काठमाडौैं (हाम्रो खेलकुद) – नेपाली राष्ट्रिय क्रिकेट टोलीका अनुभवी ब्याट्सम्यान तथा एपिएफ क्लबका कप्तान शरद भेषवाकरले आगामी खेलमा आफूले ठूलो इनिङ खेल्ने आशा राखेको बताएका छन् ।

एपिएफ काठमाडौंमा जारी प्रधानमन्त्री कप राष्ट्रिय एकदिवसिय क्रिकेट प्रतियोगिता शनिबार कर्णालीलाई ७१ रनले हराउँदै सेमिफाइनलमा पुगेको छ । तर सुरुवाती तीन खेलमा भने शरदको व्यक्तिगत प्रर्दशन सामान्य छ ।

शरद पहिलो खेलमा प्रदेश एक विरुद्ध २० रनमा आउट भएका थिए । गण्डकी विरुद्ध ५ रनमा अविजित रहँदा कर्णालीविरुद्ध ८ रनमै आउट हुन पुगेका थिए । खेलपछि बोल्दै शरदले आगमी खेलमा ठूलो इनिङ खेल्न पर्खाई र आशा रहेको बताएको छन् ।

‘अगाडिको खेल कडा छ । त्यो आउनु अघि कुन जोडी हाम्रो लागि राम्रो हुन्छ भन्ने परिक्षण गर्नको लागि कर्णालीविरुद्ध परिवर्तन गरेका हौं । विहानको विकेटमा पनि खेल्न गाह्रो थियो र साझेदारी हुन सकेन । दबाब थियो । कर्णालीले पनि राम्रो प्रर्दशन गर्यो । बीचमा दबाब राखेका थिए सन्दीप जोरा र अमरसिंह राउटेलाले राम्रो साझेदारी गरे’, खेलपछि शरदले भने ।

ओपनर आशिफ शेखले सुरुवाती दुवै खेलमा उत्कृष्ट अर्धशतक प्रहार गरेका थिए । तर कर्णालीविरुद्ध आशिफलाई एपिएफले खेलाएको थिएन । यस विषयमा सोधिएको प्रश्नमा शरदले भने, ‘टोलीको उदेश्य महत्वपूर्ण हुन्छ । अगाडिको खेललाई हेरेर उसको लयलाई निरन्तरता होस् भनेर सोच थियो । अर्कोतर्फ हामी आगमी खेलमा सहि खेलाडी उतार्न पनि परिवर्तन गरेका थियौं ।’

एपिएफले आफ्नो समूह चरणको अन्तिम खेल त्रिभुवन आर्मी क्लबसँग सोमबार खेल्ने छ । ‘आर्मीमा १४ जनानै राष्ट्रिय खेलेका खेलाडी छन् । त्यो राम्रो टोली हो । हामीले राम्रो खेल्नुपर्छ, ‘कर्णालीविरुद्धको टोली परिवर्तनले भने असर नपर्ने शरद बताउछन् ।

व्यक्तिगत प्रदर्शनलाई लिएर शरदले लगातार रन नबनेपनि अब मुख्य खेलमा रन बन्ने आशा गरे । ‘अबको खेलमा ठूलो इनिङको आशा छ । आज रन लाग्छ जस्तो लागिरहेको थियो । दुर्भाग्यवश आउट भए । आगमी खेलमा राम्रो खेल्ने आशा छ’, उनले भने ।

शरदले जारी प्रतियोगितामा युवा प्रतिभाहरुको प्रदर्शनले प्रभावित भएको बताए ।’समग्रमा यस प्रतियोगितामा प्रतिभावान् युवा खेलाडीलाई हेरेर खुसी लागेको छ । कुनै दबाब नलिई स्वतन्त्र रुपमा खेलिरहेका छन् । त्यो एउटा राम्रो संकेत हो । यसैलाई राष्ट्रिय टोलीमा गएर निरन्तरता गर्न सके टोलीका लागि धेरै राम्रो हुनेछ ।’