एजेन्सी – अनुभवी ब्याट्सम्यान शन विलियम्सको उत्कृष्ट शतकमा जिम्बावेले तेस्रो तथा अन्तिम एकदिवसिय खेलमा घरेलु टोली पाकिस्तानलाई २ सय ७९ रनको बलियो लक्ष्य
दिएको छ ।

रावलपिन्डी क्रिकेट स्टेडियममा टस जितेर पहिला ब्याटिङ रोजेको जिम्बावेले निर्धारित ५० ओभरमा ६ विकेट गुमाउँदै २ सय ७८ रन बनायो । जिम्बावेलाई बलियो योगफलमा पुर्याउन मध्यक्रमका विलियम्स १ सय ३५ बलमा १३ चौका र १ छक्का सहित १ सय १८ रनको उत्कृष्ट अविजित शतकीय इनिङ खेले ।

विलियम्सले १ सय २६ बलमा आफ्नो करिअरको चौथो शतक पुरा गरेका थिए । खराब सुरुवात गरेको जिम्बावेलाई विलियम्सले शतक प्रहार गर्दै बलियो योगफलमा पुर्याएका हुन् । एक समय २२-३ को अवस्थामा रहेको जिम्बावेलाई विलियम्स र टेलरको साझेदारीले उकासेको थियो ।

ओपनर ब्रायन चारी ९ रनमा आउट हुँदा कप्तान चामु चिभाभा शुन्यमा आउट भए । ब्रेन्डन टेलर ६८ बलमा ८ चौका सहित ५६ रनको योगदान दिए । वेस्ले मधेभरे ३१ बलमा ४ चौका सहित ३३ रनमा आउट भए । तल्लोक्रममा सिकन्दर राजा ३६ बलमा ४ चौका र १ छक्का सहित ४५ रनमा बोल्ड आउट भए ।

पाकिस्तानका युवा तिव्र गतिका बलर मोहम्मद हसनैनले १० ओभरमा ३ मेडन सहित २६ रन खर्चेर शिर्षक्रमका प्रमुख ५ विकेट लिए । उनले एक दिवसीय खेलमा पहिलो पटक पाँच विकेट लिएका हुन् । वहाब रियाजको नाममा एक विकेट रह्यो । अन्य बलरले विकेट लिन सकेनन् ।