एजेन्सी – इन्डियन प्रिमियर लिग (आइपिएल) को ५४ औं खेलमा आज कोलकाता नाइट राइडर्स र राजस्थान रोयल्सबीच प्रतिस्पर्धा हुँदैछ । खेल नेपाली समय अनुसार बेलुका ७:४५ पछि दुबई इन्टरनेशलन क्रिकेट स्टेडियममा सुरु हुनेछ ।

दुबै टोलीलाई प्ले अफमा पुग्ने अंक गणीतिय सम्भावना कायमै राख्न जित्नै पर्ने हुन्छ । समान १३ खेलमा १२–१२ अंकका साथ राजस्थान छैटौं र कोलकाता सातौं स्थानमा छन् । अन्तिम चारमा रहेर प्ले अफ खेल्न यी दुबै टोलीलाई आजको खेलमा फराकिलो जित निकाल्नुपर्ने हुन्छ । विजेता टोली फराकिलो जितले मात्र प्ले अफमा पुग्न सक्दैन । अन्य टोलीको नतिजामा निर्भर रहुनुपर्छ ।

आज हुने पहिलो खेलमा किंग्स इलेभेन पन्जाब चेन्नईसुपर किंग्स र मंगलबार सनराइजर्स हैदराबाद मुम्बई इन्डियन्ससँग पराजित भएमा आजको विजेतालाई प्ले अफमा पुग्न सहज हुने छ ।

कोलकाता, राजस्थान, पन्जाब र हैदराबाद चारै टोलीको समान १२ अंक छ । बेंगलोर र दिल्लीको १४– १४ अंक छ । जसमा दुई टोली १४ अंकका साथ प्ले अफमा पुग्ने समिकरण बनेको छ । त्यसैले प्ले अफ नेटरनरेटले निर्धारण गर्ने देखिन्छ । कोलकाता र राजस्थानको नेटरननेट क्रमश : –०.४६७ र –०.३७७ छ । जसले गर्दा फराकिलो जित आवश्यक देखिन्छ । झिनो जितले प्ले अफमा पुग्न अन्य टोलीको नजिता आफू अनुकुल आउनुपर्ने हुन्छ । आजको जितेजाले मंगलबार मुम्बई र हैदराबादको नतिजा पर्खनुपर्ने हुन्छ ।

राजस्थानले पछिल्लो खेलमा पन्जाबलाई ७ विकेटले पराजित गरेको थियो । १ सय ८६ रनको विजयी लक्ष्य १७.३ ओभरमा ३ विकेटको क्षतिमा पूरा गर्दै प्ले अफको आशा कायमै राखेको थियो । राजस्थानका अलराउन्डर बेन स्टोक्स लयमा फर्किएका छन् । मुम्बई इन्डियन्सलाई हराउन शतक र पन्जाबविरुद्ध जित निकाल्न आक्रामक अर्धशतक प्रहार गरेका थिए ।

स्टोक्सको प्रर्दशन राजस्थानलाई निकै महत्वपूर्ण हुने छ । त्यस्तै सन्जु स्यामसनले पनि पछिल्लो दुई खेलमा उत्कृष्ट प्रर्दशन गरेका थिए । रोविन उथप्पा, स्टिभ स्मिथ र जस बटलरले पनि औसत प्रर्दशन गरेको हुँदा राजस्थान बलियो देखिएको छ ।

बलिङमा जोफ्रा आर्चरले निरन्तर उच्च प्रर्दशन गर्दा अन्य बलरको राम्रो साथ पाउन सकेका छैनन् । आर्चरलाई अन्य बलरले राम्रो साथ दिन आवश्यक देखिन्छ । कोलकाता पछिल्लो खेलमा चेन्नईसँग ६ विकेटले पराजित भएको थियो । पछिल्ला दुई खेलमा नितेश राणाको प्रर्दशन राम्रो छ । ओपनर सुभमन गिल, कप्तान ओईन मोर्गन र दीनेश कार्तिकलाई उच्च प्रर्दशन गर्न आवश्यक देखिन्छ । घाइते आन्द्रे रसेल टोलीमा उपलब्ध हुने सम्भावना न्यून छ । प्याट कमिन्स र लोकी फर्गुसनले उच्च प्रर्दशन गर्नुपर्ने हुन्छ ।

अंक तालिका

मुम्बई १३ खेलमा ९ मा जित र ४ मा हार सहित १८ अंकका साथ शीर्षस्थानमा छ । रोयल च्यालेन्जर्स बेंगलोर १३ खेलमा ७ मा जित र ६ मा हार सहित १४ अंक जोड्दै दोस्रो स्थानमा छ । दिल्ली १३ खेलमा ७ मा जित र ६ मा हार सहित १४ अंकका साथ तेस्रो स्थानमा छ । हैदराबाद १३ खेलमा ७ मा हार र ६ मा जित सहित १२ अंकका साथ चौथो स्थानमा उक्लिएको छ ।

किंग्स इलेभेन पन्जाब १३ खेलमा ६ मा जित र ७ मा हार सहित १२ अंकका साथ पाँचौ स्थानमा छ । राजस्थान १३ खेलमा ६ मा जित र ७ मा हार बेहोर्दै १२ अंकका साथ छैटौं स्थानमा छ । कोलकाता १३ खेलमा ७ मा हार र ६ मा जित सहित १२ अंकका साथ सातौं स्थानमा छ । चेन्नई १३ खेलमा ५ मा जित र ८ मा हार सहित १० अंक जोड्दै पुछारमा छ ।