काठमाडौं (हाम्रो खेलकुद) – पारस खड्काले राष्ट्रिय टोलीको कप्तानबाट असोज २७ गते अकस्मात राजिनामा घोषणा गर्दा धेरै आश्चर्यमा परे । एक दशकदेखि टोलीको जिम्मेवारी सम्हाल्दै आएका पारसले आईसीसीले नेपाल क्रिकेट संघमाथि लगाएको तीन वर्षदेखिको प्रतिबन्ध फुकुवा भएको २४ घण्टा नबित्दै पद छाडेका थिए । जुन समय पारसको व्यक्तिगत प्रर्दशन पनि उत्कृष्ट थियो ।

तर कप्तानी छोडेसँगै पारसको प्रर्दशन खस्कँदै गएको छ । थाइल्याण्डमा जारी एसीसी इस्टर्न रिजन टि२० प्रतियोगितामा खराब प्रर्दशनको कारण नेपाल अगष्टमा मलेसियामा हुने एसिया कप छनोटको लागि छनोट हुन सकेन । नेपाल मलेसियासँग २२, हङकङसँग ४३ रनले पराजित हुँदा थाईल्यान्डलाई ९ विकेटले हरायो । तीनै खेलमा पारसले दोहोरो अंकमा रन छुन सकेनन् । कप्तानी छाडेसँगै प्रमुख ब्याट्सम्यान तथा ओपनरको रुपमा टोलीमा रहेका पारसको प्रर्दशन कमजोर रहँदै आएको छ ।

पारसले कप्तानी छोड्नुअघि असोज ११ मा जिम्बावे र सिंगापुरसँगको त्रिकोणात्मक सिरिज अन्तर्गत घरेलु टोली सिंगापुरुविरुद्ध १ सय ५२ रनको विजयी लक्ष्य पक्ष्याउने क्रममा पारस ५२ बलमा ९ छक्का र ७ चौका सहित १ सय ६ रनमा अविजित रहँदै विश्व कीर्तिमान कायम गरेका थिए । पारस लक्ष्य पक्ष्याउने क्रममा टि ट्वान्टी आईमा शतक प्रहार गर्ने पहिलो कप्तान हुन् ।

पारस ओडीआई र टि ट्वान्टी आई दुवैमा शतक प्रहार गने एक्लो नेपाली खेलाडी र कप्तान हुन् । असोज १८ देखि २३ सम्म ओमानमा भएको पाँच राष्ट्र सहभागि टि ट्वान्टी सिरिजमा नेपालको नेतृत्व पारसले नै गरेका थिए । त्यो सिरिज नै कप्तानको रुपमा उनको अन्तिम सिरिज हुन पुग्यो ।

पारसले कप्तानी छोडेपछि नेपालले मंसिरमा बंगलादेशमा एसीसी इमर्जिङ टिम्स एसिया कप, पुषमा १३ औं दक्षिण एसियाली खेलकुद (साग), माघमा आईसीसी विश्वकप लिग २ अन्तर्गत ओमान र अमेरिकासँग घरेलु मैदानमा एकदिवसिय सिरिज हुँदै एसीसी इस्टर्न रिजन टि२० प्रतियोगिता खेलिरहेको छ । त्यस्तै यसबीचमा नेपालले मेलबर्न क्रिकेट क्लब (एमसीसी) सँग कात्तिकमा घरेलु मैदानमा एक दिवसिय, टि ट्वान्टी र प्रथम श्रेणी खेल समेत खेलेको थियो ।

पारसले एमसीसीविरुद्ध एकदिवसिय टोलीमा मात्रै रहेपनि अन्य खेल अस्वस्थताको कारण खेलेनन् । उनले त्यसपछि टि टेन क्रिकेट प्रतियोगितामा टिम आबुधावीमा अनुबन्ध भएपछि इमर्जिङ टिम्स एसिया कपबाट आफ्नो नाम फिर्ता लिएका थिए । अन्य सबै प्रतियोगिता पारस ज्ञानेन्द्रको कप्तानीमा खेलेका छन् । तर प्रर्दशन खराब छ ।

पारसले कप्तानी छोडेपछिको प्रर्दशन

पारसले कप्तानी छोडेपछि ८ टि ट्वान्टी र ४ ओडीआई खेलेका छन् । १२ खेलमा पारसले जम्मा १ सय ६८ रन बनाएका छन् । जसमा १ मात्रै अर्धशतक सामेल छ । १२ मध्य पारसले ७ खेलमा दोहोरो अंकमा रन बनाउन सकेनन् । १३ औं सागमा पारसले कमजोर भुटानविरुद्ध ५७ रन जोडेका थिए । सागमा बंगलादेशको यू२३ सँग ९ र श्रीलंकासँग १ रनमा आउट भए । माल्दिभ्ससँग समुह चरणमा ३ र कास्य पदकको लागि भएको प्रतिस्पर्धामा ९ रनमा पेभिलिएन फर्के ।

विश्वकप लिग २ एकदिवसिय मा ओमानसँग पहिलो खेलमा ३ र दोस्रो खेलमा ३८ रनमा आउट भए । अमेरिकासँग पारस पहिलो खेलमा १९ रनमा आउट हुँदा दोस्रो खेलमा २० रनमा अविजित रहे । पारस २० रनमा अविजित रहँदा नेपालले ३६ रनको सामान्य लक्ष्य पक्ष्याएको थियो । थाईल्यान्डमा जारी इस्टर्न रिजनमा पारस मलेसियासँग ९, हङकङसँग ४ र थाईल्यान्डसँग ९ रनमा आउट हुन पुगे । पारसको खराब प्रर्दशनमा नेपालको ब्याटिङमा नै प्रत्यक्ष असर परेको छ ।

प्रमुख ब्याट्सम्यानलेनै अधिकांश खेलमा दोहोरो अंकमा रन जोड्न नसक्नु सामान्य कुरा होइन् । अझ कमजोर मानिने ब्याटिङ र लामो समयदेखि पारसमाथि निर्भर रहेको नेपाली टोली उनले नै खराब प्रर्दशन गर्दा कमजोर टोलीसँग पनि पराजित हुन पुगेको छ । जारि सिरिजमा पनि नेपाल मलेसिया र हङकङसँग पनि पराजित हुन पुग्यो । धेरैले पारसलाई कप्तानी छोडेसँगै आफ्नो प्रर्दशनमा जिम्मेवारी नदिएको आरोप लगाएका छन् ।

पारसले इस्टर्न रिजनमा राम्रो प्रर्दशन गर्न सकेको भए सायद नतिजा फरक आउन सक्ने धेरैको आँकलन छ । कप्तान छाड्नु र खराब लयबाट गुज्रनु एकसाथ भएकाले उनी थप दवावमा देखिन्छन् । अब इपिएल पनि कोरोनाका कारण स्थगित भएपछि पारसले केहि समय खेलबाट टाढा रहेर विश्राम लिन सक्छन् । यसले उनलाई केहि समय दिनेछ । पारसबाट समर्थकमात्र होइन स्वंय उनी र टोली पनि ठूलो इनिङको पर्खाइमा छ । नेपाली टोलीले सुखद नतिजा ल्याउन उनीबाट ठूलो इनिङको आवश्यकता पनि देखिन्छ ।