भुपेन्द्र जिसी, काठमाडौं

‘सास छँदासम्म आश रहन्छ’ भनेझैं एसिया कपको छनोट स्वरुप थाइल्याण्डमा जारी एसीसी इस्टर्न रिजन टि२० मा नेपाली राष्ट्रिय क्रिकेट टोलीको अर्को चरणमा पुग्ने सम्भावना त्यस्तै छ ।

प्रतियोगिताको पहिलो खेलमा मलेसियासँग २२ र हङकङसँग ४३ रनले पराजित भएपछि नेपालको एसिया कप छनोट खेल्ने सपना कठिन बनेको छ । दुई खेलमा हार्दैमा नेपालको एसिया कपको सम्भावना पूरै सकिएको भने छैन ।

अंक गणितीय सम्भावना अनुसार नेपालले अझैं पनि एसिया कप छनोटमा स्थान बनाउन सक्छ । त्यसको लागि अन्य टोलीको नजितानै निर्णायक रहेन छ । सोझो अर्थमा नेपालको भविष्य अरु टोलीमा निर्भर छ ।

पाँच टोली सहभागि इस्टर्न रिजनमा लिग चरणपछि शीर्ष दुई टोली आगमी अगष्टमा मलेसियामा हुने एसिया टि ट्वान्टी कप छनोट खेल्न पाउने छन् । उक्त छनोटमा यस प्रतियोगिताका शीर्ष दुई टोलीसँगै कुवेत र यूएईले प्रतिस्पर्धा गर्ने छन् । जसको विजेताले आगमी सेप्टेम्बरमा भारतमा हुने एसिया कप टि ट्वान्टी प्रतियोगिता खेल्न पाउने छन् ।

एसिया कपमा मलेसियामा हुने एसिया कप छनोटको विजेतासँगै भारत, पाकिस्तान, श्रीलंका, अफगानिस्तान र बंगलादेश गरि ६ टोलीबीच प्रतिस्पर्धा हुनेछ । सुरुवाती दुई खेलको गैर जिम्मेवारी प्रर्दशनले नेपालको छिमीकी मुलुक भारत सहित अन्य चार टेष्ट टोलीसँग एसिया कप खेल्ने ठूलो सपना कठिन बनेको छ ।

नेपालले अब थाईल्यान्ड र सिंगापुरसँग खेल्न बाँकी छ । नेपालले दुबै खेलमा फराकिलो अन्तरको जित निकाल्नुपर्छ । जसले गर्दा नेपालको ४ अंक हुने छ । त्यस्तै मलेसिया, हङकङ, सिंगापुर र थाईल्यान्डको नतिजा आफु अनुकुल आउनुपर्छ । जसले नाटकीय रुपमा नेपाल एसिया कप छनोटमा पुग्न सक्छ । खेलाडी, समर्थक र सुभचिन्तक पनि त्यस्तै नाटकीय नतिजाको आशामा छन् ।

नेपाललाई २२ र थाईल्यान्डलाई ८ विकेटले हराएको मलेसियाले सिंगापुर र हङकङसँग खेल्न बाँकी छ । समिकरण अनुसार दुबै खेलमा मलेसिया फराकिलो अन्तरले विजयी हुनुपर्छ । दुवै खेलमा विजयी हुँदा मलेसियाको ८ अंकका साथ शीर्ष स्थानमा रहँदै घरेलु मैदानमा हुने एसिया कप छनोटमा स्थान बनाउने छ ।

हङकङले मलेसियासँगै, थाईल्यान्ड र सिंगापुरसँग खेल्न बाँकी छ । नेपाललाई हराएको हङकङ कम्तीमा दुई खेलमा पराजित हुनुपर्छ । तीनै खेलमा पराजित भएमा नेपाललाई ‘ढुङ्गा खोज्दा देवता’ मिले जस्तै हुने छ । हङकङ बाँकी तीनै खेलमा पराजित भएको खण्डमा उसको २ अंक हुनेछ । तीन मध्य दुई खेलमा पराजित हुँदा ४ अंक हुने छ । समिकरण अनुसार हङकङ मलेसिया र सिंगापुरसँग पराजित हुँदै थाईल्यान्डलाई निकै झिनो अन्तरले हराउँदा नेपाललाई खासै असर पर्ने छैन ।

सिंगापुरको मलेसियासँगै, नेपाल र हङकङसँग खेल्न बाँकी छ । सिंगापुरले थाईल्यान्डलाई ४३ रनले हराएको थियो । यो अवस्थामा सिंगापुरले हङकङलाई भने हराउनुपर्छ । सिंगापुर नेपालसँगै मलेसियासँग फराकिलो अन्तरले पराजित हुनुपर्छ । जसले तीन टोली मध्य एकले नेट रन रेट को आधारमा एसिया कप छनोटमा स्थान बनाउने छ ।

समग्रमा नेपाल अघिल्लो चरणमा पुग्न सिंगापुर र हङकङले कम्तीमा दुई–दुई खेलमा फराकिलो अन्तरले हार्नैपर्छ । थाईल्यान्डले हङकङलाई हराउन सकेको खण्डमा नेपाललाई समिकरण र नेट रन रेट दुबैमा धेरै फाइदा पुग्ने छ । नेपालले बुधबार थाईल्यान्ड र शुक्रबार सिंगापुरसँग खेल्ने छ ।