काठमाडौं (हाम्रो खेलकुद) – धुर्मुस सुन्तली फाउन्डेसनले चितवन भरतपुरको शान्तिपुरमा जनस्तरबाट निर्माण गरि रहेको गौतम बुद्ध अन्तर्राष्ट्रिय रंगशालालाई भरतपुर महानगरपालिकाले ५० लाख रुपैयाँ प्रदान गरेको छ ।

अन्तर्राष्ट्रिय गौतम बुद्ध रंगशाला निर्माणको लागि मंगलबार भरपुर महानगरपालिकाले फाउन्डेसनलाई रकम प्रदान गरेको हो । २०७५ माघ १६ गते महानगर र फाउन्डेसनबीच सम्झौता भई रंगशाला निर्माण कार्य अघि बढेको थियो ।

भरतपुर महानगरपालिका प्रमुख रेणु दाहल, उप प्रमुख पार्वती शाह ठकुरी र प्रमुख प्रशासकीय अधिकृत प्रेमराज जोशीले फाउन्डसेनका अध्यक्ष सिताराम कट्टेल (धुर्मुस) लाई रकम हस्तान्तरण गरेका थिए । कोरोना महामारीको समयमा पनि रंगशालाको निर्माणकार्य जारी रहँदै आएको छ ।

३० हजार समर्थक अट्ने क्षमता भएको यस रंगशाला देशको प्रतिष्ठासँगै राष्ट्रिय एकताको परियोजनाको रुपमा रहेको छ । यस निर्माणधीन रंगशालामा सिंगो देश हेर्न सकिने फाउन्डेसनले जनाउँदै आएको छ ।
फाउन्डेसनका अनुसार योजनामा ७७ वटा कोठा छन् । पूर्व मेचिदेखि पश्चिम महाकालीसम्म, झापा सुनसरी हुँदै कैलाली कञ्चनपुर सम्मको जिल्लाहरुलाई समेटेर ७७ वटा कक्ष निर्माणाधीन छन् । रंगशालाको छतमा ७७ वटै कमलका पत्ताहरु छन् ।