एजेन्सी– अष्ट्रेलियन अलराउन्डर शेन वाटसनले इन्डियन प्रिमियर लिग (आइपिएल) बाट सन्न्यासको घोषणा गरेका छन् ।

वाटसनले चेन्नईको अन्तिम खेलपछि ड्रेसिङ रुममा अन्य सहकर्मीमाझ आइपिएलबाट सन्न्यास लिएको घोषणा गरेको बुझिएको छ । आइपिएलमा दुई पटकका ‘मोष्ट भ्यालुएबल प्लेयर अवार्ड’ विजेता वाटसन आइपिएल इतिहासका एक सर्वाधिक सफल अलरान्डर हुन् । उनले यस सिजन चेन्नई सुपर किंग्सबाट खेल्दै औसत प्रर्दशन गरेका थिए ।

वाटसनले आफ्नो आइपिएल करिअरमा अन्तिम खेल आइतबार किंग्स इलेभेन पन्जाबविरुद्ध खेले । वाटसनले सन् २००८ मा राजस्थान रोयल्सबाट दिल्लीविरुद्ध डेब्यु गरेका थिए । वाटसनले सन् २००८ राजस्थान रोयल्स र २०१८ मा चेन्नई सुपर किंग्सबाट आइपिएल उपाधि जितेका थिए ।

सन् २००८ र सन् २०१३ मा प्रतियोगिता ‘मोष्ट भ्यालुएबल’ खलाडी चुनिएका थिए । ३९ वर्षिय वाटसनले आइपिएलमा कुल १ सय ४५ खेल खेलेका छन् । जसमा ३ हजार ८ सय ७४ रन बनाएका छन् । स्ट्राइक रेट १ सय ३७ छ । जसमा चार शतक सामेल छ । कुल ९२ विकेट लिँदा एउटा ह्याट्रिक उनको नाममा छ ।

सन् २००८ को सेमिफाइनलमा राजस्थान रोयल्सलाई फाइनलमा पुर्याउन वाटसनले दिल्लीविरुद्ध २९ बलमा ५२ रन जोड्नुको साथै १० रन खर्चेर ३ विकेट लिएका थिए । सन् २००८ मा राजस्थान रोयल्सले उपाधि जित्दा उत्कृष्ट प्रर्दशन गरेका उनले कुल ४ सय ७२ रन बनाउनुको साथै १७ विकेट लिएका थिए ।

वाटसनले सन् २०१६ मा अन्तर्राष्ट्रिय क्रिकेटबाट सन्न्यास लिएका थिए । सन् २०१६ र २०१७ मा वाटसनले रोयल च्यालेन्जर्स बेंगलोरबाट आइपिएल खेलेका थिए । बेंगलोरले ४ करोड भारतीय रुपैयाँमा अनुबन्ध गरेको थियो । तर प्रर्दशन कमजोर रहेको थियो ।

सन् २०१८ मा भने वाटसन चेन्नइमा पुगेका थिए । चेन्नईलाई तेस्रो पटक उपाधि जिताउँन फाइनलमा उनले हैदराबादविरुद्ध ५७ बलमा १ सय १७ रनमा अविजित रहँदै ‘प्लेयर अफ द फाइनल चुनिएका’ थिए । उक्त सिजनमा उनले कुल ५ सय ५५ रन बनाउँदै उच्च प्रर्दशन गरेका थिए । सन् २०१९ को फाइनलमा मुम्बईविरुद्ध ५९ बलमा ८० रन जोडेपनि चेन्नईले एक रनले हारेको थियो ।

यस सिजनमा वाटसनले चेन्नईबाट कुल ११ खेलमा २ सय ९९ रन बनाए । चेन्नई पहिलो पटक लिग चरणबाट बाहिरिन पुग्यो । वाटसनले आगमी दिनमा प्रशिक्षकको रुपमा काम गर्ने इच्छा राखेको बुझिएको छ । विश्वकप विजेता वाटसनले अष्ट्रेलियाबाट ५९ टेष्ट,१ सय ९० ओडिआई र ५८ टि२० आई खेलेका थिए ।