काठमाडौं (हाम्रो खेलकुद)– इङ्ल्यान्ड भ्रमण सकेर नेपाली क्रिकेट टोली स्वदेश फर्केको छ । नेपाल र बेलायतबीच दौत्यसम्बन्ध स्थापना भएको २ सय बर्ष पुरा भएको उपलक्ष्यमा मेरिलेबोन क्रिकेट क्लब (एमसिसी) सँग मैत्रीपूर्ण खेलका लागि नेपाली टोली त्यहाँ पुगेको थियो । साउन ४ मा एमसिसीलाई हराउनुअघि नेपाली टोलीले चार खेलमा स्थानिय टोलीलाई पराजित गरेको थियो ।
भ्रणमलाई नेपालको विश्व क्रिकेट लिग (डब्लुसियल) च्याम्पियनसिपको तयारीका रुपमा समेत हेरिएको थियो । यसै महिनाको अन्त्यमा नेपालले डब्लुसियल च्याम्प्यिनसिपमा नेदरल्यान्ड्सको सामना गर्दैैछ । नेपालले २९ र ३१ गते नेदरल्यान्ड्सकै मैदानमा दुई खेल खेल्न नेदरल्यान्ड्स जानेछ ।
नेपाली टोलीलाई शुक्रबार राष्ट्रिय खेलकुद परिषद्का सदस्य सचिव केशवकुमार विष्ट, निलम्बनमा रहेको नेपाल क्रिकेट संघ (क्यान) की पूर्व सिइओ भावना घिमिरेले लगायतले त्रिभुवन विमानस्थलमा स्वागत गरेका थिए । सिइओबाट राजीनामा दिएपनि घिमिरेलाई अन्तर्राष्ट्रिय क्रिकेट परिषद् (आइसिसी) ले नेपाली टोलीको व्यवस्थापनको जिम्मेवारी दिएको छ ।
