मुलपानी (हाम्रो खेलकुल) – स्पिनर ललितनारायण राजवंशीको उत्कृष्ट बलिङको सहयोगमा चौथो संस्करणको प्रधानमन्त्री कप एकदिवसय क्रिकेट प्रतियोगितामा प्रदेश २ ले आफ्नो अन्तिम खेलमा नेपाल पुलिस क्लब १ सय ७० रनको मध्यम लक्ष्य दिएको छ ।
मुलपानी क्रिकेट मैदानमा टस हारेर पहिला ब्याटिङ थालेको प्रदेश २ ले ४७ ओभरमा ९ विकेट गुमाउँदै १ सय ६९ रन बनायो । प्रदेश २ का ओपनर हरिशंकर शाह ८४ बलमा ५ चौका र १ छक्का सहित सर्वाधिक ५३ रनमा रन आउट भए । हरिशंकरले ७७ बलमा अर्धशतक पूरा गरेका थिए । हरि शंकरको यो लगातार दोस्रो अर्धशतक हो । हरिशंकरले यस अघि आइतबार सुदूरपश्चिम प्रदेशविरुद्ध ६० रनको इनिङ खेलेका थिए ।
सातौं ओभरको दोस्रो बलमा हिमान्शु दत्त १६ रनमा रन आउट हुन पुगेका थिए । उनले २० बलमा ३ चौका प्रहार गरे । रवि शाहलाई स्पिनर ललितनारायण राजवंशीले सागर ढकालबाट ९ रनमा क्याच आउट गराए । २६ औं ओभरको चौथो बलमा पवन सरार्फले रवि सिंहलाई १२ रनमा बोल्ड आउट गरेका थिए ।
तल्लोक्रमका विशाल शुश्लिङ १२, विवेक यादव ९, आदिल अन्सारी १५, राहुल प्रताप सिंह ७ र सुरज कुर्मी १३ रनमा आउट भए । कुमार थापा ८ रनमा अविजित रहे ।
पुलिसका सागर ढकालले १० ओभरमा ३ मेडन सहित ३६ रन खर्चेर २ विकेट लिए । ललित नारायण राजवंशीले ८ ओभरमा १ मेडन सहित ३७ रन खर्चेर ४ विकेट लिए । पवन सरार्फले १ विकेट लिए ।
