एजेन्सी – पहिलो टि ट्वान्टी खेलमा जिम्बावेमाथि घरेलु टोली बंगलादेशले सहज जित हात पारेको छ । सोमबार साँझ ढाकामा सम्पन्न खेलमा ४८ रनले हराउँदै बंगलादेशले दुई टि ट्वान्टीमा सिरिजमा १–० को अग्रता लिएको छ ।

जितमा लागि २ सय १ रनको विशाल विजयी लक्ष्य पछ्याएको जिम्बावे १९ ओभरमा १ सय ५२ रनमा अल आउट भयो । जिम्बावेका ओपनर तिनशे कामुनुखुमवे २० बलमा ४ चौका र १ छक्का सहित २८ रनको योगदान दिए । तल्लोक्रमका कार्ल मुम्बाले १६ बलमा ३ चौका र १ छक्का सहित २५, डोनाल्ड तिरिपोनो, रिचमन्ड मुटुम्बमी र कप्तान सेन विलियम्सले २०–२० रनको योगदान दिए । सिकन्दर राजाले १० रन जोडे ।

बंगलादेशका तीब्र गतिका बलर मुस्ताफिजुर रहमानले ४ ओभरमा ३२ रन खर्चेर ३ विकेट लिए । स्पिनर अमिनुल इस्लाम ३ ओभरमा ३४ रन खर्चेर ३ विकेट लिए । त्यस्तै अफिफ हुसैन, मोहम्मद सैफुद्दीन र शैफुल इस्लाम १–१ विकेट लिए ।

त्यसअघि शेर बंगला नेशनल स्टेडियम मिरपुर ढाकामा टस हारेर ब्याटिङको निम्तो पाएको बंगलादेशले निर्धारित २० ओभरमा ३ विकेट गुमाउँदै २ सय रन बनाएको थियो । सौम्य सरकार ३२ बलमा ४ चौका र ५ छक्का सहित ६२ रनमा नट आउट रहे । त्यस्तै लिटन दास ३९ बलमा ५ चौका र ३ छक्का सहित ५९ रनमा एलबिडब्लू आउट भए ।

ओपनर तमीम इकबाल ३३ बलमा ३ चौका र २ छक्का सहित ४१ रनमा आउट हुँदा कप्तान महमुदुल्लाह १४ रनमा अविजित रहे । पहिलो विकेटका लागि तमीम इकबाल र लिटन दासले १०.२ ओभरमा ९२ रन जोड्दै राम्रो सुरुवात दिलाएका थिए । जिम्बावेका सिकन्दर राजा, क्रिस मपुफु र वेस्ली माधेवीले १–१ विकेट लिए । दोस्रो तथा अन्तिम खेल बुधबार हुने छ ।