एजेन्सी – इन्डियन प्रिमियर लिग (आइपिएल) २०२० को १३ औं संस्करणको पहिलो क्वालिफायरमा आज दिल्ली क्यापिटल्स र मुम्बई इन्डियन्स खेल्दैछन् । नेपाली समय अनुसार साँझ ७:४५ पछि दुबई इन्टरनेशल क्रिकेट स्टेडियममा खेल सुरु हुनेछ ।

चार पटकको च्याम्पियन मुम्बई दिल्लीलाई हराउँदै छैटौं पटक आइपिएलको फाइनलमा स्थान बनाउने रणनीतिका साथ मैदान प्रवेश गर्ने छ । चार पटकको च्याम्पियन मुम्बईलाई निराश बनाउँदै दिल्ली आइपिएल इतिहासमा पहिलो पटक फाइनलमा पुग्दै इतिहास रच्न चाहन्छ । लिग चरणमा दिल्ली दुबै खेल मुम्बईसँग पराजित भएको थियो ।

विजेता फाइनलमा पुग्दा पराजित हुने टोलीले थप एक अवसर पाउने छ । शुक्रबार तेस्रो स्थानमा रहेको सनराइजर्स हैदराबाद र चौथो स्थानको रोयल च्यालेन्जर्स बेंगलोरबीच एलिमिनेटरमा प्रतिस्पर्धा हुने छ । विजेता पहिलो क्वालिफायरमा पराजित हुने टोलीसँग आइतबार प्रतिस्पर्धा गर्ने छ । जसको विजेता फाइनलमा प्रवेश गर्ने छ । आइपिएलको फाइनल मंगलबार छ ।

जितका लागि टोलीका प्लेइङ ११ मा रहेका सबै खेलाडीले आ–आफ्नो तर्फबाट योगदन दिन सक्नुपर्छ । जितको लागि एक पक्षमात्र बलियो भएर हुँदैन । कुनैपनि टोली च्याम्पियन बन्न ब्याटिङ, बलिङ, फिल्डिङ, कप्तानी, रणनीति, प्लेइङ ११ देखि सबै कुरा मिलेको हुनुपर्छ । क्रिकेटमा एक खेलाडीले मात्र जित दिलाउन सक्दैन ।

क्रिकेट टोलीको खेल हो । तर एउटा खेलाडीको प्रर्दशनले जित भने सहज हुन पुग्छ । एउटा खेलाडीले खेललाई पूरै परिवर्तन गर्न सक्छ । उक्त टोलीमा रहेको प्रमुख खेलाडीको प्रर्दशनले अन्य खेलाडीको मनोबलमा समेत प्रभाव पार्ने गर्दछ । मुम्बई र दिल्लीबीचको खेलमा प्रभाव पार्न सक्ने खेलाडी यसप्रकार छन् :

कागिसो रबाडा (दिल्ली)

दक्षिण अफ्रिका युवा तीव्र गतिका बलर कागिसो रबाडा दिल्लीका प्रमुख हतियार हुन् । उनको उच्च प्रर्दशन विना मुम्बईविरुद्ध जित कठिन देखिन्छ । लगातार उच्च प्रर्दशन गर्दै आएका रबाडाले यस सिजनमा पनि आफ्नो प्रभाव जमाई रहेका छन् ।

१४ खेलमा २५ विकेटका साथ शीर्षस्थानमा छन् । इकोनमी ८.१४ रहँदा उत्कृष्ट प्रर्दशन ४–२४ छ । मुम्बईविरुद्ध पहिलो खेलमा २८ रन खर्चेर २ विकेट लिएका रबाडा दोस्रो खेलमा विकेटबिहिन बनेका थिए । डेथ ओभर स्पेलिष्ट रबाडाले उत्कृष्ट प्रर्दशन गर्न सके दिल्लीले जित सहज हुन सक्छ ।

जस्प्रित बुमराह (मुम्बई)

तीव्र गतिका बलर जस्प्रित बुमराह भारतीय क्रिकेट तथा मुम्बईका प्रमुख हतियार हुन् । मुम्बईलाई शीर्षस्थानमा रहँदै क्वालिफायर खेलाउन बुमराहको योगदान उच्च छ । बुमराहले १४ खेलमा २३ विकेट लिदै पर्पल क्यापको लागि रबाडालाई पछ्याई रहेका छन् । उच्च प्रर्दशन ४–२० रहँदा इकोनमी ७ भन्दा कम छ ।

योर्करका लागि माहिर बुमराह पहिलो खेलमा विकेटबिहिन बनेपनि दोस्रो खेलमा १७ रन खर्चेर ३ विकेट लिएका थिए । बुमराहले ऋषभ पन्तलाई ३० बल बलिङ गर्दा ३२ रन खर्चेर ५ पटक आउट गरेका छन् । बुमराह मुम्बईका लागि पुन नायक बन्न सक्छन् ।

शिखर धवन (दिल्ली)

शिखर धवन दिल्लीका प्रमुख हतियार हुन् । धवनले १४ खेलमा २ शतक र ३ अर्ध शतक सहित कुल ५ सय २५ रन बनाएका छन् । शीर्षक्रमका धवनले उत्कृष्ट सुरुवात दिदा मध्यक्रमका ब्याट्सम्यानलाई खुलेर खेल्न सहज हुने छ ।

अर्का ओपनर पृथ्वी शा खराब लयबाट गुज्रिरहँदा धवनले जिम्मेवारीका साथ उत्कृष्ट इनिङ विना जित कठिन बन्न सक्छ । मुम्बईविरुद्ध पहिलो खेलमा ६९ रनमा अविजित रहँदा दोस्रो खेलमा शून्यमा आउट भएका थिए । पछिल्लो खेलमा बेंगलोरविरुद्ध अर्ध शतक जोडेका धवनले उच्च प्रर्दशन गरे दिल्लीले सहज जित हात पार्न सक्छ ।

क्विन्टन डी कक (मुम्बई)

दक्षिण अफ्रिकी विकेटकिपर डी ककले मुम्बईबाट ओपनिङ गर्दै राम्रो प्रर्दशन गरि रहेका छन् । जारी आइपिएलमा डी ककले १४ खेलमा ४ सय ४३ रन बनाएका छन् । डी ककले आक्रामक रुपमा रन जोडि रहेका छन् ।

लिग चरणको पहिलो खेलमा डी ककले दिल्लीविरुद्ध ३६ बलमा ५३ रन जोड्दै प्लेयर अफ द म्याच चुनिएका थिए । दोस्रो खेलमा २६ रनमा आउट भएका थिए । अर्कोतर्फ डी कक विकेटकिपर मार्फत पनि खेललाई मोड्न सक्ने क्षमता राख्ने गर्दछन् ।

काइरन पोलार्ड (मुम्बई)

वेस्टइन्डिजका पोलार्ड दिल्लीलाई घातक बन्न सक्ने मुम्बईका फिनिसर हुन् । पोलार्डले एकै ओभरमा खेललाई मोड्न सक्ने क्षमता राख्छन् । ठूला सट खेल्न रुचाउने पोलार्डले जारी सिजनमा त्यसै अनुसार प्रर्दशन गरि रहेका छन् ।

पोलार्डले १० इनिङ मध्य ७ पटक अविजित रहेका छन् । जसमा १ सय ९३ को स्ट्राइक रेटमा ब्याटिङ गर्दा कुल २ सय ४९ रन जोडेका छन् । जसमा २२ छक्का सामेल छ । उनले १६–२० ओभरमा २० छक्का प्रहार गरेका छन् । पोलार्डले उत्कृष्ट अन्त्यका साथ विशाल योगफलमा पुर्याउन सक्छन् । मुम्बईको प्रर्दशनमा नायक बन्दै आएका छन् ।

मार्कस स्टोइनिस (दिल्ली)

अष्ट्रेलियन अलराउन्डर मार्कस स्टोइनिसको प्रर्दशनले दिल्लीलाई ठूलो प्रभाव पार्ने छ । तल्लोक्रममा ऋषभ पन्तले संघर्ष गरि रहँदा स्टोइनिसलाई उत्कृष्ट फिनिसिङ गर्नुपर्ने चुनौती छ । केहि खेलमा उनले ब्याट र बल दुबैमा उच्च प्रर्दशन गरेका छन् ।

स्टोइनिसले २ सय ४९ रन बनाउँदा ८ विकेट लिएका छन् । मध्यक्रममा बलिङ गर्ने उनी दिल्लीको सवैभन्दा राम्रो र उपयुक्त वैकल्पिक बलर हुन् ।