काठमाडौं (हाम्रो खेलकुद) – चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा समूह बी मा रहेको बागमती प्रदेशले लगातार तेस्रो जित निकाल्दै सेमिफाइनल नजिक पुगेको छ । शुक्रबार बागमतीले प्रदेश २ लाई ६ विकेटले पराजित गर्दै लगातार तेस्रो जित निकालेको हो ।

जितका लागि १ सय ८० रनको विजयी लक्ष्य पछ्याएको बागमतीले ४८.२ ओभरमा ४ विकेटको क्षतिमा पूरा गर्यो । बागमतीका लागि पृथु बास्कोटा ७५ बलमा ४ चौका र १ छक्का सहित ५३ रनमा अविजित रहे । पृथुको यो लगातार दोस्रो अर्धशतक हो । यसअघि पृथुले सुदूरपश्चिम ८४ रनको उत्कृष्ट इनिङ खेलेका थिए । पृथुले राहुल प्रताप सिंहलाई चौका प्रहार गर्दै खेल अन्त्य गर्नुको साथैं आफ्नो अर्धशतक पूरा गरेका थिए ।

ओपनर आकाश थापा ६२ बलमा ४ चौका ३२ रनमा आउट भए । विभत्सु थापाले ९३ बलमा ३ चौका प्रहार गर्दै ४७ रन जोडे । ईशान पान्डे १५ र आदिल खान ५ रनमा आउट भए । प्रदेश २ का हरिशंकर शाहले २, कुमार थापा र विशाल शुश्लिङले १–१ विकेट लिए ।

त्यसअघि मुलपानी क्रिकेट मैदानमा टस जितेर पहिला ब्याटिङ थालेको प्रदेश दुई ४८.२ ओभरमा १ सय ७९ रनमा अल आउट भएको थियो । प्रदेश २ का युवा अलराउन्डर विवेक यादव अन्तिम विकेटका रुपमा रन आउट हुनुअघि ७४ बलमा ३ चौका र ३ छक्का सहित सर्वाधिक ६६ रनको योगदान दिए । विवेकले ६७ बलमा जारी प्रतियोगितामा आफ्नो दोस्रो अर्धशतक पूरा गरेका थिए । विवेकले लुम्बिनीविरुद्ध ५१ रनको अर्धशतकीय इनिङ खेलेका थिए ।

छैटौं ओभरको पहिलो बलमा गौतम केसीले हरिशंकर शाहलाई ६ रनमा एलबिडब्लू आउट गर्दै पहिलो सफलता दिलाएका थिए । सातौं ओभरको अन्तिम बलमा रामनरेश गिरीले रवि सिंहलाई शून्यमा एलबिडब्लू आउट गरे । १३ औं ओभरको पाँचौं बलमा विशाल शुश्लिङ ५ रनमा क्याच आउट भए । १४ औं ओभरको पहिलो बलमा सुधिर चौधरीलाई गौतमले १५ रनमा ईशान पान्डेबाट क्याच आउट गराए ।हिमान्शु दत्त शून्य, महबुब आलम २ र कप्तान सुरज कुर्मी १३ रनमा आउट हुँदा प्रदेश दुई २४।१ ओभरमा ६९–७ को अवस्थामा पुगेको थियो ।

आठौं विकेटका लागि बिवेक यादव र राहुल प्रताप सिंहले ५३ रनको साझेदारी गर्दै प्रदेश २ लाई मध्यम योगफलसम्म पुर्याएका थिए । ३९ औं ओभरको तेस्रो बलमा तिलकराज भण्डारीले राहुललाई १८ रनमा बोल्ड गर्दै साझेदारी तोडेका थिए । ६२ बल खेलेका उनले कुनैपनि बाउन्ड्री प्रहार गर्न सकेनन् । कुमार थापाले ३१ बलमा २ छक्का सहित २२ रनमा बनाउँदै आउट भए ।

तीव्र गतिका बलर गौतम केसीले १० ओभरमा १ मेडन सहित २९ रन खर्चेर ४ विकेट लिए । राम नरेश गिरीले १० ओभरमा ३ मेडन सहित ३५ रन खर्चेर २ विकेट लिए । विपिन आचार्य, नन्दन यादव र तिलकराज भण्डारीले १–१ विकेट लिए ।

बागमती तीन खेलमा तीनमानैै जित सहित समूह बीको शीर्ष स्थानमा छ । बागमतीले माघ ११ मा आफ्नो अन्तिम खेलमा लुम्बिनीसँग मुलपानीमा खेल्ने छ । प्रदेश दुई ले आफ्नो तेस्रो खेल माघ ११ मा टियुमा सुदूरपश्चिमसँग खेल्ने छ ।