दाङ (हाम्रो खेलकुद) – लमहीमा जारी सगरमाथा प्रधानमन्त्री राष्ट्रिय महिला टि२० क्रिकेट प्रतियोगिता अन्तर्गत समूह बी को तेस्रो खेलमा प्रदेश १ ले सुदूरपश्चिममाथि ५ विकेटले रोमाञ्चक जित हात पारेको छ । जितका लागि ५४ रनको विजयी लक्ष्य पछ्याएको प्रदेश नम्बर १ ले १५.१ ओभरमा ५ विकेट गुमाउँदै पूरा गर्यो ।

जितको लागि अन्तिम ओभरमा ४ रन चाहिएको थियो । युवा अलराउन्डर निग्मा तामाङले सम्झना खड्कालाई पहिलो बलमा डिप स्क्वायर लेगमा उत्कृष्ट चौका प्रहार गर्दै जित पक्का गरिन् । निग्मा ७ र संगिता २ रन बनाइन् ।

चौथो ओभरको दोस्रो बलमा युवा मध्यगतिकी बलर दीपा जोराले विकेटकिपर काजल श्रेष्ठलाई १ रनमा एलबिडब्लू आउट गर्दै पहिलो सफलता दिलाएकी थिइन् । लेग साइडमा सट खेल्नेक्रममा मिस भएपछि एलबिडब्लू आउटको शिकार बन्नु परेको थियो ।

अर्को बलमा कप्तान रुविना क्षेत्री कभरमा सट खेल्नेक्रममा प्वाइन्टमा कविता कुवँरले उत्कृष्ट क्याच लिएपछि खेल सुदूरपश्चिम दबाबमा परेको थियो । रुविनाले १२ बलमा १ छक्का सहित १२ रन बनाइन् । छैटौं ओभरको चौथो बलमा तालमेल नमिल्दा रोमा थापा ५ रनमा रन आउट हुन पुगिन् ।

कविता जोशीको दशौं ओभरको अन्तिम बलमा लाखिता राजवंशी अघि बढेर सट खेल्ने धुनमा मिस भएपछि विकेटकपिर मन्जु बोगटीबाट रन आउट हुँदा टोली ३९–४ को अवस्थामा पुगेको थियो । १३ औं ओभरको दोस्रो बलमा कविता कुवँरले अप्सरी बेगमलाई ९ रनमा बोल्ड आउट गरेपछि खेल रोमान्चक बन्न पुगेको थियो ।

कविता कुवँरले ४ ओभरमा १ मेडन सहित १२ रन खर्चेर १ विकेट लिइन् । मध्यगतिकी बलर दीपा जोराले ३ ओभरमा १८ रन खर्चेर २ विकेट लिइन् । स्पिनर कविता जोशीको नाममा १ विकेट रह्यो ।

त्यसअघि देउखुरी क्रिकेट मैदानमा टस जितेर पहिला ब्याटिङ रोजेको सुदूरपश्चिमले निर्धारित १६ ओभरमा ८ विकेट गमाउँदै ५३ रन बनाउँएका थिए । सुदूरपश्चिमकी कविता जोशीले १७ बलमा १ चौका सहित सर्वाधिक १४ रनमा अविजित रहिन् । लक्ष्मी साउँद १२ बलमा १ चौका सहित ९ रनमा अविजित रहिन् । अन्य ब्याटरले भने राम्रो प्रर्दशन गर्न सकेनन् ।

दोस्रो ओभरको तेस्रो बलमा कप्तान रुविना बेलबासे क्षेत्रीले ओपनर रुवि पोद्दरलाई २ रनमा बोल्ड आउट गर्दै टोलीलाई पहिलो सफलता दिलाएकी थिइन् । तेस्रो ओभरको ओभरको पहिलो बलमै प्रमुख ब्याटर कविता कुवँरलाई सबनम राईले शून्यमा एलबिडब्लू आउट गरिन् ।

पाँचौं ओभरको अन्तिम बलमा ओपनर रेवती धामी ८ रनमा रन आउट हुन पुगेकी थिइन् । स्पिनर संगिता राईले नवौं ओभरको दोस्रो बलमा विन्दु रावललाई २ रनमा बोल्ड आउट गरिन् । दुई बलपछि मन्जु बोगटी शून्यमा बोल्ड आउट हुँदा सुदूरपश्चिम ५–१९ को अवस्थामा पुगेको थियो । संगिताले अन्तिम बलमा ऋतु कनौजियालाई १ रनमा बोल्ड आउट गरिन् । सबनमले सम्झना खड्कालाई १ रनमा बोल्ड आउट गरिन् ।

निग्मा तामाङको १३ औं ओभरको दोस्रो बलमा आक्रामक ब्याटर डली भट्ट खराब सट खेल्दै कभरमा लाखिता राजवंशीबाट ५ रनमा क्याच आउट भएपछि सुदुरको राम्रो योगफलको झिनो आशा पनि टाढिएको थियो ।

स्पिनर संगिता राईले ४ ओभरमा १० रन खर्चेर प्रमुख ३ विकेट लिइन् । सबनम राईले ३ ओभरमा १४ रन खर्चेर २ विकेट लिइन् । रुविना र निग्माले एक एक विकेट लिइन् ।

विहीबार पहिलो खेलमा सुदूरपश्चिम र बागमती तथा दोस्रो खेलमा गण्डकी र प्रदेश १ भिड्ने छन् ।