एजेन्सी– बंगलादेशका स्टार अलराउन्डर तथा पूर्व कप्तान सकीब अल हसनमाथि लागेको एक वर्षको अन्तर्राष्ट्रिय प्रतिबन्ध आज सकिँदै छ ।

गतवर्ष सकीबलाई अन्तर्राष्ट्रिय क्रिकेट परिषद् (आइसिसी) ले सट्टेबाजको प्रस्तावबारे जानकारी नदिएर भ्रष्टाचार विरोधी संहिताको उंल्लघन गरेको आरोपमा एक वर्षको प्रतिबन्ध लगाएको थियो । जुन प्रतिबन्ध आजदेखि सकिने छ । हाल सकीब अमेरिकामा परिवारका साथ छन् । सकीब आगमी महिना बंगलादेश फर्किने सम्भावना छ । ३३ वर्षिय सकीब वर्तमान समयमा विश्व क्रिकेटका एक सर्वोत्कृष्ट अलराउन्डर हुन् । सकीब त्यो बेला प्रतिबन्धमा परेका जुन समय उनले खेलाडीको सेबा र सुविधालाई लिएर बंगलादेश क्रिकेट बोर्डविरुद्ध आन्दोलनको नेतृत्व गरि रहेका थिए ।

सकीब बंगलादेश क्रिकेट इतिहासकै सर्वाधिक सफल खेलाडी मानिन्छन् । टि२० कप्तान महमूदुल्लाह सकीब टोलीमा फर्किन लाग्दा निकै खुसी देखिछन् । ‘हाम्रो केटा घरबाट पूनरागमन गर्दै छ । म धेरै खुसी छु । हामीलाई थाहाँ छ सकीब बंगलादेश क्रिकेटका केहिवर्ष यतादेखिकै सर्वोत्कृष्ट खेलाडी थिए’, महमूदूल्लाहले इएसपिएनक्रिकइन्फोसँग भनेका छन् ।

बंगलादेश क्रिकेट बोर्डले नोभेम्बर तेस्रो सातातिर पाँच टोलीबीच टि२० प्रतियोगिता गर्ने सम्भावना छ । त्यस प्रतियोगितामार्फत सकीब टोलीमा फर्किने उच्च सम्भावना छ । महमूदुल्लाह सकीब टोलीका लागि फिट हुनेमा कुनै शंका नभएको बताउछन् । ‘सकीब च्याम्पियन खेलाडी हुन् । मलाई लाग्छ उनलाई लयमा फर्किन धेरै समय लाग्दैन । मलाई विश्वास छ सकीब मैदान फर्किदा वितिक्कै आफ्नो लय समाउने छन् । सबैभन्दा ठूलो कुरा उनको अभाव अव हुन पाउँने छैन । सकीबले सधै ब्याट र बल दुबैबाट महत्वपूर्ण योगदान पुयाउँछन् ।’

सकीबको प्रतिबन्ध सकिँदा विकेटकिपर मुश्फिकुर रहिम पनि निकै खुसि र उत्साहितका साथ स्वागत गर्दै ट्वीट गरेका छन् । ‘अब च्याम्पियन फिल्डमा उत्रन पर्खिन सकिदैन । सकीबसँग ड्रेसिङ रुममासँगै बस्न आतुर छु । करिअरमा देशको लागि हामीलेसँगै थुप्रै खेलमा विजयी साझेदारी गरेका छम्, स्वागत छ सकीब ।’

बंगलादेशले अब अन्तर्राष्ट्रिय खेल आगमी जनवरीमा वेस्टइन्डिजसँग खेल्ने सम्भावना छ । कोरोना महामारीको कारण बंगलादेशले हालसम्म ८ टेष्ट खेल स्थगित गर्नुको साथै केहि ओडिआई र टि२० सिरिज पनि गुमाएको छ ।