एजेन्सी – पाकिस्तान टेष्ट टोलीका कप्तान तथा ओपनर ब्याट्सम्यान अजहर अलीले आफ्नो कीर्तिमानी ब्याट र ऐतिहासिक जर्सि लिलामी गर्ने भएका छन् ।

विश्वभर महामरीको रुप लिएको कारोना भाईरस (कोभिड१९) विरुद्धको लडाईको लागि यी दुवै सामग्री लिलामीमा राख्ने घोषणा गरेका छन् । अजहरले डे नाइट (राती र दिउँसो) टेष्टमा तेहेरो शतक प्रहार गर्दाको ब्याट लिलामीमा राख्ने छन् । डे नइट टेष्टमा तेहेरो शतक प्रहार गर्ने अजहर पहिलो ब्याट्सम्यान हुन् । उनले सन् २०१६ मा युएईमा वेस्ट इन्डिजविरुद्ध ४ सय ६९ बलमा २३ चौका र २ छक्का सहित ३ सय २ रनको तेहेरो शतकीय इनिङ खेलेका थिएँ ।

सन् २०१७ को च्याम्पियनसिप ट्रफीको उपाधि जित्दाको जर्सी पनि अक्सनमा रहने छ । पाकिस्तानले इंग्ल्यान्डमा भएको उक्त च्याम्पियनसिप ट्रफीको फाइनलमा भारतलाई १ सय ८० रनको फराकिलो अन्तरले हराउँदै उपाधि जितेको थियो । जसमा अजहरको प्रर्दशन महत्वपूर्ण थियो । अक्सनको समय वैशाख २३ मा सकिने छ । लिलामीमा अक्सनको न्युनतम मुल्य १० लाख पाकिस्तानी रुपैयाँ हुने छ ।

“मैले सोचेको थिएँ यी ब्याट र जर्सि सधैंभर सम्हालेर राखौं । तर अहिले धेरै मानिस संकटमा छन् । ती मानिसलाई यसबाट सहयोग गर्न चाहान्छु, त्यो नै सबैभन्दा ठुलो कुरा हो’, अजहरले भनेका छन् । पाकिस्तानमा हालसम्म १४ हजार ६ सय १२ जना संक्रमित देखिदा ३ सय १२ को मृत्यु भएको छ । ३ हजार २ सय ३३ जना ठिक भएका छन् ।