एजेन्सी – अन्तर्राष्ट्रिय क्रिकेट परिषद् (आइसिसी) ले भारतीय क्रिकेट टोलीका खेलाडीलाई कारवाही गरेको छ । पहिलो ओडिआई खेलमा शुक्रबार अष्ट्रेलियाविरुद्ध पराजित हुने क्रममा भारतीय खेलाडीले ‘स्लो ओभर रेट’ का कारण २० प्रतिशत म्याच फि काटिने भएको छ ।
आइसिसीका इलिट प्यानलका म्याच रेफ्रि डेभिड बुनले विराट कोहलीको कप्तानी रहेको भारतले सिड्नीमा अष्ट्रेलियासँग पहिलो ओडिआई खेलमा निर्धारित समय भन्दा एक ओभर ढिला गरेको हुँदा कारवाही गर्नुपरेको जनाएका छन् । जसका कारण म्याच फि वापत सबै खेलाडीको २० प्रतिशत रकम काटिएको छ ।
आइसिसीको नियम २.२२ का अनुसार एक ओभर निर्धारित समयभन्दा ढिला भएमा २० प्रतिशत म्याच फि रकम काटिने गर्दछ । कप्तान विराटले यस गल्ती स्वीकार गरेका छन् ।
भारत अष्ट्रेलियासँग पहिलो ओडिआई खेलमा ६६ रनले पराजित भएको थियो । सिड्नीमा टस जितेर पहिला ब्याटिङ गरेको अष्ट्रेलियाले निर्धारित ५० ओभरमा ६ विकेट गुमाउँदै ३ सय ७४ रन बनाएको थियो ।
उक्त विजयी लक्ष्य पछ्याएको भारतले ५० ओभरमा ८ विकेट गुमाउँदै ३ सय ८ रन बनाएको थियो । अष्ट्रेलियाको जितमा आरोन फिन्चले १ सय १४ र स्टिभ स्मिथले १ सय ५ रनको शतकीय इनिङ खेल्दा बलिङमा स्पिनर एडम जाम्पाले ४ र जोश हेजलवुडले तीन विकेट लिएका थिए ।
तीन खेलको ओडिआई सिरिजमा अष्ट्रेलियाले १–० को अग्रता लिएको छ । दोस्रो खेल सिड्नीमा आइतबार हुनेछ ।
