहिरिने संघारमा छ ।

टस हारेर ब्याटिङ थालेको हङकङले निर्धारित २० ओभरमा ६ विकेट गुमाउँदै १ सय ५४ रन बनाएको थियो । जवाफी १ सय ५५ रनको विजयी लक्ष्य पक्ष्याएको नेपाल १८.१ ओभरमा १ सय ११ रनमा अल आउट हुन पुग्यो । लगातार दोस्रो हारसँगै प्रतियोगिता अघि उपाधिको प्रमुख दाबेदारको रुपमा हेरिएको नेपाल इस्टर्न रिजनबाटै बाहिरने संघारमा पुगेको छ ।

नेपालको अव एसिया कप छनोटमा पुग्ने झिनो अंक गणितीय सम्भावना मात्रै बाँकी छ । नेपालले थाईल्यान्ड र सिंगापुरलाई फराकिलो अन्तरले पराजित गरेर मात्रै पुग्दैन अन्य टोलीको नतिजा पनि आफु अनुकुल नाटकीय रुपमा आउनुपर्छ । अन्यथा उपाधि जित्दै एसिया छनोटमा पुग्ने सपना सपनामै सिमित हुने छ । नेपालले हङकङसँग हार्नुको प्रमुख तीन कारण यस प्रकार छन् ।

३. सुरुवाती कमजोर बलिङ

टस जितेर फिल्डिङ गर्ने निर्णय लिएको नेपालको सुरुवाती बलिङ राम्रो हुन सकेन । हङकङका ओपनर शाहिद वासिफ र निजाकत खानले ७.५ ओभरमा ५८ रनको साझेदारी राम्रो बलियो योगफलको आधार तय गरे । पावर प्लेमा विकेट नगुम्दा मध्यक्रम र तल्लोक्रमका ब्याट्सम्यानलाई सहज बन्यो । सुरुवाती पावर प्लेमै विकेट लिन सकेको भए हङकङमाथि दबाब बढ्थ्यो । जसले थप विकेटको सम्भावना रहन्थ्यो र नेपाल खेलमा हाबी हुनसक्थ्यो । अर्कोतर्फ प्रमुख बलर करण केसिले ३ ओभरमा ३३ रन खर्चिदा कुनै विकेट लिन सकेनन् ।

२. कमजोर मध्यक्रम

नेपालको ब्याटिङमा सधैं ओपनिङमाथि प्रश्न उठ्ने गर्दछ । हङकङसँग कुशल र ज्ञानेन्द्रले पहिलो विकेटका लागि ४.२ ओभरमा ४२ रनको साझेदारी गर्दै राम्रो सुरुवात दिलाएपनि अन्य ब्याट्सम्यानले जिम्मेवारी इनिङ खेल्न सकेनन् । पारस खड्का सहित विकेटकिपर विनोद भण्डारी, पवन सरार्फ, दीपेन्द्र सिंह ऐरी र आरिफ शेखको कुल २५ रन बनाए । एकै ब्याट्सम्यानले बनाउनु पर्ने रन प्रमुख ५ ब्याट्सम्यानले बनाएपछि त्यो जितको लागि प्राप्त हुँदैन र आशा पनि गर्न सकिदैन । मध्यक्रमका ब्याट्सम्यानले राम्रो प्रर्दशन गर्न सकेको भए नेपालले सहज जित हात पार्न सक्थ्यो ।

१. गैरजिम्मेवार ब्याटिङ

नेपालले हार्नुको मुख्य कारणनै ब्याट्सम्यानको गैर जिम्मेवारी ब्याटिङ र खराब सट छनोट हो । ओपनर कुशल र ज्ञानेन्द्रले नेपाललाई आक्रामक सुरुवात दिलाएका थिए । जुन लयलाई निरन्तरता अन्य ब्याट्सम्यानले दिएको भए जित सहज देखिएको थियो । स्कोरबोर्डमा रन जोड्न सहि सट छनोट र जिम्मेवारी इनिङ खेल्नुपर्छ । तर नेपालका सबै ब्याट्सम्यानले खराब सट प्रहार गर्नुका साथै जिम्मेवारी लिएर ब्याटिङ गर्न सकेनन् । पारस खड्का स्क्वायर लेगमा सट खेल्नेक्रममा ४ रनमा एलबिडब्लू आउट भए । मलेसियासँग ९ रनमा आउट भएका पारसले हङकङविरुद्ध पनि जिम्मेवारी ब्याटिङ गर्न सकेनन् ।

दीपेन्द्र सिंह ऐरी आफु कुन सट खेल्ने भन्नेमै प्रष्ट नहुँदा हाबा ब्याट चलाउँदै एज लागेर विकेटकिपर स्कर्ट स्टेपनबाट ५ रनमा क्याच हुन पुगे । पवन सरार्फ, विनोद भण्डारी र आरिफ शेखले ठूलो सटकै चक्करमा खराब सट खेल्दै क्रमश : १, ५ र १० रनमा क्याच आउट भएपछि जितको सम्भावना सकिएको थियो । कुशल पनि ठूलो सटको धुनमा १९ रनमा क्याच आउट हुन पुगेका थिए । ज्ञानेन्द्र स्टम्पिङ आउट भएका थिए । जसको कारण नेपाल पराजित हुन पुग्यो । आगमी खेलमा टोलीमा परिवर्तनको आवश्वकता देखिन्छ ।