एजेन्सी – इन्डियन प्रिमियर लिग (आइपिएल) को एलिमिनेटर खेलमा आज रोयल च्यालेन्जर्स बेंगलोर र सनराइजर्स हैदराबादबीच प्रतिस्पर्धा हुँदैछ । खेल नेपाली समय अनुसार बेलुका ७:४५ पछि शेख जायद स्टेडियम आबूधाबीमा सुरु हुनेछ ।

आजको विजेता टोली दोस्रो क्वालिफायरमा पुग्ने छ । पहिलो क्वालिफायरमा दिल्ली क्यापिटल्सलाई हराउँदै मुम्बई इन्डियन्स फाइनलमा पुगि सकेको छ । आजको विजेताले फाइनलमा पुग्न दोस्रो क्वालिफायरमा आइतबार दिल्ली क्यापिटल्ससँग प्रतिस्पर्धा गर्नुपर्ने हुन्छ । हैदराबाद तेस्रो र बेंगलोर चौथो स्थानमा रहेर एलिमिनेटरमा स्थान बनाएका हुन् ।

लिग चरणको पहिलो खेलमा बेंगलोर १० रनले विजयी हुँदा दोस्रो खेलमा हैदराबादसँग ५ विकेटले पराजित भएको थियो । हैदराबाद पछिल्ला तीन खेलमा लगातार जित निकाल्दै प्ले अफमा स्थान बनाएको हो । जसक्रममा हैदराबादले मुम्बईलाई १० विकेट, बेंगलोरलाई ५ विकेट र दिल्लीलाई ८८ रनले हराएको थियो । बेंगलोर पछिल्ला चार खेलमा लगातार पराजित भएको छ ।

बेंगलोर दिल्लीसँग ६ विकेट, हैदराबादसँग ५ विकेट, मुम्बईसँग ५ विकेट र चेन्नई सुपर किंग्स ८ विकेटले पराजित भएको थियो । बेंगलोर उत्कृष्ट पूनरागमन गर्न चाहन्छ । हैदराबाद आफ्नो लयलाई निरन्तरता दिन खोज्ने छ । विराट कोहलीको नेतृत्वमा रहेको बेंगलोर र डेभिड वार्नरको कप्तानीमा रहेको हैदराबादबीच कडा प्रतिस्पर्धाको आशा राखिएको छ ।

पछिल्लो खेलमा मुम्बईलाई हराएको हैदराबादको मनोबल उच्च छ । उक्त खेलमा मुम्बईले प्रस्तुत गरेको १ सय ५० रनको लक्ष्य कुनै हैदराबादले विकेट नगुमाई पूरा गरेको थियो । जसक्रममा कप्तान डेभिड वार्नर ८५ रन र ऋद्धिमान शाह ५८ रनमा अविजित रहेका थिए । अन्तिम तीन खेलमा हैदराबादलाई लगतार जित दिलाउन यी दुई ब्याट्सम्यान नायक बन्दै आएका छन् ।

वार्नरले पछिल्ला चार खेलमा १ सय ९४ रन बनाएका छन् । शाहले पछिल्ला तीन खेलमा क्रमश : ५८, ३९ र ८७ रन जोडेका छन् । यी दुईको लय हैदराबादको मनोबल उच्च छ । तर यी दुई ब्याट्सम्यानलाई मनिष पान्डे, केन विलियम्सन र प्रियम गर्गले मध्यक्रममा राम्रो साथ दिन आवश्यक देखिन्छ ।

तल्लोक्रममा जेसन होल्डर, अब्दुल सामद, अभिषेक शर्माले उत्कृष्ट अन्त्य गर्न आवश्यक देखिन्छ । बलिङमा सन्दीप शर्माले लगातार उच्च प्रर्दशन गर्दै आएका छन् । उनले आफ्नो लयलाई निरन्तरता दिन आवश्यक देखिन्छ । मुम्बईविरुद्ध उनले तीन विकेट लिएका थिए । मुम्बईविरुद्ध प्लेयर अफ द म्याच चुनिएका शहबाज नदिमबाट हैदराबाद त्यस्तै उत्कृष्ट प्रर्दशनको अपेक्षा राख्ने छ ।

स्पिनर राशिद खान प्रमुख हतियार हुन् । उनको प्रर्दशन निकै महत्वपूर्ण हुने देखिन्छ । योर्करका लागि परिचित टि नटराजनले डेथ ओभरमा उच्च प्रर्दशन गर्न आवश्यक देखिन्छ । हैदराबादले प्रियम गर्ग वा अभिषेक शर्मा मध्य एकलाई बेन्चमा राखेर युवा ब्याट्समयान विराट सिंहलाई मौका दिन सक्छ । विराटले भारतीय घरेलु क्रिकेटमा उच्च प्रर्दशन गर्दै आएका छन् ।

यता बेंगलोर पछिल्ला चार खेलमा लगातार हारको नजिताबाट पाठ सिक्दै हैदराबादविरुद्ध उत्कृष्ट जितका साथ क्वालिफायरमा चाहन्छ । दिल्लीविरुद्ध १२ रनमा आउट भएका जोश फिलिपेको स्थानमा आरोन फिन्चलाई मौका दिन सक्छ । युवा ब्याट्सम्यान देवदत्त पाडिक्कलले लगातार राम्रो प्रर्दशन गर्दै आएका छन् । उनलाई अन्य ब्याट्सम्यानले राम्रो साथ दिन आवश्यक देखिन्छ ।

कप्तान विराट कोहलीबाट बेंगलोर ठूलो इनिङ चाहन्छ । आक्रामक ब्याट्सम्यान एबी डी भिलियर्सको प्रर्दशन बेंगलोरलाई निकै महत्वपूर्ण हुने छ । उनको उच्च प्रर्दशन बिना बेंगलोरको जित कठिन पर्ने छ । बेंगलोरलाई कमजोर बलिङ भने चिन्ताको विषय हो । दिल्लीविरुद्ध घाइते नवदीप सैनी आज टोलीमा फर्किने सम्भावना छ । सैनी फर्किदा शिवम् दुबे बेन्चमा बस्ने छन् । स्पिनर युजभेन्द्र चहल उसका बलिङ हतियार हुन् । क्रिस मोरिसको प्रर्दशन बेंगलोरलाई निकै महत्वपूर्ण हुने छ । स्पिनर वासिन्टन सुन्दरले लगातार कसिलो बलिङ गर्दै आएका छन् । इसुरु उडानाको स्थानमा मोईन अलीलाई मौका दिन सक्छ ।