काठमाडौं (हाम्रो खेलकुद) – राष्ट्रिय क्रिकेट टोलीका युवा ब्याट्सम्यान रोहित कुमार पौडेलको दोस्रो पिसिआर रिपोर्ट नेगेटिभ आएको छ ।
मंगलबार पिसिआर परिक्षण गराउँदा रोहित सहित कप्तान ज्ञानेन्द्र मल्ल र उप कप्तान दीपेन्द्र सिंह ऐरीको पिसिआर रिपोर्ट पोजेटिभ आएको थियो । जसमा खेलाडीमा कुनै लक्षण नदेखिएपछि पुन: परिक्षण गरिएको थियो । जसमा अन्य खेलाडीको रिपोर्ट भने आइ सकेको बताइएको छ । रोहितले आफ्नो दोस्रो रिपोर्ट नेगेटिभ आएको जानकारी दिएका छन् ।
नेपाली राष्ट्रिय क्रिकेट टोली बिहिबार देखि बन्द प्रशिक्षण गर्नुअघि १६ खेलाडीले पिसिआर परिक्षण गरेका थिए । जसमा तीन जनाको रिपोर्ट पोजेटिभ आएको थियो । त्यस्तै वसन्त रेग्मीलाई पनि कोरोना संक्रमण देखिएको छ । वसन्त भने गृहनगर भैरहवामा छन् ।
तीन खेलाडीसँगै उनको सम्पर्कमा आएका ६ खेलाडीलाई होटलमा राख्दा पहिलो दिन बिहिबार ९ खेलाडी मात्रै प्रशिक्षण सहभागी थिए । २५ दिनको प्रशिक्षणपछि एक हप्ता बिदा हुनेछ । उक्त समयमा प्रधानमन्त्री एकदिवसिय कप हुने सम्भावना छ ।
बन्द प्रशिक्षणको समयमा ए, बी र सी टोली बनाएर अभ्यास खेल खेलाउने तयारी गरिरहेको छ । जसमा भारतमा रहेका नेपाली मुलका खेलाडी आउन सक्ने सम्भावना छ । मार्चमा ओमानमा आइसिसी एक दिवसिय विश्वकप त्रिकोणात्मक सिरिज नभएको खण्डमा नेपालले विदेशमा बलियो टोलीसँग अभ्यास गर्ने क्यानले जनाएको छ ।
