दाङ (हाम्रो खेलकुद) – लमहीमा जारी प्रधानमन्त्री राष्ट्रिय महिला टि ट्वान्टी क्रिकेट प्रतियोगिता अन्तर्गत समूह बी को पहिलो खेलमा सुदूरपश्चिमले गण्डकी प्रदेशलाई १ सय ८ रनको मध्यम लक्ष्य दिएको छ ।

देउखुरी क्रिकेट मैदानमा टस जितेर पहिला ब्याटिङ रोजेको सुदूरपश्चिम १९.३ ओभरमा १ सय ७ रनमा अल आउट भएको छ । सुदूरपश्चिमकी ओपनर रेवती धामीले ३६ बलमा २ चौका सहित सर्वाधिक २७ रनको योगदान दिइन् ।

चौथो ओभरको दोस्रो बलमा सृष्टि पौडेलले ओपनर मन्जु बोगटीलाई १० रनमा बोल्ड आउट गरेकी थिइन् । मन्जुले १४ बलमा १ चौका प्रहार गरिन् । छैटौं ओभरको तेस्रो बलमा स्पिनर एलिसा लामिछानेको बलमा ठूलो सट खेल्नेक्रममा कविता कुवँरलाई ७ रनमा सिमाना केसीबाट क्याच आउट हुन पुगेकी थिइन् ।

आठौं ओभरको अन्तिम बलमा डली भट्ट एलिसा लामिछानेको बलमा २ रनमा कट एण्ड बोल्ड आउट भएपछि सुदूरपश्चिम केहि समस्यामा परेको थियो । १४ औं ओभरको अन्तिम बलमा ज्योत्स्निका मरासैनीले रेवतीलाई विकेटकिपर सोनिया थापाबाट क्याच आउट भएपछि ठूलो योगफल टाढिएको थियो

। अन्जली विश्वकर्माले कप्तान विन्दु रावललाई १३ रनमा बोल्ड आउट गरेकी थिइन् । रुवि पोदार पनि ५ रनमा आउट हुँदा ऋतु कनोजिया ७ रनमा अविजित रहिन् ।

स्पिनर एलिसा लामिछानेले ४ ओभरमा १६ रन खर्चेर ३ विकेट लिइन् । तीव्र गतिकी बलर सृष्टि पौडेलले ३।३ ओभरमा १६ रन खर्चिदै ३ विकेट लिइन् । ज्योत्स्निका मरासैनी, अन्जली विश्वकर्मा, कुसुम गोदर ले समान १ विकेट लिए ।