काठमाडौं (हाम्रो खेलकुद) – बाँया हाते ओपनर ब्याट्सम्यान आदिल खानले चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा लुम्बिनीविरुद्ध अर्धशतक प्रहार गरेका छन् ।

आदिलले ७६ बलमा अर्धशतक पूरा गरेका हुन् । सन्दीप सुनारलाई २९ औं ओभरको दोस्रो बलमा चौका प्रहार गर्दै आदिलले अर्धशतक पूरा गरेका थिए । मुलपानी क्रिकेट मैदानमा टस जितेर पहिला ब्याटिङ थालेको बागमतीले २९ ओभरमा २ विकेट गुमाउँदै १ सय २२ रन बनाएको छ ।

आदिल ७७ बलमा ५ चौका र ३ छक्का सहित ५१ रनमा खेलि रहेका छन् । आदिलले दुई जीवनदान पाएका छन् । पृथु बास्कोटा २८ बलमा ३ चौका र १ छक्का सहित २५ रनमा खेलि रहेका छन् ।

बागमतीलाई ओपनर आकाश थापा र आदिल खानले पहिलो विकेटका लागि १९.१ ओभरमा ६३ रनको साझेदारी गर्दै मध्यम सुरुवात दिलाएका थिए । स्पिनर दीपेन्द्र रावतले आकाशलाई ३९ रनमा एलबिडब्लू आउट गर्दै उक्त साझेदारी तोडेका थिए । आकाशले ६७ बलमा ४ चौका र १ छक्का प्रहार गरे । तेस्रो बलमा रावतले विभत्सु थापालाई शून्यमा बोल्ड आउट गर्दै एकै ओभरमा दुई महत्वपूर्ण सफलता दिलाएका थिए ।

आदिलले ब्यक्तिगत २४ रनमा जीवनदान पाएका थिए । स्क्वायर लेगमा प्रनित थापा मगरले ब्यक्तिगत २४ रनमा क्याच ड्रप गर्दै जीवनदान दिएका थिए । त्यस्तै आदिलको ब्यक्तिगत ४५ रनमा सौरभ खनालले लङअङमा क्याच छोड्न पुगेका थिए ।