एजेन्सी – इन्डियन प्रिमियर लिग (आइपिएल) मा दिल्ली क्यापिटल्स नयाँ इतिहासबाट एकमदम टाढा छ । बिहिबार दुबई इन्टरनेशल क्रिकेट स्टेडियममा चार पटकको च्याम्पियन मुम्बई इन्डियन्सलाई हराउन सके दिल्ली आइपिएल इतिहासमा पहिलो पटक फाइनलमा पुग्ने छ ।

लिग चरणको समाप्तिमा अंक तालिकाको दोस्रो स्थानमा रहँदै क्वालिफायरमा स्थान बनाएको दिल्लीले फाइनलमा स्थान बनाउन कुनै कसुर बाँकी राख्ने छैन । यसअघि दिल्ली चार पटक फाइनल नजिक पुगेर बाहिरिएको थियो । उपाधिको दाबेदार दिल्ली यसअघिको गल्तीको पाठ सिक्दै फाइनलमा पुग्ने सपना पूरा गर्न खोज्ने छ ।

दिल्ली सन् २००८ को पहिलो संस्करणमा सेमिफाइनलमा राजस्थान रोयल्ससँग १ सय ५ रनको फराकिलो हार बेहोर्दै बाहिरिएको थियो । सन् २००९ मा को सेमिफाइनलमा दिल्ली डेकन चार्जर्ससँग ६ विकेटले पराजित हुँदै बाहिरिएको थियो । सन् २०१२ मा दिल्ली प्ले अफमा पुगेको थियो । दिल्ली पहिलो क्वालिफायरमा कोलकाता नाइट राइडर्ससँग १८ रनले पराजित भएको थियो । दोस्रो क्वालिफायरमा चेन्नई सुपर किंग्ससँग ८६ रनले पराजित भएको थियो ।

सन् २०१९ मा दिल्ली प्लेअफमा पुगको थियो । एलिमिनेटरमा सनराइजर्स हैदराबादलाई २ विकेटले हराएको दिल्लीले क्वालिफायरमा चेन्नई सुपर किंग्ससँग ६ विकेटको हार बेहोर्दै बाहिरिएको थियो । यी बाहेक अन्य संस्करणमा दिल्लीले आइपिएलमा सहभागिता जनाउन र लिग चरणबाट बाहिरिन बाहेक अन्य उपलब्धी हात पार्न सकेको थिएन ।

जारी सिजनमा उत्कृष्ट सुरुवात गरेको दिल्लीले अन्तिममा लगातार चार हार बेर्होदा प्ले अफमा स्थान बनाउन संघर्ष गर्नु परेको थियो । अन्तिम खेलमा बेंगलोलाई ६ विकेटले हराउँदै क्वालिफायरमा स्थान पक्का गर्यो ।

पहिलो पटक फाइनलमा पुग्ने लक्ष्य राखेको दिल्लीलाई पछिल्ला पाँच खेलको प्रर्दशनले सहज भने देखिदैन । अर्कोतर्फ मुम्बईले पनि लगातार राम्रो प्रर्दशन गर्दै आएको छ । विशेष त दिल्लीका प्रमुख ब्याट्सम्यानको कमजोर लय अर्को चिन्ताको विषय हो ।

ओपनर पृथ्वी शा कमजोर प्रर्दशनबाट गुज्रिदा उनको मनोबल र सट छनोटमा त्यसको प्रभाव देखिन्छ । पछिल्ला ५ खेलमा उनले क्रमश : ९, १०, ०, ० र ४ रन बनाएका छन् । पृथ्वीकै कमजोर प्रर्दशनको कारण अन्तिम खेलमा दिल्लीले अजिंक्या रहाणेलाई खेलाएको थियो । अजिक्यालाई खेलाउन तीव्र गतिका बलर हर्षल पटेललाई राखेको थियो ।

कप्तान श्रेयस ऐर र ऋषभ पन्तलाई पनि उत्कृष्ट प्रर्दशनको आवश्यक देखिन्छ । ऐरले पनि पछिल्ला खेलहरुमा संघर्ष गरि रहेका छन् । उनी पछिल्लो खेलमा बेंगलोर र हैदराबादविरुद्ध ७–७ रनमा आउट भएका थिए । मुम्बईविरुद्ध २५ रन जोडेका थिए । पन्तले जारी आइपिएलमा ४० रन भन्दा माथिको इनिङ खेल्न सकेका छैनन् ।

बेंगलोरविरुद्धको रहाणे र धवनको अर्ध शतक भने दिल्लीको लागि सकरात्मक पक्ष हो । अनुभवी रहाणेलाई खेलाउँदा दिल्लीको मध्यक्रम थप मजबुत बन्ने छ । दिल्लीले मुम्बईविरुद्ध ओपनरको रुपमा स्टोइनिस र धवनलाई खेलाउन सक्छ । स्टोइनिसले अष्ट्रेलिया तथा बिग ब्यासमा ओपनिङ गर्दै राम्रो प्रर्दशन समेत गरेका छन् । दिल्लीलाई ओपनिङ समस्या समधान गर्ने यो सबैभन्दा राम्रो विकल्प हो ।

दिल्लीले भारतीय कमजोर बलिङका कारण तीन विदेशी बलर खेलाएको थियो । कागिसो रबाडाले २५, एनरिच नोर्कियाले १९ विकेट लिदा डानियल साम्स २ खेलमा विकेट लिन सकेका छैनन् । रबाडा र नोर्कियाको प्रर्दशन दिल्लीका लागि महत्वपूर्ण हुने छ । बेंगलोरविरुद्ध विकेटबिहिन बनेपनि पावर प्लेमा उत्कृष्ट सुरुवात दिलाएका थिए ।

दुबईको बाउन्ड्री ठूलो हुँदा स्पिनर नायक बन्न सक्छन् । स्पिनरलाई प्रर्दशनको लागि सहज पनि हुने छ । त्यसैले रविचन्द्रन आश्विन र अक्षर पटेलले मध्यक्रममा ८ ओभर उत्कृष्ट निकाल्न सक्न सके दिल्लीलाई धेरै सहज हुने छ ।

मुम्बईसँग दिल्लीले जारी सिजनमा लिग चरणका दुबै खेलमा हारेको छ । दुबै पटक पहिला ब्याटिङ गर्दा हारेको थियो । पहिलो खेलमा ५ विकेटले पराजित हुँदा दोस्रोमा दुबईमा ९ विकेटले पराजित भएको थियो । मुम्बईले हारेका पाँच खेल मध्य ४ पहिला ब्याटिङ गर्दा छ । जसले गर्दा दिल्लीले टस जितको खण्डमा बलिङ रोज्न उपयुक्त देखिन्छ । जसले गर्दा खेलमा टसले पनि प्रभाव पार्ने देखिन्छ । लिग चरणका अन्तिम खेलमा टसले ठूलो प्रभाव पारेको थियो ।

यी दुई टोलीबीचको हेड टु हेडमा मुम्बई अगाडि छ । यी दुई टोलीबीच कुल २६ खेल भएको छ । जसमा दिल्ली १२ खेलमा विजयी हुँदा १४ खेलमा पराजित भएको छ । मुम्बई भारतीय र विदेशी दुबैले उच्च प्रर्दशन गरेका छन् । क्विन्टन डी कक, ईशान किशन, सूर्यकुमार यादवले लगातार रन बनाउँदै आएका छन् । हार्दिक पान्ड्या र काइरन पोलार्डदेखि डेथ ओभरमा बच्न आवश्यक देखिन्छ ।

बलिङमा जस्प्रित बुमराह र ट्रेन्ट बोल्टको जोडीले उच्च प्रर्दशन गरेका छन् । बोल्टले २० र बुमराहले २३ विकेट लिएका छन् । दिल्लीले मुम्बईको मध्यक्रम कमजोर बलिङको फाइदा उठाउन सक्नुपर्छ । पावर प्लेमा बोल्ट र डेथ ओभरमा बुमराहले उच्च प्रर्दशन गरि रहँदा मध्यक्रममा भने कमजोर देखिएको छ । क्रुनाल पान्ड्याले १४ खेलमा ५ विकेट लिएका छन् । नाथन कुल्टर नाइलले ५ खेलमा ३ र जेम्श प्याटिन्सनले १० खेलमा ११ विकेट लिएका छन् । त्यसैले पहिलो पावर प्लेमा रन जोड्न हतार गर्न उपयुक्त देखिदैन ।

यता नेपाली लेग स्पिनर सन्दीप लामिछाने लिग चरणका सबै खेलमा बेन्चमा बसेका थिए । आगमी खेलमा पनि बेन्चमानै बस्ने सम्भावना छ । दिल्लीसँग उत्कृष्ट भारतीय बलर छैनन् । त्यसैले बेंगलोरविरुद्धका तीन बलरलाई निरन्तरता दिन सक्छ । मार्कस स्टोइनिस अलराउन्डरको रुपमा खेल्ने छन् । साम्सलाई बेन्चमा राखे शिम्रन हेटमायरलाई मौका दिने छ ।