काठमाडौं (हाम्रो खेलकुद) – नेपाल एपिएफ क्लब तथा नेपाली राष्ट्रिय क्रिकेट टोलीका युवा ब्याट्सम्यान सन्दीप जोराले चौथो संस्करणको प्रधानमन्त्री कप एकदिवसिय क्रिकेट प्रतियोगितामा कर्णाली प्रदेशविरुद्ध अर्ध शतक प्रहार गरेका छन् ।
टियु क्रिकेट मैदानमा टस जितेर पहिला ब्याटिङ थालेको एपिएफले ३९ ओभरमा ६ विकेट गुमाउँदै १ सय ६३ रन बनाएको छ । जोराले ६५ बलमा अर्धशतक पूरा गरेका हुन् । जोराले ३८ औं ओभरको चौथो बलमा दीनेश अधिकारीलाई चौैका प्रहार गर्दै अर्धशतक पूरा गरेका थिए । सन्दीप जोरा ६६ बलमा ५ चौका र १ छक्का सहित ५२ रनमा अविजित छन् । जोरालाई वसन्त रेग्मीले ५ रनमा साथ दिएका छन् ।
एपिएफका ओपनर रित गौतमलाई पहिलो ओभरको तेस्रो बलमै अनुज चुनराले युनिस सिंहबाट शून्यमा क्याच आउट गराएका थिए । चुनराले नवौं ओभरको दोस्रो बलमा चुनरालेनै शरद भेषावकरलाई हिमान्शु शाहीबाट ८ रनमा क्याच गराए । राज शाहले १४ औं ओभरको चौथो बलमा सुबास खकुरेललाई २३ रनमा एलबिडब्लू आउट गर्दै कर्णालीले राम्रो सुरुवात गरेको थियो । सुबासले ४० बलको सामना गर्दा ४ चौका प्रहार गरे ।
स्पिनर दिवान पुनले १७ औं ओभरको पहिलो बलमै कप्तान रविन्द्रजंग शाहीबाट शंकर रानालाई १५ रनमा क्याच आउट गराएपछि एपिएफ दबाबमा परेको थियो । शंकरले २८ बलमा १ चौका प्रहार गरे । लगत्तै सुमित महर्जन १० रनमा क्याच आउट हुँदा एपिएफ १७.२ ओभरमा ६७–५ को अवस्थामा पुगेको थियो ।
छैटौं विकेटका लागि सन्दीप जोरा र अमरसिंह राउटेलाले ७८ रनको साझेदारी गर्दै इनिङलाई अघि बढाएका थिए । दिवानले ३५ औं ओभरको पाँचौं बलमा अमरलाई रविन्द्रबाट ३१ रनमा क्याच गराउँदै साझेदारी तोडेका थिए । अमरले ५४ बलमा ४ चौका र १ छक्का प्रहार गरे ।
