काठमाडौं (हाम्रो खेलकुद) – चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा आज महत्वपूर्ण खेल हुँदै छ । मुलपानी क्रिकेट मैदानमा समूह बी का लुम्बिनी प्रदेश र बागमती प्रदेशबीच प्रतिस्पर्धा हुँदै छ । खेल विहान ९ बजे सुरु हुनेछ ।
बागमती शीर्ष र लुम्बिनी समूह बी को दोस्रो स्थानमा छन् । बागमती तीन खेलमा अपराजित छ । लुम्बिनी ३ खेलमा २ मा जित र १ मा हार बेहोरेको छ । ज्ञानेन्द्र मल्ल कप्तान रहेको बागमती लुम्बिनीलाई हराउँदै समूह विजेताको रुपमा सेमिफाइनलमा पुग्न चाहान्छ । आजको खेलमा बागमती पराजित भएपनि नेटरनरेटको आधारमा सेमिफाइनलमा पुग्ने बलियो सम्भावाना छ । यता लुम्बिनीलाई भने सेमिफाइनलमा पुग्न बागमतीमाथि फराकिलो जित निकाल्नुपर्ने हुन्छ ।
लुम्बिनीले जितेको खण्डमा भने सोमबार पुलिस र प्रदेश २ को खेल पर्खनु पर्ने हुन्छ । उक्त खेलमा पुलिस पराजित भएमा लुम्बिनी स्वतः सेमिफाइनलमा पुग्ने छ । पुलिस विजयी भएमा नेटरनरेटमा निर्भर रहने छ ।
लुम्बिनीका आक्रामक ब्याट्समयान सौरभ खनाल, अलराउन्डर कृष्ण कार्की र स्पिनर बिक्रम भुषाल प्रमुख हतियार हुन् । यी तीन खेलाडीको प्रर्दशन निकै महत्वपूर्ण हुने छ । यी तीनै खेलाडी राम्रो लयमा छन् । कृष्णले सुदूरपश्चिमलाई ६२ रनमा अल आउट गर्न चार विकेट लिएका थिए । पुलिससँग आक्रामक ४० रनमा अविजित रहेका थिए ।
सौरभ खनालले पहिलो खेलमा प्रदेश २ विरुद्ध ५६ र पुलिसविरुद्ध ७६ रनको उत्कृष्ट इनिङ खेलेका थिए । सुदूरपश्चिमसँग १८ रनमा अविजित रहेका थिए । सौरभ एकै ओभरमा खेललाई मोड्न सक्ने क्षमता भएका खेलाडी हुन् । उनको प्रर्दशन लुम्बिनीका लागि निकै महत्वपूर्ण हुने छ ।
स्पिनर अनिल खरेल, युवा ब्याट्सम्यान देभ खनाल, प्रकाश केसी र सन्दीप रजाली पनि नायक बन्न सक्छन् । युवा खेलाडीले भोरिएको लुम्बिनी बागमतीलाई स्तब्ध पार्दै सेमिफाइनलमा पुग्न चाहान्छ ।
यता बागमतीका पृथु बास्कोटा र रामनरेश गिरी उच्च लयमा छन् । कप्तान ज्ञानेन्द्र मल्ल पनि टोलीलाई घातक बन्न सक्छन् । पृथुले पहिलो खेलमा पुलिस विरुद्ध ४८ रनको अविजित इनिङ खेलेका थिए । सुदूरपश्चिमसँग ८४ र प्रदेश २ सँग ५३ रनमा अविजित रहेका थिए । पृथुको लयलाई रोक्न लुम्बिनीका खेलाडीलाई कठिन पर्न सक्छ ।
बलर रामनरेशले सुरुवाती तीन खेलमा ८ विकेट लिई सकेका छन् । यी बाहेक युवा तीव्र गतिका बलर गौतम केसी र स्पिनर तिलकराज भण्डारी पनि घातक बन्न सक्छन् । टस मुलपानीको खेलमा निकै महत्वपूर्ण हुने अनुमान गरिएको छ ।
यता टियु मैदानमा आज सुदूरपश्चिम र प्रदेश-२ भिड्ने छन् । सुदूरपश्चिम प्रतियोगिताबाट बाहिरि सकेको छ । प्रदेश २ बाहिरिन औपचारिकता बाँकी छ । दुबै टोली पहिलो जितको खोजिमा हुने छन् । प्रदेश२ का युवा अलराउन्डर विकेक यादव राम्रो लयमा छन् । उनी सुदूरपश्चिमका खेलाडीलाई घातक बन्न सक्छन् ।
सदुरपश्चिमका नारायण जोशी प्रदेश २ लाई टाउको दुखाईका अलराउन्डर बन्न सक्छन् । सुदूरपश्चिम जितका साथ प्रतियोगिता अन्त्य गर्न चाहान्छ । यता प्रदेश २ अंक गणितिय सम्भावना कायमै राख्न आजको खेलमा पराकिलो जित निकाल्न खोज्ने छ ।
समूह ए बाट त्रिभुवन आर्मी क्लब र नेपाल एपिएफ क्लब सेमिफाइनलमा पुगि सकेका छन् ।
