एजेन्सी– विकेटकिपर तथा अनुभवी ब्याट्सम्यान ब्रेन्डन टेलरको शतकको बाबजुद जिम्बावे पहिलो ओडिआई खेलमा घरेलु टोली पाकिस्तानसँग २६ रनले पराजित भएको छ ।

पाकिस्तानका लागि युवा तीव्र गतिका बलर शाहिन अफ्रिदिले उत्कृष्ट प्रदर्शन गर्दै ५ विकेट हात पारे । यो जितसँगै घरेलु टोली पाकिस्तानले तीन ओडिआई खेलको सिरिजमा १–० को अग्रता लिएको छ । जितका लागि २ सय ८२ रनको विजयी लक्ष्य पछ्याएको जिम्बावेले ४९.४ ओभरमा अल आउट हुँदै २ सय ५५ रनमा समेटियो । राम्रो अन्त्य गर्न नसक्दा जिम्बावे पाकिस्तानसँग पराजित हुन पुगेको हो ।

जिम्बावेका ब्रेन्डन टेलरले १ सय १७ बलमा ११ चौका र ३ छक्का सहित १ सय १२ रनको शतकीय इनिङ खेलेपनि टोलीलाई जित दिलाउन सकेनन् । टेलर शाहिन अफ्रिदीको ४७ औं ओभरको पाँचौ बलमा वहाब रियाजबाट क्याच आउट हुन पुगेका थिए । टेलरले १ सय ७ बलमा आफ्नो करिअरको ११ औं ओडिआई शतक पूरा गरेका थिए ।

टेलरले व्यक्तिगत ५२ रनमा जीवनदान पाएका थिए । इमाद वासिमको बलमा वहाब रियाजले क्याच छोड्न पुगेका थिए । युवा ब्याट्सम्यान वेस्ले मधेभरेले ६१ बलमा ७ चौका सहित ५५ रनको योगदान दिए । पाँचौ विकेटका लागि वेस्ले मधेभरेले र ब्रेन्डन टेलरले १ सय १२ बलमा १ सय १९ रनको साझेदारी गर्दै राम्रो आधार तय गरेपनि तल्लोक्रमका ब्याट्सम्यान चल्न नसक्दा जित दिलाउन सकेनन् ।

जिम्बावेले कमजोर सुरुवात गरेको थियो । पहिलो ओभरको तेस्रो बलमै तीव्र गतिका बलर शाहिन अफ्रिदीले ब्रायन चरीलाई २ रनमा बोल्ड आउट गरेका थिए । अफ्रिदीले अर्का ओपनर तथा कप्तान चामु चिभाभालाई १३ रनमा बोल्ड आउट गरेका थिए । क्रेग इर्वाइन ६८ बलमा ६ चौका सहित ४१ रनमा आउट भए । सेन विलियम्स ४ रनमा आउट भए ।

तल्लोक्रमका सिकन्दर राजा ८, टन्डाई चिसोरो ५ र कार्ल मुम्बा १ रनमा आउट भए । पाकिस्तानको जितमा शाहिन अफ्रिदीले १० ओभरमा ४९ रन खर्चेर ५ विकेट लिए । वहाब रियाजले ९.४ ओभरमा ४१ रन खर्चेर ४ विकेट लिए । इमाद वासिमको नाममा १ विकेट रह्यो ।

त्यसअघि रावलपिन्डी क्रिकेट स्टेडियममा टस जितेर ब्याटिङ रोजेको घरेलु टोली पाकिस्तानले निर्धारित ५० ओभरमा ८ विकेटको क्षतिमा २ सय ८१ रन बनाएको थियो । मध्यक्रमका ब्याट्सम्यान हरिस सोहेल ८२ बलमा ६ चौका र २ छक्का सहित सर्वाधिक ७१ रनको योगदान दिए । ओपनर इमाम उल हक रन आउट हुनुअघि ७५ बलमा ६ चौका सहित ५८ रनको योगदान दिए ।

अर्का ओपनर आविद अली २१, कप्तान बाबर आजम १९ र विकेटकिपर मोहम्मद रिजवान १४ रनमा आउट भए । तल्लोक्रममा इमाद वासिम २६ बलमा २ छक्का र १ चौका सहित ३४ रनमा अविजित रहे । तल्लोक्रममा इफ्तिखर अहमद १२ र फहिम अशरफ २३ रनमा आउट भए । जिम्बावेका टेन्डाई चिसोरो र मुराजाबानीले २–२ विकेट लिए । सिकन्दर राजा र कार्ल मुम्बाको नाममा एक एक विकेट रह्यो ।

तीन ओडिआई खेलको सिरिजमा दोस्रो खेल आइतबार हुने छ । पाकिस्तान भ्रमणमा रहेको जिम्बावेले समान तीन ओडिआई र टि२० आई सिरिज खेल्ने छ ।