काठमाडौं (हाम्रो खेलकुद) – एसीसी इस्टर्न रिजन टि२० प्रतियोगितामा नेपालले बुधबार आयोजक थाईल्याण्डसँग खेल्दै छ । खेल बिहान ८:१५ देखि थाईल्याण्डको बैंकक स्थित टेर्डथाई क्रिकेट मैदानमा सुरु हुनेछ ।

थाईल्याण्ड हङकङ र मलेसियासँग समान ८ विकेट तथा सिंगापुरसँग ४३ रनले पराजित हुँदै बाहिरि सकेको छ ।मलेसियासँग २२ र हङकङसँग ४३ रनले पराजित भएको नेपालले दुबै खेलमा विशाल जित निकाल्नु पर्ने हुन्छ । नेपालको एसिया कप छनोटमा पुग्ने झिनो अंक गणितीय सम्भावना बाँकी राखेको छ । नेपालले थाईल्यान्डमाथि फराकिलो जित निकाल्नैपर्छ । साथै अन्य टोलीको नतिजाले नेपाल एसिया कप छनोटमा पुग्ने नपुग्ने टुङ्गो लाग्ने छ ।

फराकिलो जितको आवश्यकता रहेको नेपाललाई खराब लयका साथै ब्याट्सम्यानको गैर जिम्मेवारी सटले चिन्ता थपेको छ । प्रतियोगिता अघि उपाधिको दाबेदार मानिएको नेपाल मलेसिया र हङकङविरुद्ध ब्याट्सम्यानको गैर जिम्मेवारी प्रर्दशनले लिग चरणबाटै बाहिरिने संघारमा छ । मलेसियाले प्रस्तुत गरेको १ सय ५५ रनको लक्ष्य पक्ष्याउने क्रममा नेपाल १९.५ ओभरमा १ सय ३२ रनमा अल आउट भएको थियो ।

हङकङविरुद्ध पनि नेपाल १ सय ५५ रनको लक्ष्य पक्ष्याउने क्रममा १८.१ ओभरमा १ सय ११ रनमै समेटियो । प्रमुख ब्याट्सम्यान पारस खड्का पहिलो खेलमा मलेसियासँग ९ रनमा क्याच र हङकङसँग ४ रनमा एलबिडब्लू आउट भए । धेरैले पारसलाई खराब लयमा रहेको आँकलन गरेका छन् । तर पारस दुवै खेलमा खराब खेल्दै आउट भएका थिए ।

उप कप्तान दीपेन्द्र सिंह ऐरीले मलेसियासँग ४० बलमा १ चौका सहित ३८ रनको सुस्त इनिङ खेले । धेरैले दीपेन्द्रले टोलीको लागि भन्दापनि आफ्नो लागि खेलेको आरोप लगाए । दोस्रो खेलमा भने दीपेन्द्र आफुले कुन सट खेल्नेमै प्रष्ट नहुँदा हावामा ब्याट चलाउँदै ५ रनमा विकेट किपरबाट क्याच आउट भए । खराब लयको कारण अझ दबाब थपिँदा दीपेन्द्रले आफ्नो शैलीको क्रिकेट पछिल्लो समय पस्किन सकिरहेका छैनन् ।

हिटर विनोद भण्डारी पनि दुबै खेलमा ठूलो सटको चक्करमा खराब सट खेल्दै दोहोरो अंकमा रन नबनाई पेभिलिएन फर्केका थिए । यता घरेलु लिगमा राम्रो लयमा देखिएका आरिफ शेखको प्रर्दशन झनै खराब छ । आरिफ पनि ठूलो सट खेल्ने क्रममा हङकङसँग १० र मलेसियासँग ५ रनमा क्याच आउट भए । आरिफले दुबै खेलमा ७ नम्बरमा ब्याटिङ गरेका छन् । आरिफको ब्याटिङ क्रममाथि कप्तानीमाथि प्रश्न पनि उठाएको छ ।

पवन सरार्फ मलेसियासँग १९ र हङकङसँग १ रनमा आउट भएका थिए । पवन र आरिफ मध्यको एकको स्थानमा सन्दीप जोराले मौका पाउने उच्च सम्भावना छ । ओपनर कुशल मल्ल ठूलो सटकै धुनमा मलेसियासँग शुन्य र हङकङसँगको खेलमा १९ रनमा क्याच आउट भएका थिए । यता कप्तान ज्ञानेन्द्रले सुरुवात राम्रो गरेपनि ठूलो इनिङमा बदल्न सकिरहेका छैनन् । गैर जिम्मेवारी सटनै सुरुवाती खेलमा नेपालको हारको मुख्य कारण बनेको थियो ।

सोझो अर्थमा कुनै पनि खेलाडी राम्रो लयमा देखिँदैनन् । ब्याटिङ मात्रै होइन बलिङ पनि राम्रो हुन सकिरहेको छैन । प्रमुख अनुभवी स्पिनर वसन्त रेग्मी र तीब्र गतिका बलर सोमपाल कामी विना थाईल्यान्ड पुगेको नेपालको बलिङबाट पनि कमजोर प्रर्दशन भई रहेको छ ।

तीब्र गतिका करण केसीले दुई खेलमा ७ ओभरमा ६२ रन खर्चिँदा १ विकेट मात्रै लिएका छन् । अर्का तीब्र गतिका बलर अभिनाश बोहराले पनि २ खेलमा ८ ओभरमा ६३ रन खर्चेर २ विकेट लिएका छन् । नेपालले पावर प्ले र डेथ ओभरमा बढी रन खर्चेको छ । प्रमुख स्पिनर सन्दीप लामिछानेले २ खेलमा ४७ रन खर्चेर ५ विकेट लिएका छन् । अर्का स्पिनर सुशन भारीले मलेसियाविरुद्ध ३ ओभर बलिङ गर्दै २६ रन खर्चिदा विकेट लिन नसक्दा हङकङविरुद्ध ४ ओभरमा ३७ रन खर्चिदै २ विकेट लिएका थिए ।

थाईल्यान्डविरुद्ध भुवन कार्कीले टी ट्वान्टी आईमा डेब्यू गर्ने सम्भावना रहन्छ । समग्रमा ब्याटिङ र बलिङ दुबैमा खेलाडीले आफ्नो क्षमता अनुसारको प्रर्दशन गर्न सकिरहेका छैनन् । सबै खेलाडीले जिम्मेवारी प्रर्दशन गर्ने हो भने नेपाललाई प्रतिस्पर्धी हेर्दा जितको लागि कुनै कठिन देखिँदैन ।