एजेन्सी – दिल्ली क्यापिटल्स इन्डियन प्रिमियर लिग (आइपिएल) २०२० मा क्वालिफायरमा पुगेको छ । सोमबार राती रोयल च्यालेन्जर्स बेंगलोरलाई ६ विकेटले पराजित गर्दै दोस्रो स्थानमा रहँदै दिल्ली लगातार दोस्रो सिजन प्लेअफमा पुग्न सफल भएको हो ।

यो हारका बाबजुद बेंगलोर पनि प्लेअफमा पुगेको छ । कोलकाता भन्दा नेटरनरेटले अघि रहेपछि बेंगलोरले प्ले अफमा स्थान पक्का गरेको हो । जितको लागि १ सय ५३ रनको विजयी लक्ष्य पछ्याएको दिल्लीले १९ ओभरमा ४ विकेटको क्षतिमा पूरा गर्यो । दिल्लीको जितमा अजिंक्या रहाणेले ४६ बलमा ५ चौका र १ छक्का सहित सर्वाधिक ६० रनको महत्वपूर्ण योगदान दिए ।

दोस्रो ओभरको पाँचौ बलमा मोहम्मद शिराजले ओपनर पृथ्वी शालाई ९ रनमा बोल्ड आउट गर्दै बेंगलोरलाई पहिलो सफलता दिलाएका थिए । दोस्रो विकेटका लागि शिखर धवन र अजिंक्या रहाणेले ८८ रनको साझेदारी गर्दै जितको आधार तय गरेका थिए । यी दुईबीचको साझेदारी १३ औं ओभरको चौथो बलमा शहबाज अहमदले धवनलाई शिवम दुबेबाट ५४ रनमा क्याच आउट गराउँदै तोडे । धवनले ४१ बलमा ६ चौका प्रहार गरे । कप्तान श्रेयस ऐर ७ रनमा क्याच आउट भए । ऋषभ पन्त ८ र मार्कस स्टोइनिस १० रनमा अविजित रहे ।

बेंगलोरका शहबाज अहमदले ४ ओभरमा २६ रन खर्चेर २ विकेट लिए । मोहम्मद शिराज र वासिन्टन सुन्दरको नाममा एक एक विकेट रह्यो ।

त्यसअघि शेख जायद स्टेडियम आबूधाबीमा टस हारेर ब्याटिङको निम्तो पाएको बेंगलोरले निर्धारित २० ओभरमा ७ विकेटको क्षतिमा १ सय ५२ रन बनाएको थियो । बेंगलोरका लागि ओपनर तथा युवा ब्याट्सम्यान देवदत्त पाडिक्कलले ४१ बलमा ५ चौका सहित सर्वाधिक ५० रनको योगदान दिए ।

बेंगलोरले दिल्लीविरुद्ध मध्यम सुरुवात गरेको थियो । ओपनर जोश फिलिपे र देवदत्त पाडिक्कलले पहिलो विकेटका लागि ४।१ ओभरमा २५ रनको साझेदारी गरेका थिए । तीव्र गतिका बलर कागिसो रबाडाको बलमा ठूलो सट खेलेका फिलिपे पृथ्वी शाबाट १२ रनमा सहज क्याच आउट हुन पुगे । फिलिपेले १७ बलमा १ चौका प्रहार गरे ।

तेह्रौं ओभरको तेस्रो बलमा स्पिनर रविचन्द्रन आश्विनले कप्तान विराट कोहलीलाई मार्कस स्टोइनिसबाट २९ रनमा क्याच आउट गराए । छक्काको धुनमा ठूलो सट खेलेका कोहली मिड विकेटमा समातिन पुगेका थिए । कोहलीले २४ बलमा २ चौका र १ छक्का प्रहार गरे ।

दोस्रो विकेटका लागि कोहली र पाडिक्कलले ५७ रनको साझेदारी गरेका थिए । १६ औं ओभरको चौथो बलमा एनरिच नोर्कियाले देवदत्त पाडिक्कललाई बोल्ड आउट गरेका थिए । पाडिक्कल ठूलो सट खेल्ने धुनमा बिट भएपछि बोल्ड आउट हुन पुगेका थिए । दुई बलपछि क्रिस मोरिस ऋषभ पन्तबाट शून्यमा क्याच आउट भए । मोरिस टप एज लागेर पन्तबाट समातिन पुगेका थिए ।

शिवम दुबे ११ बलमा २ चौका र १ छक्का सहित १७ रनमा क्याच आउट भए । कागिसो रबाडाको १९ औं ओभरको अन्तिम बलमा ठूलो सट खेलेका दुबे अजिंक्या रहाणेबाट क्याच आउट भएका थिए । पाँचौ विकेटका लागि दुबे र डी भिलियर्सले १८ बलमा ३३ रनको साझेदारी गरेका थिए ।

एबी डिभिलियर्स २१ बलमा १ चौका र २ छक्का सहित ३५ रनमा रन आउट भए । अन्तिम ओभरको दोस्रो बलमा दुई रन लिने प्रयासमा असफल हुँदा रन आउट हुन पुगेका थिए । इसिरु उडाना ४ रनमा क्याच आउट भए ।

एनरिच नोर्कियाले ४ ओभरमा ३३ रन खर्चेर ३ विकेट लिए । रविचन्द्रन आश्विनले ४ ओभरमा १८ रन खर्चेर १ विकेट लिए । कागिसो रबाडाले ४ ओभरमा ३० रन खर्चेर २ विकेट लिए । दिल्ली लगातार दोस्रो पटक क्वालिफायरमा पुगेको हो । गतवर्ष दिल्ली क्वालिफायरमा चेन्नई सुपर किंग्ससँग पराजित हुँदै बाहिरिएको थियो । सन् २०१२ मा पनि दिल्ली प्ले अफमा पुगेको थियो । सन् २००८ र २००९ मा दिल्लीले सेमिफाइनलबाट बाहिरिएको थियो ।

मुम्बई यसअघिनै क्वालिफायरमा पुगेको थियो । पहिलो क्वालिफायरमा फाइनलमा स्थान बनाउन बिहिबार मुम्बई र दिल्ली भिड्ने छन् । शुक्रबार तेस्रो र चौथो स्थानमा रहेका टोली एलिमिनेटर खेल खेल्नेछ । मंगलबार हैदराबाद मुम्बईविरुद्ध विजयी भएमा प्ले अफमा पुग्नेछ । पराजित भएमा कोलकाताले प्ले अफमा स्थान बनाउने छ । हैदराबाद पराजित भएमा एलिमिनेटरमा कोलकाता र बेंगलोर भिड्ने छन् ।

आइपिएलको अंक तालिका

मुम्बई १३ खेलमा ९ मा जित र ४ मा हार सहित १८ अंकका साथ शीर्षस्थानमा छ । दिल्ली १४ खेलमा ८ मा जित र ६ मा हार सहित १६ अंकका साथ दोस्रो स्थानमा छ । रोयल च्यालेन्जर्स बेंगलोर १४ खेलमा ७ मा जित र ७ मा हार सहित १४ अंक जोड्दै नेट रनरेटले तेस्रो स्थानमा रहँदै प्ले अफमा स्थान पक्का गरेको हो । कोलकाता १४ खेलमा ७ मा हार र ६ मा जित सहित १४ अंकका साथ चौथो स्थानमा उक्लिएको छ । हैदराबाद १३ खेलमा ७ मा हार र ६ मा जित सहित १२ अंकका साथ पाँचौ स्थानमा छ ।

किंग्स इलेभेन पन्जाब १४ खेलमा ६ मा जित र ८ मा हार सहित १२ अंकका साथ छैटौं स्थानमा रहँदै बाहिरिएको छ । चेन्नई १४ खेलमा ६ मा जित र ८ मा हार सहित १२ अंकका साथ सातौं स्थानमा रहेर बाहिरिएको छ । राजस्थान १४ खेलमा ६ मा जित र ८ मा हार बेहोर्दै १२ अंकका साथ पुछारमा रहेर बाहिरिएको छ ।