एजेन्सी – इन्डियन प्रिमियर लिग (आइपिएल) २०२० को पहिलो क्वालिफायरमा आज दिल्ली क्यापिटल्स र मुम्बई इन्डियन्सबीच प्रतिस्पर्धा हुँदैछ । खेल नेपाली समय अनुसार ७ ः ४५ पछि दुबई इन्टरनेशल क्रिकेट स्टेडियममा सुरु हुनेछ ।

चार पटकको च्याम्पियन मुम्बई दिल्लीलाई हराउँदै छैटौं पटक आइपिएलको फाइनलमा पुग्न चाहन्छ । चार पटकको च्याम्पियन मुम्बईलाई हराउँदै दिल्ली आइपिएल इतिहासमा पहिलो पटक फाइनलमा पुग्ने सोचका साथ मैदान प्रवेश गर्नेछ ।

मुम्बई १४ खेलमा ९ मा जित र ५ मा हार सहित १८ अंकका साथ शीर्ष स्थानमा लिग चरण अन्त्य गरेको थियो । दिल्ली १४ खेलमा ८ मा जित र ६ मा हार सहित १६ अंक जोड्दै साथ दोस्रो स्थानका साथ क्वालिफायर खेलेको हो । लिग चरणको दुबै खेलमा मुम्बई विजयी भएको थियो । मुम्बई लिग चरणमा दिल्लीलाई ९ विकेट र ५ विकेटले विजयी भएको थियो ।

आजको विजेता आइपिएलको फाइनलमा पुग्ने छ । पराजित हुने टोलीले फाइनल प्रवेशका लागि पुनः अवसर पाउने छ । शुक्रबार तेस्रो स्थानमा रहेको सनराइजर्स हैदराबाद र चौथो स्थानको रोयल च्यालेन्जर्स बेंगलोरबीच एलिमिनेटरमा प्रतिस्पर्धा हुने छ । विजेता पहिलो क्वालिफायरमा पराजित हुने टोलीसँग आइतबार प्रतिस्पर्धा गर्ने छ । जसको विजेता फाइनलमा प्रवेश गर्ने छ । आइपिएलको फाइनल मंगलबार दुबईमा हुने छ ।

जारी सिजनमा उपाधिको प्रमुख दाबेदार दिल्लीले सुरुवात उत्कृष्ट गरेको थियो । तर लिग चरणका अन्तिम पाँच खेल मध्य चार खेलमा लगातार पराजित भएपछि एक समय प्ले अफमा स्थान बनाउन अंक गणीतिय सम्भावना सम्म पुग्नु परेको थियो ।

अन्तिम खेलमा बेंगलोरलाई ६ विकेटले हराउँदै प्ले अफमा स्थान पक्का गर्न सफल भयो । त्यसअघि दिल्ली मुम्बईसँग ९ विकेट, हैदराबादसँग ८८ रन, कोलकातासँग ५९ रन र पन्जाबसँग ५ विकेटले पराजित हुन पुगेको थियो । दिल्ली उक्त चार हारलाई छोडेर इतिहास रच्न चाहन्छ ।

दिल्लीलाई ओपनर पृथ्वी शा को खराब लयले चिन्ता थपेको छ । शाले पछिल्ला ६ खेलमा कुल ३० रन बनाएका छन् । दुई खेलमा खाता खोल्न नसक्दा एक खेलमा मात्रै दोहोरो अंकका रन जोडेका छन् । शा को स्थान लिने दिल्लीमा अर्को वैकल्पिक ब्याट्सम्यान छैनन् । जसले गर्दा उनलाईनै निरन्तरता दिनुपर्ने बाध्यता छ । शालाई उत्कृष्ट प्रर्दशन गर्नै पर्ने दबाब छ ।

बेंगलोरविरुद्ध अर्का ओपनर शिखर धवन र तेस्रो नम्बरमा ब्याटिङ गरेका अजिंक्या रहाणेले अर्ध शतक प्रहार गरेका थिए । जुन दिल्लीको लागि सकरात्मक पक्ष हो । दुई अनुभवी ब्याट्सम्यानले क्वालिफायरको दबाबमा सम्हालिदै उच्च प्रर्दशन गर्न सक्छन् । कप्तान श्रेयस ऐर र विकेटकिपर ऋषभ पन्तको पनि पछिल्लो खेलमा प्रर्दशन राम्रो छैन ।

पन्तले यस सिजनमा अपेक्षा अनुसार प्रर्दशन गर्न सकेका छैनन् । पन्तले जारी सिजनमा एक इनिङमा ४० रन माथिको प्रर्दशन गर्न सकेका छैनन् । जसले गर्दा पन्तलाई उच्च प्रर्दशन गर्न आवश्यक र दबाब दुबै देखिन्छ । दिल्ली पन्तको स्वभाविक सट र प्रर्दशनको प्रतिक्षामा छ ।

आजको खेलमा दिल्लीले शिम्रन हेटमायरलाई बेन्चमानै राख्न सक्छ । बेंगलोरविरुद्ध बलिङ बलियो बनाउन हेटमायरलाई बेन्चमा राखेर ड्यानियल साम्सलाई खेलाएको थियो । भारतीय तीव्र गतिका बलर आवेश खान, हर्षल पटेल र तुषार देशपान्डेले लगातार खराब प्रर्दशन गर्दा दिल्लीले बेंगलोरविरुद्ध तीन विदेशी तीव्र गतिका बलर खेलाउने निर्णय लिएको थियो । जसले बलिङ युनिट बलियो देखिएको थियो ।

दक्षिण अफ्रिका कागिसो रबाडा र एनरिच नोर्किकाले जारी आइपिएलमा कुल ४४ विकेट लिएका छन् । रबाडाले २५ र नोर्कियाले १९ विकेट चट्काउँदै उच्च प्रर्दशन गरेका छन् । मुम्बईविरुद्ध यी दुबै बलरलाई उच्च प्रर्दशन गर्न आवश्यक देखिन्छ । नोर्किया र रबाडा दिल्लीका प्रमुख हतियार हुन् ।

स्पिनरको रुपमा दुबै अफ स्पिनर रविचन्द्रन आश्विन र अक्षर पटेल खेल्ने छन् । यी दुबै खेलाडी तल्लोक्रममा ब्याटिङको क्षमता समेत राख्ने गर्दछन् । तर दुबईको पिचमा बलमा योगदान दिन आवश्यक देखिन्छ । मार्कस स्टोइनिस अलराउन्डरको रुपमा खेल्नेछन् । तल्लोक्रममा दिल्लीको ब्याटिङ स्टोइनिसमाथि निर्भर रहने छ ।

बेंगलोरविरुद्ध टोलीमा परिवर्तन गर्ने सम्भावना कम छ । नेपाली लेग स्पिनर सन्दीप लामिछाने बेन्चमानै बस्ने सम्भावना देखिन्छ ।

मुम्बईमा भारतीय र विदेशी खेलाडी सबैले उच्च प्रर्दशन गरेका छन् । क्विन्टन डी कक, ईशान किशन, सूर्यकुमार यादवले लगातार रन बनाउँदै आएका छन् । क्विन्टन डी ककले १४ खेलमा ४ सय ४३ रन बनाएका छन् । सूर्यकुमार यादव ४ सय १० र ईशान किशनले ४ सय २८ रन बनाएका छन् । पोलार्डले १९३ को स्ट्राइक रेटमा २२ छक्का साथ २ सय २ सय ५९ रन बनाएका छन् ।

मुम्बई एक दुई खेलाडीमा निर्भर छैन । बलिङमा जस्प्रित बुमराह र ट्रेन्ट बोल्टको जोडीले उच्च प्रर्दशन गरेका छन् । बोल्टले २० र बुमराहले २३ विकेट लिएका छन् । मुम्बईको मध्यक्रम भने केहि कमजोर देखिन्छ । क्रुनाल पान्ड्याले १४ खेलमा ५ विकेट लिएका छन् । नाथन कुल्टर नाइलले ५ खेलमा ३ र जेम्श प्याटिन्सनले १० खेलमा ११ विकेट लिएका छन् । रोहित चोटबाट फर्किएको हुँदा ठूलो इनिङ खेल्न कठिन हुन सक्छ ।

यी दुवै टोलीमा भारतीय र विदेशी खेलाडी म्याच विनरको रुपमा छन् । दुबै टोली एक वा दुई खेलाडीमा निर्भर छैन । बलिङमा रबाडाविरुद्ध बुमराह र नोर्कियाविद्ध बोल्टलाई हेरिएको छ । ब्याटिङमा डी ककविरुद्ध धवन, सूर्यकुमारविरुद्ध ऐर र पोलार्डविरुद्ध पन्तलाई हेरिएको छ । जसले गर्दा क्वालिफायरमा उच्च प्रतिस्पर्धाको अपेक्षा गरिएको छ । लिग चरणको खेलमा अपेक्षा अनुसार प्रर्दशन हुन सकेको थिएन ।

मुम्बईले सन् २०१३, २०१५, २०१७ र २०१९ मा उपाधि जितेको थियो । सन् २०१० मा फाइनलमा चेन्नईसँग पराजित हुन पुगेको थियो । खेलेका पाँच फाइनल मध्य चारमा मुम्बईले उपाधि जितेको छ । मुम्बइ अन्तिम खेलमा हैदराबादसँग १० विकेटले पराजित भएको थियो । उक्त खेलमा हार्दिक, बुमराह र बोल्टलाई बिश्राम दिएको थियो । यी प्रमुख तीन खेलाडी आज टोलीमा फर्किने छन् ।

आजको खेलमा टसले पनि प्रभाव पार्ने देखिन्छ । जारी सिजनमा मुम्बईले हारेका पाँच मध्य चार लक्ष्य पछ्याउँदा छ । जसले गर्दा पहिला ब्याटिङ गर्दा मुम्बई केहि दबाबका साथ सस्तैमा समेटिन सक्छ ।