एजेन्सी – इन्डियन प्रिमियर लिग (आइपिएल) २०२० को लिग चरणको अन्तिम खेलमा आज सनराइजर्स हैदराबादले शीर्षस्थानको मुम्बई इन्डियन्ससँग प्रतिस्पर्धा गर्दैछ । खेल नेपाली समय अनुसार बेलुका ७:४५ पछि शारजाह क्रिकेट स्टेडियममा सुरु हुनेछ ।

मुम्बई शीर्षस्थानमा रहँदै प्लेअफका साथ क्वालिफायरमा स्थान पक्का गरेको हुँदा उसलाई प्रतिष्ठाको लडाईंमात्र हुने छ । मुम्बईले फाइनल प्रवेशका लागि दिल्ली क्यापिटल्ससँग खेल्ने छ । तर १३ खेलमा १२ अंकका साथ पाँचौ स्थानमा रहेको हैदराबादलाई प्लेअफमा स्थान बनाउन मुम्बईविरुद्ध स्पष्ट जितको आवश्यक पर्दछ । कोलकाता १४ खेलमा १४ अंकका साथ चौथो स्थानमा छ ।

हैदराबाद विजयी भएमा नेट रनरेटको आधारमा कोलकाता लिग चरणबाट बाहिरिने छ । कोलकाता नेट रनरेट –०.२१४ र हैदराबादको ०.५५५ छ । हैदराबाद पराजित हुँदा कोलकाता प्ले अफमा पुग्ने छ । तेस्रो स्थानमा रहँदै रोयल च्यालेन्जर्स बेंगलोरले प्ले अफमा स्थान पक्का गरिसकेको छ । आजको नतिजाले प्ले अफ समिकरण पूरा हुने छ ।

हैदराबादले पछिल्ला दुई खेलमा लगातार जित निकाल्दै प्ले अफको आशा कायमै राखेको थियो । जक्रममा दिल्लीलाई ८८ रन र बेंगलोरलाई ५ विकेटले पराजित गरेको थियो । हैदराबाद मुम्बईलाई हराउदै प्ले अफमा स्थान पक्का गर्न चाहन्छ । ओपनर ऋद्धिमान शाह राम्रो लयमा देखिएका छन् । शाहले दिल्लीविरुद्ध ८७ र बेंगलोरविरुद्ध ३९ रन जोडेका थिए । कप्तान डेभिड वार्नर हैदराबादका ब्याटिङका प्रमुख हतियार हुन् । उनको प्रर्दशन हैदराबादलाई महत्वपूर्ण हुने छ ।

हैदराबादले मुम्बईलाई हराउन शीर्षक्रमका ब्याट्सम्यानको प्रर्दशनले मात्र पर्याप्त हुँदैन । मध्यक्रमका केन विलियम्सन र मनिष पान्डेलाई पनि उच्च प्रर्दशन गर्न आवश्यक देखिन्छ । तल्लोक्रममा जेसन होल्डर, अब्दुल सामद र अभिषेक शर्माले पनि त्यतिनै उत्कृष्ट अन्त्य गर्नुपर्ने हुन्छ ।

बलिङमा सन्दीप शर्मा र टि नटराजनको तीव्र गतिको जोडीले लगातार विकेट लिदै राम्रो प्रर्दशन गर्दै आएका छन् । नटराजन योर्करका लागि सिपालु छन् । जेसन होल्डरको आगमनले हैदराबादको बलिङ युनिट थप मजबुत बनेको छ । होल्डरले खेलेका ४ खेलमा ८ विकेट लिएका छन् । राशिद खान हैदराबादका प्रमुख बलिङ हतियार हुन् । राशिदले जारी आइपिएलमा १८ विकेट लिएका छन् । उनको प्रर्दशन हैदराबादलाई निकै महत्वपूर्ण हुने छ । मुम्बईको मध्यक्रम कमजोर बनाउन राशिदको प्रर्दशन निकै महत्वपूर्ण हुने अनुमान गरिएको छ ।

उपाधिको दाबेदार मुम्बई लिग चरणको अन्तिम खेल जितका साथ अन्त्य गर्न चाहन्छ । पछिल्लो खेलमा दिल्लीलाई ९ विकेटले हराएको मुम्बईको मनोबल उच्च छ । खुट्टामा चोट बोकेका कप्तान रोहित शर्मा उपलब्ध हुने सम्भावना न्यून छ । पोलार्डले कप्तानी सम्हाल्ने छन् । ईशान किशन, क्विन्टन डी कक र सूर्यकुमार यादवको उत्कृष्ट लयको सहयोगले लगातार उच्च प्रर्दशन गर्दै आएको छ । यी तीन ब्याट्सम्यानको प्रर्दशन मुम्बईलाई महत्वपूर्ण हुने छ ।

तल्लोक्रममा काइरन पोलार्ड, हार्दिक पान्ड्या र क्रुनाल पान्ड्या हुँदा ब्याटिङमा गहिराई छ । तीव्र गतिका बलर ट्रेन्ट बोल्ट र जस्प्रित बुमराह मुम्बईका प्रमुख हतियार हुन् । जारी सिजनमा उच्च प्रर्दशन गरेका बुमराहले २३ र बोल्टले २० विकेट लिएका छन् । बोल्टले पावर प्ले र बुमराहले डेथ ओभरमा लगातार उच्च प्रर्दशन गरेको हुँदा मुम्बईको बलिङ हतियार बलियो छ । स्पिनर राहुल चहरले पनि राम्रो प्रर्दशन गर्दै आएको छन् ।

मुम्बई क्वालिफायरमा पुगि सकेको हुदा आजको नतिजाले कुनै फरक नपार्ने हुँदा केहि प्रमुख खेलाडीलाई बिश्राम दिन सक्छ । डी ककलाई बिश्राम दिदै अष्ट्रेलियाका ओपनर क्रिस लिनलाई मौका दिन सक्छ । दिल्लीविरुद्ध हार्दिकलाई बिश्राम दिदै जयन्त यादवलाई मौका दिएको थियो । बोल्टलाई बिश्राम दिदै मिचेल म्याकलेनघानलाई मौका दिन सक्छ ।

बोल्ट र बुमराह मध्य एकलाई बिश्राम दिन सक्ने सम्भावना देखिन्छ । दुबैलाई बिश्राम दिदा बलिङ कमजोर बन्न जान्छ । बुमराहलाई बिश्राम दिदै धवन कुलकर्णीलाई खेलाउन सक्छ । त्यस्तै नाथन कुल्टर नाइलको स्थानमा वेस्टइन्डिजका अलराउन्डर शेर्फान रदरफोर्डलाई पहिलो खेलको मौका दिन सक्छ ।

आइपिएलमा यी दुई टोलीबीच कुल १५ खेल भएको छ । जसमा मुम्बई ८ खेलमा विजयी हुँदा ७ खेलमा पराजित भएको छ । जारी सिजनमा लिग चरणको पहिलो खेलमा मुम्बईले हैदराबादलाई ३४ रनले हराएको थियो ।