मुलपानी (हाम्रो खेलकुद) – चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा बागमती प्रदेशले लुम्बिनी प्रदेशविरुद्ध पहिला ब्याटिङ गर्ने भएको छ ।

मुलपानी क्रिकेट मैदानमा टस जितेर बागमतीका कप्तान ज्ञानेन्द्र मल्लले पहिला ब्याटिङ गर्ने निर्णय लिएका हुन् । लुम्बिनीले आजको खेलमा तीव्र गतिका बलर अमित तामाङ, विकेटकिपर ब्याट्सम्यान सुशान्त सिंह थापा र राजवीर सिंहलाई बेन्चमा राखेको छ । बागमतीले तीब्र गतिका बलर दीपेश श्रेष्ठ, स्पिनर अरियो पौडेल र रिजन ढकाललाई बेन्चमा राखेको छ ।

बागमती शीर्ष र लुम्बिनी समूह बी को दोस्रो स्थानमा छन् । बागमती तीन खेलमा अपराजित छ । लुम्बिनी ३ खेलमा २ मा जित र १ मा हार बेहोरेको छ । ज्ञानेन्द्र मल्ल कप्तान रहेको बागमती लुम्बिनीलाई हराउँदै समूह विजेताको रुपमा सेमिफाइनलमा पुग्न चाहान्छ । आजको खेलमा बागमती पराजित भएपनि नेटरनरेटको आधारमा सेमिफाइनलमा पुग्ने बलियो सम्भावाना छ ।

यता लुम्बिनीलाई भने सेमिफाइनलमा पुग्न बागमतीमाथि फराकिलो जित निकाल्नुपर्ने हुन्छ । लुम्बिनीले जितेको खण्डमा भने सोमबार पुलिस र प्रदेश २ को खेल पर्खनु पर्ने हुन्छ । उक्त खेलमा पुलिस पराजित भएमा लुम्बिनी स्वतः सेमिफाइनलमा पुग्ने छ । पुलिस विजयी भएमा नेटरनरेटमा निर्भर रहने छ ।

लुम्बिनीको प्लेइङ ११ : कृष्ण कार्की (कप्तान), सौरभ खनाल, विक्रम भुषाल, अनिल खरेल, सन्दीप रजाली, प्रकाश केसी, जितेन्द्र शाहनी, प्रनित थापा मगर, देव खनाल, दीपेन्द्र रावत र सन्दीप सुनार ।

बागमतीको प्लेइङ ११ : ज्ञानेन्द्र मल्ल (कप्तान), पृथु बास्कोटा, ईशान पान्डे, रामनरेश गिरी, आकाश थापा, आदिल खान, विभत्सु थापा, गौतम केसी, तिलकराज भण्डारी, विपिन आचार्य र नन्दन यादव